គុយបា​​រងគ្រោះ​ផ្ទួនៗ​ដោយសារ​ការ​ដាច់​​ចរន្តអគ្គិសនី​ និង​ជួប​ព្យុះសង្ឃរា Oscar​​ទៀត​

ខ្យល់ព្យុះសង្ឃរា Oscar បានសម្លាប់មនុស្ស​៦​នាក់ បន្ទាប់ពីវាយប្រហារប្រទេសគុយបា ក្នុងអំឡុងពេលដាច់ចរន្តអគ្គិសនីដ៏ធំមួយ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២២ខែតុលានេះ។

ភ្លើងបានរលត់បង្កផលប៉ះពាល់ដល់ប្រជាជន ១០ លាននាក់របស់ប្រទេសដែលគ្រប់គ្រងដោយកុម្មុយនិស្តចាប់តាំងពីថ្ងៃសុក្របន្ទាប់ពីការដួលរលំនៃរោងចក្រថាមពលដ៏ធំបំផុតរបស់ប្រទេសនេះ បានធ្វើឱ្យខូចបណ្តាញទាំងមូល ចំពេលមានព្យុះសង្ឃរា Oscarបោកបក់កាត់ថែមទៀត។

ប្រធានាធិបតីលោក Miguel Diaz-Canel បាននិយាយនៅក្នុងសុន្ទរកថាតាមទូរទស្សន៍ថា «គួរឱ្យសោកស្ដាយ យោងតាមព័ត៌មានបឋម មនុស្សប្រាំមួយនាក់បានបាត់បង់ជីវិត» ខណៈព្យុះ​នេះ​បាន​បង្ក​ការ​ខូច​ខាត​យ៉ាង​ខ្លាំង​នៅ​ខេត្ត Guantanamo ភាគ​ខាង​កើត។

ព្យុះសង្ឃរា Oscar បានចុះខ្សោយទៅជាព្យុះត្រូពិច នៅពេលដែលវាផ្លាស់ទីមកដល់ដី ប៉ុន្តែវានៅតែត្រូវបានគេរំពឹងថានឹងនាំមកនូវ ទឹកជំនន់ភ្លាមៗ ដែលគំរាមកំហែងដល់អាយុជីវិត រួមជាមួយនឹងបំណាក់ដី នេះបើតាមមជ្ឈមណ្ឌលព្យុះសង្ឃរាជាតិអាមេរិកបានព្រមាន។ ទូរទស្សន៍រដ្ឋបានរាយការណ៍ថា ដំបូលផ្ទះ និងជញ្ជាំងផ្ទះត្រូវបានខូចខាត ហើយបង្គោលអគ្គិសនី និងដើមឈើបានដួលរលំជាច្រើនដោយសារឥទ្ធិពលព្យុះនេះ។

ក្រុមហ៊ុនអគ្គិសនីរបស់រដ្ឋធានីបានឲ្យដឹងថាគិតត្រឹមរសៀលថ្ងៃច័ន្ទ ជិត៩០ ភាគរយនៃប្រជាជននៅក្នុងទីក្រុង Havana ដែលជាផ្ទះរបស់មនុស្សប្រហែល ២ លាននាក់មានថាមពលប្រើប្រាស់ឡើងវិញហើយ។ ទោះជាយ៉ាងនេះក្តី អ្នកស្រុកជាច្រើននៅខាងក្រៅទីក្រុង Havana នៅតែគ្មានអគ្គិសនីប្រើប្រាស់ ហើយប្រទេសគុយបានៅតែស្ថិតក្នុងភាពងងឹតកាលពីថ្ងៃអាទិត្យ ស្របពេលនៅពេលដែលព្យុះសង្ឃរា Oscar បានបោកបក់នៅភាគខាងកើតនៃប្រទេសជាព្យុះប្រភេទទី ១ដែលបណ្តាលឱ្យមនុស្សស្លាប់ និងការខូចខាតជាច្រើន។

គួរបញ្ជាក់ថា លោកប្រធានាធិបតី Diaz-Canel បានស្តីបន្ទោសស្ថានភាពលំបាករបស់ប្រទេសគុយបាក្នុងការទទួលបានឥន្ធនៈសម្រាប់រោងចក្រថាមពលរបស់ខ្លួនដោយសារការរឹតបន្តឹងក្នុងអំឡុងពេលដែលលោក Donald Trump កាន់តំណែងជាប្រធានាធិបតីនៃការហ៊ុមព័ទ្ធពាណិជ្ជកម្មរបស់សហរដ្ឋអាមេរិករយៈពេលប្រាំមួយទសវត្សរ៍។

ជាមួយគ្នានេះប្រទេសកោះនេះកំពុងស្ថិតក្នុងវិបត្តិសេដ្ឋកិច្ចដ៏ទូលំទូលាយ ដែលជាវិបត្តិសេដ្ឋកិច្ចដ៏អាក្រក់បំផុត នេះបើយោងតាមអ្នកជំនាញ ចាប់តាំងពីការដួលរលំនៃសហភាពសូវៀត ដែលជាឧបត្ថម្ភធនដ៏ធំដល់គុយបា៕

អត្ថបទ៖ ប៊ុន សុភាព