ទីក្រុងបាងកក នឹងត្រូវខ្យល់ពុល គ្របដណ្តប់ មួយសប្តាហ៍ពេញ

ប្រទេសថៃបានចេញសេចក្តីប្រកាសឲ្យ នាយកដ្ឋានគ្រប់គ្រងការបំពុល ត្រៀមខ្លួនទប់ទល់នឹងខ្យល់បំពុលឬកម្ទេចធូលី PM2.5 ដែលនឹងគ្របដណ្តប់រាជធានីបាងកក ពេញមួយសប្តាហ៍នេះតែម្តង។ នេះបើតាមការចុះផ្សាយរបស់ Thai PBS នៅថ្ងៃពុធទី២៣ខែតុលាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីលោក Sakda Tridech ប្រធានផ្នែកគ្រប់គ្រងគុណភាពខ្យល់និងសំលេងរំខាននៃប្រទេសថៃ, មូលហេតុដែលទីក្រុងបាងកក ជួបប្រទះខ្យល់ពុលបែបនេះគឺដោយសារតែគុណភាពខ្យល់មានការធ្លាក់ចុះ ហើយខ្យល់ត្រជាក់បក់មកពីប្រទេសចិន នឹងមកដល់រួចគ្របដណ្តប់លើភាគខាងជើងនិងឦសានប្រទេសថៃ។

យ៉ាងណាក្តី លោកនិយាយថា ដោយសារតែបាតុភូតអាកាសធាតុ La Niña ដែលនឹងអូសប​ន្លាយដល់ខែមីនាឆ្នាំក្រោយ មានន័យថា តំបន់ប៉ាស៊ីហ្វិកខាងលិចរួមទាំងប្រទេសថៃផងដែរ ​នឹ​​ងមានភ្លៀងធ្លាក់ញឹកញាប់ ដូច្នេះវានឹងជួយឲ្យបញ្ហា PM2.5 មិនសូវអាក្រក់ដូចឆ្នាំមុនឡើយ។

ពាក់ព័ន្ធបញ្ហានេះដែរ អគ្គនាយកដ្ឋានត្រួតពិនិត្យការបំពុល បានអំពាវនាវឲ្យអ្នកក្រុងបាងកក ត្រូវប្រយ័ត្នខ្លួនពេលចេញក្រៅដូចជាពាក់ម៉ាសដើម្បីការពារពីខ្យល់បំពុលជាដើម។

សូមបញ្ជាក់ថា មិនមែនតែរាជធានីបាងកកនៃប្រទេសថៃទេ សូម្បីទីក្រុងហាណូយនៃប្រទេសវៀតណាម ក៏ប្រឈមគុណភាពខ្យល់ពុលដ៏អាក្រក់ រហូតដល់ខែមីនាឆ្នាំក្រោយផងដែរ។

ប៉ុន្មានថ្ងៃមកនេះ តំបន់ភាគច្រើននៃទីក្រុងហាណូយ ត្រូវគ្របដណ្តប់ដោយផ្សែងអ័ព្ទក្រាស់និងខ្យល់ពុលដ៏គ្រោះថ្នាក់ ហើយបើយោងតាមអ្នកជំនាញ ហេតុដែលទីក្រុងហាណូយ មានផ្សែងអ័ព្ទក្រាស់និងខ្យល់ពុលដ៏គ្រោះថ្នាក់បែបនេះ គឺបណ្តាលពីបម្រែបម្រួលអាកាសធាតុ និងការហប់ខ្យល់ ធ្វើឲ្យកំហាប់ភាគល្អិតនិងធូលី មិនបែកខ្ញែក។

មិនត្រឹមប៉ុណ្ណឹង កត្តានេះក៏បណ្តាលមកពីផ្សែងយានយន្ត រោងចក្រ ការដុតកាកសំណល់ ចំបើង និងផលកសិកម្មនៅតាមវាលស្រែចម្ការ ដែលកាន់តែរីករាលដាលនិងញឹកញាប់ដោយគ្មានវិធានការទប់ស្កាត់ប្រកបដោយប្រសិទ្ធភាពផងដែរ៕

អត្ថបទ៖ សុខ សុវណ្ណ

ចុចអាន៖ ទីក្រុងហាណូយ នឹងបន្តគ្របដណ្តប់ដោយខ្យល់ពុលគ្រោះថ្នាក់ធ្ងន់ធ្ងរ ដល់ឆ្នាំក្រោយ