ព័ត៌មានអន្ដរជាតិ

កុមារជាង១លាននាក់នៅប៉ាគីស្ថានខកខានចាក់វ៉ាក់សាំងជំងឺស្វិតដៃជើង ខណៈករណីឆ្លងកើនឡើង

បានផុស

១៥ វិនាទី មុន

នៅ

ថ្ងៃពុធ ២៣ តុលា ២០២៤

ដោយ

ជំងឺស្វិតដៃជើងកំពុងរីករាលដាលម្តងទៀតនៅក្នុងប្រទេសប៉ាគីស្ថាន ខណៈកុមារជាង១លាននាក់ខកខានការចាក់វ៉ាក់សាំង ដែលនេះបានគូសបញ្ជាក់ពីបញ្ហាប្រឈមដែលប៉ាគីស្ថានប្រឈមមុខក្នុងការលុបបំបាត់ជំងឺមួយក្នុងចំណោមជំងឺដែលពិបាកលុបបំបាត់បំផុតរបស់ពិភពលោក។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី២៣ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីប៉ាគីស្ថាន បានរាយការណ៍ ពីករណីជំងឺស្វិតដៃជើងថ្មីជាងដប់នាក់ក្នុងខែតុលាដែលនាំឱ្យចំនួនអ្នកឆ្លងសរុបក្នុងឆ្នាំនេះកើនដល់ ៣៩នាក់ បើធៀបនឹងឆ្នាំមុនមានតែប្រាំមួយនាក់ប៉ុណ្ណោះ ។ កុមារប្រហែល១លាននាក់បានខកខានការចាក់វ៉ាក់សាំងជំងឺស្វិតដៃជើងនៅក្នុងខែកញ្ញា ដោយរួមបញ្ចូលទាំងគម្លាតនៃភាពស៊ាំដែលមានស្រាប់ដែលបានកើនឡើងចាប់តាំងពីកូវីដ១៩វាបានរំខានដល់កិច្ចខិតខំប្រឹងប្រែងចាក់ថ្នាំបង្ការ។

ជំងឺស្វិតដៃជើង (Polio) គឺជាជំងឺដែលឆ្លងមេរោគខ្លាំង ដែលភាគច្រើនប៉ះពាល់ដល់កុមារអាយុក្រោម ៥ ឆ្នាំដោយជំងឺនេះ វាយប្រហារប្រព័ន្ធសរសៃប្រសាទ អាចបណ្តាលឱ្យខ្វិន បញ្ហាផ្លូវដង្ហើម និងស្លាប់ក៏មាន។ ជំងឺនេះរីករាលដាលតាមរយៈទឹក ឬអាហារដែលមានមេរោគ ហើយមិនមានការព្យាបាលទេ ប៉ុន្តែវាអាចត្រូវបានការពារដោយប្រើវ៉ាក់សាំង ដូចដែលករណីជំងឺស្វិតដៃជើងនៅទូទាំងពិភពលោកត្រូវបានកាត់បន្ថយជាង៩៩ភាគរយចាប់តាំងពីទសវត្សរ៍ឆ្នាំ១៩៨០ ដោយសារយុទ្ធនាការចាក់ថ្នាំបង្ការ។

ប៉ាគីស្ថាននិងប្រទេសជិតខាង អាហ្វហ្គានីស្ថាន គឺជាប្រទេសតែពីរប៉ុណ្ណោះ ដែលជំងឺស្វិតដៃជើង នៅតែជាជំងឺរាតត្បាត នេះបើយោងតាមអង្គការសុខភាពពិភពលោក (WHO) ទោះបីជាថ្មីៗនេះ ទីភ្នាក់ងារសុខភាពរបស់អង្គការសហប្រជាជាតិ ក៏បានព្រមានពីការកើតឡើងវិញនៃជំងឺដ៏កាចសាហាវនៅតំបន់ហ្គាហ្សា អស់រយៈពេលជាងមួយឆ្នាំ។

