ទៅដល់អ៊ុយក្រែនស្ងាត់ៗ រដ្ឋមន្ត្រីការពារជាតិអាមេរិក ប្រាប់ ហ្សេលេនស្គី ថា ចង់បានអីនិយាយមក

ក្នុងដំណើរទស្សនកិច្ចស្ងាត់ៗទៅដល់ទីក្រុងកៀវ រដ្ឋមន្ត្រីការពារជាតិអាមេរិក លោក ឡូយ អូស្ទីន បានប្រាប់ទៅប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី ថា រដ្ឋាភិបាលទីក្រុងវ៉ាស៊ីនតោ​ន នឹងផ្តល់ឲ្យអ៊ុយក្រែន នូវអ្វីដែលខ្លួនចង់បានឲ្យតែប្រាប់មក ប៉ុន្តែក្នុងអំឡុងពេលនោះ គេមិនមើលឃើញថា ប្រមុ​ខមន្ទីរបញ្ចកោណ និយាយអ្វីទាក់ទងនឹងផែនការជ័យជម្នះរបស់លោក ហ្សេលេនស្គី នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ AP, លោក អូស្ទីន បានទៅដល់ទីក្រុងកៀវតាមរថភ្លើងនៅថ្ងៃអង្គារទី២២ខែតុលាឆ្នាំ២០២៤ ហើយនៅទីនោះលោកបានថ្លែងសុន្ទរកថាក្នុងបណ្ឌិតសភាការទូតអ៊ុយក្រែន ជាមួយនឹងការប្រកាសជំនួយយោធាថ្មីតម្លៃ៤០០លានដុល្លារអាមេរិកផងដែរ។

បន្ទាប់ពីបានជួបជាមួយលោក ហ្សេលេនស្គី និងសមភាគី រុស្តេម យូម៉េរូហ្វ, លោក អូស្ទីន និយាយថា  «សហរដ្ឋអាមេរិក នឹងផ្តល់ជូនអ៊ុយក្រែន នូវអ្វីដែលពួកគេត្រូវការដើម្បីប្រយុទ្ធសម្រាប់ការរស់រានមានជីវិត និងសន្តិសុខរបស់ខ្លួន»។

សម្រាប់ជំនួយថ្មីវិញ សហរដ្ឋអាមេរិក នឹងយកគ្រឿងសឹកចេញពីឃ្លាំងរបស់ខ្លួនទៅជួយអ៊ុយក្រែន ដោយក្នុងនោះភាគច្រើនមានដូចជា គ្រាប់កាំភ្លើងធំ HIMARS និងកាំភ្លើងត្បាល់ រួមជាមួយរថពាសដែក M113 ជាច្រើនគ្រឿងទៀត ហើយជំនួយថ្មីនេះ គឺបន្ថែមពីលើជំនួយមួយទៀតតម្លៃ៤២៥លានដុល្លារ ដែលសហរដ្ឋអាមេរិក ទើបប្រកាសជួយដល់អ៊ុយក្រែន​ កាលពីសប្តាហ៍មុនប៉ុណ្ណោះ។

សូមបញ្ជាក់ថា សហរដ្ឋអាមេរិក គឺជាម្ចាស់ជំនួយធំបំផុតរបស់អ៊ុយក្រែន ដោយគិតត្រឹមពេលនេះ ខ្លួនបានជួយជំនួយសន្តិសុខដល់ទីក្រុងកៀវ អស់ជាង៥៨ពាន់លានដុល្លារទៅហើយ ចាប់តាំងពីរុស្ស៊ី បើកប្រតិបត្តិការសឹកពេញទំហឹងកាលពីខែកុម្ភៈឆ្នាំ២០២២៕

អត្ថបទ៖ សុខ សុវណ្ណ

ចុចអាន៖ អាមេរិក បារម្ភខ្លាំង រឿងកូរ៉េខាងជើង បញ្ជូនទាហានទៅជួយរុស្ស៊ី ប្រយុទ្ធជាមួយអ៊ុយក្រែន