ព័ត៌មានអន្ដរជាតិ

ប្រមុខUNនឹងជួបពូទីននៅកិច្ចប្រជុំកំពូល BRICS ខណៈអ៊ុយក្រែនអន់ចិត្តខ្លាំង

បានផុស

៣ ខែ មុន

នៅ

ថ្ងៃអង្គារ ២២ តុលា ២០២៤

ដោយ

អ៊ុយក្រែនដែលកំពុងជាប់ដៃសង្គ្រាមជាមួយរុស្ស៊ី បានរិះគន់ខ្លាំងៗចំពោះអគ្គលេខាធិការរបស់អង្គការសហប្រជាជាតិ លោក Antonio Guterres ដែលសម្រេចចិត្តទៅចូលរួមប្រជុំកំពូល BRICS នៅប្រទេសរុស្ស៊ី ហើយគ្រោងជួបប្រមុខរដ្ឋរុស្ស៊ី លោក ពូទីន នៅថ្ងៃចុងក្រោយនៃកិច្ចប្រជុំ។

អគ្គលេខាធិការរបស់អង្គការសហប្រជាជាតិ លោក Antonio Guterres។ UN

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរ៉យទ័ររបស់ចក្រភពអង់គ្លេស បានរាយការណ៍ថា អគ្គលេខាធិការរបស់អង្គការសហប្រជាជាតិ លោក Antonio Guterres បានយល់ព្រមទៅចូលរួមកិច្ចប្រជុំកំពូល BRICS នៅទីក្រុង Kazan នៃប្រទេសរុស្ស៊ី ខណៈដែលអ៊ុយក្រែនបានរិះគន់ចំពោះការសម្រេចចិត្តនេះ។

តាមព័ត៌មានរ៉យទ័រ ក្រសួងការបរទេសអ៊ុយក្រែន បាននិយាយថា ប្រមុខអង្គការសហប្រជាជាតិបានព្រមទទួលការអញ្ជើញរបស់លោក ពូទីន ទៅចូលរួមកិច្ចប្រជុំកំពូល BRICS ដែលនឹងរៀបចំឡើងនៅទឹកដីរុស្ស៊ីចាប់ពីថ្ងៃទី២២ដល់ថ្ងៃទី២៤ខែតុលានេះ ប៉ុន្តែលោកមិនបានចូលរួមប្រជុំផ្ទាល់ ពេលដែលអ៊ុយក្រែន រៀបចំកិច្ចប្រជុំកំពូលស្តីពីសន្តិភាព។

តាមការដកស្រង់របស់រ៉យទ័រ ក្រសួងការបរទេសអ៊ុយក្រែន លើកឡើងនៅលើបណ្តាញសង្គម X ថា៖«ប្រមុខ UN បានបដិសេធ ហើយចាត់តែអ្នកតំណាង ឱ្យចូលកិច្ចប្រជុំស្តីពីសន្តិភាពអ៊ុយក្រែន ដែលរៀបចំកាលពីលើកដំបូង នៅក្នុងប្រទេសស្វីស។ ប៉ុន្តែ លោកបែរជាទទួលយកការអញ្ជើញ ទៅកាន់ទីក្រុង Kazan ពីសំណាក់លោក ពូទីន។ នេះគឺជាជម្រើសខុសឆ្គង ដែលមិនជំរុញបុព្វហេតុសន្តិភាព។ វាអាចត្រឹមតែធ្វើឱ្យខូចកេរ្តិ៍ឈ្មោះ UN ប៉ុណ្ណោះ»។

រុស្ស៉ី បាននិងកំពុងរៀបចំកិច្ចប្រជុំកំពូល នៃក្រុមប្រទេស BRICS នៅក្នុងទីក្រុង Kazan ហើយ លោកពូទីន ក៏នឹងទើបជួបប្រជុំផ្ទាល់ជាមួយប្រមុខដឹកនាំបណ្តាប្រទេសជាសមាជិកលើកដំបូង ចាប់តាំងពីឆ្នាំ២០២០ ដោយសារតែវិបត្តិកូវីដផង និងសង្គ្រាមរុស្ស៊ីនិងអ៊ុយក្រែនផង៕

ដោយ រ៉ាន់ រើយ