កម្មវិធីចាក់វ៉ាក់សាំងនៅក្នុងប្រទេសប៉ាគីស្ថាន ដែលមានប្រជាជនជាង ២៤៩លាននាក់បានជួបការលំបាកមួយផ្នែកដោយសារតែការមិនទុកចិត្តពីប្រជាជនជាប្រវត្តិសាស្ត្រលើអ្នកផ្តល់សេវាថែទាំសុខភាពបរទេស។ កាលពីឆ្នាំ២០២២ មានការចោទប្រកាន់ថាមន្ត្រីចារកិច្ចអាមេរិកបានប្រើប្រាស់កម្មវិធីចាក់ថ្នាំបង្ការក្លែងក្លាយនៅក្នុងទីក្រុង Abbottabad ប្រទេសប៉ាគីស្ថាន បានធ្វើឱ្យប្រជាជនមានការព្រួយបារម្ភទាំងនោះ។

ជាមួយគ្នានេះជំនឿសាសនា និងកង្វះការយល់ដឹងអំពីគ្រោះថ្នាក់នៃជំងឺស្វិតដៃជើង ក៏បានរារាំងដល់កិច្ចខិតខំប្រឹងប្រែងផ្នែកសុខភាពសាធារណៈផងដែរ។ អង្គការក្រៅរដ្ឋាភិបាលអន្តរជាតិ និងអាជ្ញាធរប៉ាគីស្ថានបានធ្វើការយ៉ាងសកម្មដើម្បីលុបបំបាត់ពាក្យចចាមអារ៉ាម និងចាក់វ៉ាក់សាំងកុមារក្នុងប៉ុន្មានឆ្នាំថ្មីៗនេះ ប៉ុន្តែព័ត៌មានមិនពិតនៅតែបន្តរីករាលដាល។

ភាគច្រើននៃករណីថ្មីៗនៅក្នុងប្រទេសប៉ាគីស្ថានត្រូវបានប្រមូលផ្តុំនៅក្នុងខេត្ត Balochistan ភាគនិរតីដែលមានព្រំប្រទល់ជាប់ប្រទេសអាហ្វហ្គានីស្ថាន ដែលឪពុកម្តាយមានការស្ទាក់ស្ទើរក្នុងការចាក់ថ្នាំបង្ការដល់កូនរបស់ពួកគេ ដោយសារតែព័ត៌មានមិនពិត និងការមិនទុកចិត្តលើអ្នកផ្តល់សេវាថែទាំសុខភាព។

ទោះបីជាមានករណីកើនឡើងនាពេលថ្មីៗនេះក៏ដោយ ក៏អាជ្ញាធរប៉ាគីស្ថានមានសុទិដ្ឋិនិយមថា ពួកគេអាចបញ្ឈប់ការរីករាលដាលនៃជំងឺនេះបាន។ ប្រទេសនេះនឹងចាប់ផ្តើមយុទ្ធនាការចាក់វ៉ាក់សាំងការពារជំងឺស្វិតដៃជើងថ្មីនៅទូទាំងប្រទេសនៅថ្ងៃទី ២៨ខែតុលា ក្នុងគោលបំណងចាក់វ៉ាក់សាំងដល់កុមារអាយុក្រោម៥ឆ្នាំ ចំនួន៤៥លាននាក់។

កម្មវិធីលុបបំបាត់ជំងឺស្វិតដៃជើងរបស់ប៉ាគីស្ថានក៏បានបង្ហោះនៅលើប្រព័ន្ធផ្សព្វផ្សាយសង្គមដែរថា៖«ការលុបបំបាត់ជំងឺស្វិតដៃជើងគឺជាអាទិភាពកំពូលរបស់ប្រទេសប៉ាគីស្ថាន» ខណៈផែនការបង្រួបបង្រួមជាមួយខេត្តនានាមានគោលបំណងបញ្ឈប់ការឆ្លងជំងឺស្វិតដៃជើងនៅឆ្នាំ ២០២៥៕