ព័ត៌មានអន្ដរជាតិ

ចិន ធ្វើសមយុទ្ធបាញ់គ្រាប់ពិត ក្បែរកោះតៃវ៉ាន់ ក្រោយនាវាចម្បាំងអាមេរិក និងកាណាដា ឆ្លងកាត់ផ្លូវទឹកមានជម្លោះ

បានផុស

៥ ខែ មុន

នៅ

ថ្ងៃអង្គារ ២២ តុលា ២០២៤

ដោយ

តាមសេចក្តីរាយការណ៍របស់ New York Times, នៅថ្ងៃអង្គារទី២២ខែតុលាឆ្នាំ២០២៤ ប្រទេសចិនបានធ្វើសមយុទ្ធបាញ់គ្រាប់ពិតនៅច្រកសមុទ្រតៃវ៉ាន់ ដើម្បីបង្ហាញសាច់ដុំយោធា ដែលរឿងនេះកើតឡើងត្រឹមពីរថ្ងៃប៉ុណ្ណោះ ក្រោយនាវាចម្បាំងអាមេរិកនិងកាណាដា ធ្វើដំណើរឆ្លងកាត់ផ្លូវទឹកដែលមានជម្លោះ បន្ទាប់ពីទីក្រុងប៉េកាំងធ្វើសមយុទ្ធយោធាទ្រង់ទ្រាយធំកាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធបាញ់គ្រាប់ពិតនេះ ធ្វើឡើងចាប់ពីម៉ោង៩ព្រឹកដល់ម៉ោង១រសៀល ក្នុងដែនទឹកក្បែរកោះ Niushan នៃខេត្ត Fujian ដែលស្ថិតនៅចម្ងាយត្រឹម១៦៥គីឡូម៉ែត្រប៉ុណ្ណោះពីទីក្រុង តៃប៉ិ។

ជាការឆ្លើយតបនឹងសមយុទ្ធនេះ ក្រសួងការពារជាតិតៃវ៉ាន់ ចេញសេចក្តីប្រកាសថា ខ្លួនកំពុងតាមដានយ៉ាងដិតដល់នូវសកម្មភាពនិងចេតនាយោធារបស់ប្រទេសចិន។ សមយុទ្ធនេះ អាចជាផ្នែកមួយនៃយុទ្ធសាស្ត្ររបស់ទីក្រុងប៉េកាំង ដើម្បីបំភិតបំភ័យនិងរុញស្ថានការណ៍នៅច្រកសមុទ្រតៃវ៉ាន់ឲ្យកាន់តែឡើងកម្តៅ។

ស្របពេលជាមួយគ្នានោះដែរ នាយករដ្ឋមន្ត្រីតៃវ៉ាន់លោក Cho Jung-tai បានហៅសមយុទ្ធនេះថាជា «ការគំរាមកំហែងដែលបំផ្លាញសន្តិភាពនិងស្ថិរភាពក្នុងតំបន់»។

កាលពីចុងសប្តាហ៍មុន នាវាពិឃាដសហរដ្ឋអាមេរិក និងនាវាចម្បាំងកាណាដា បានទៅដល់ច្រកសមុទ្រតៃវ៉ាន់ព្រមគ្នាតែម្តង ដែលគេជឿថាជាការឆ្លើយតបទៅសមយុទ្ធចិនមុននោះ។

កងនាវាចរលេខ៧របស់កងទ័ពជើងទឹកអាមេរិក បានប្រកាសកាលពីថ្ងៃចន្ទថា នាវាពិឃាដ USS Higgins និងនាវាចម្បាំងកាណាដា HMCS Vancouver បានធ្វើការឆ្លងកាត់ «តាមទម្លាប់» កាលពីថ្ងៃទី២០ខែតុលា «លើផ្លូវទឹកដែលសេរីភាពនៃការធ្វើនាវាចរណ៍ និងការហោះហើរលើសមុទ្រត្រូវបានអនុវត្តស្របតាមច្បាប់អន្តរជាតិ»។

កងនាវាចរខាងលើបន្ថែមថា វាបង្ហាញពីការប្តេជ្ញាចិត្តរបស់សហរដ្ឋអាមេរិក និងកាណាដា ក្នុងការលើកកម្ពស់សេរីភាពនៃការធ្វើនាវាចរណ៍សម្រាប់ប្រទេសទាំងអស់នៅលើពិភពលោក៕

អត្ថបទ៖ សុខ សុវណ្ណ

ចុចអាន៖ នាវាចម្បាំងអាមេរិក និងកាណាដា ទៅដល់ច្រកសមុទ្រតៃវ៉ាន់ ក្រោយចិនធ្វើសមយុទ្ធ