ព័ត៌មានអន្ដរជាតិ

អ៊ីស្រាអែល៖ ហេសបូឡាលាក់លុយ និងមាសជាង៥០០លានដុល្លារនៅលេណដ្ឋានក្រោមមន្ទីរពេទ្យ

បានផុស

៤ ខែ មុន

នៅ

ថ្ងៃអង្គារ ២២ តុលា ២០២៤

ដោយ

Chheang

យោធាអ៊ីស្រាអែល បានប្រកាសកាលពីថ្ងៃទី២១ខែតុលាថា ក្រុមសកម្មប្រយុទ្ធហេសបូឡា កំពុងលាក់មាស និងលុយជាង៥០០លានដុល្លារនៅក្នុងលេណដ្ឋានសម្ងាត់ស្ថិតនៅក្រោមមន្ទីរពេទ្យ al-Sahel នៅរដ្ឋធានីបេរូត ប្រទេសលីបង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល បានប្រាប់ថា លេណដ្ឋាននេះ ត្រូវបានបង្កើតឡើងដោយអតីតមេដឹកនាំក្រុមហេសបូឡាគឺលោក Hassan Nasrallah ដែលត្រូវបានសម្លាប់ក្នុងការវាយប្រហារតាមដែនអាកាសរបស់អ៊ីស្រាអែលកាលពីខែកញ្ញា។ យ៉ាងណា បើតាមអ្នកនាំពាក្យកងកម្លាំង IDF លោក Daniel Hagari អ៊ីស្រាអែលពុំទាន់មានបំណងបើកការវាយប្រហារទៅលើលេណដ្ឋាននោះនៅឡើយទេ។

លោក Hagari បាននិយាយថា៖ «លេណដ្ឋានមានចេតនាសាងសង់ឡើងនៅក្រោមដីមន្ទីរពេទ្យ ហើយវាមានផ្ទុកនូវមាសនិងប្រាក់ច្រើនជាងកន្លះពាន់លានដុល្លារ។ លុយទាំងនោះគួរតែត្រូវយកទៅប្រើប្រាស់ជួយសង្គ្រោះប្រទេសលីបង់ តែវាត្រូវប្រើដើម្បីជួយក្រុមហេសបូឡាទៅវិញ»។

លេណដ្ឋានរបស់ហេសបូឡា មានបន្ទប់ជាច្រើន ដែលប្រើប្រាស់សម្រាប់ការស្នាក់នៅរយៈពេលវែង និងកន្លែងសម្រាប់បញ្ជាប្រតិបត្តិការរបស់ក្រុមសកម្មប្រយុទ្ធ។ លោក Hagari បានស្នើឲ្យមន្ត្រីលីបង់ចុះទៅត្រួតពិនិត្យទីតាំងមួយកន្លែងនោះ។

កន្លងមក កងកម្លាំង IDF បានចោទប្រកាន់ក្រុមហេសបូឡា និងក្រុមហាម៉ាស ដែលសុទ្ធតែជាក្រុមមានការគាំទ្រដោយអ៊ីរ៉ង់ ថាបានលួចលាក់សព្វាវុធ និងក្រុមភេវកររបស់ខ្លួននៅទីតាំងសំខាន់ៗដូចជា សាលារៀន និងមន្ទីរពេទ្យ ជាដើម។

អ្នកនាំពាក្យអ៊ីស្រាអែល បានបញ្ជាក់ថា ការផ្គត់ផ្គង់ហិរញ្ញវត្ថុស្នូលរបស់ហេសបូឡា ធ្វើឡើងដោយអង្គភាព Al-Qard Al-Hasan។ ចំណែកឯអ៊ីរ៉ង់វិញ បានផ្ទេរលុយលក់ប្រេងបាននៅប្រទេសស៊ីរី ទៅឲ្យក្រុមហេសបូឡាតាមរយៈការបញ្ជូនវ៉ាលីពោរពេញដោយមាស និងប្រាក់ដឹកតាមយន្តហោះទៅស្ថានទូតអ៊ីរ៉ង់នៅទីក្រុងបេរូត៕