ព័ត៌មានអន្ដរជាតិ

លោក Blinken ប្រាប់អ៊ីស្រាអែលឲ្យក្ដាប់ឱកាសនៃការស្លាប់លោក Sinwar ដើម្បីបញ្ចប់សង្គ្រាម

បានផុស

៤ ខែ មុន

នៅ

ថ្ងៃពុធ ២៣ តុលា ២០២៤

ដោយ

Chheang

លោក Antony Blinken រដ្ឋមន្ត្រីការបរទេសសហរដ្ឋអាមេរិក នៅថ្ងៃទី២៣ខែតុលាបានជំរុញឲ្យប្រទេសអ៊ីស្រាអែលបញ្ចប់សង្គ្រាមរយៈពេលជាង១ឆ្នាំនៅតំបន់ហ្គាហ្សា ដោយចាប់យកឱកាសក្រោយការបំផ្លាញសមត្ថភាពខ្លាំងៗនៅក្នុងក្រុមហាម៉ាស និងការសម្លាប់លោក Yahya Sinwar ដែលជាមេដឹកនាំក្រុមសកម្មប្រយុទ្ធប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blinken បាននិយាយថា អ៊ីស្រាអែលបានទទួលជោគជ័យរួចមកហើយនៅក្នុងការធានាបានថានឹងគ្មានការវាយឆ្មក់ម្ដងទៀតដូចកាលពីថ្ងៃទី៧ខែតុលាឆ្នាំមុន ដែលបង្កើតបានជាសង្គ្រាមនៅហ្គាហ្សា។ លោកបន្តថា អ្វីដែលអ៊ីស្រាអែលគួរធ្វើគឺ នាំយកចំណាប់ខ្មាំងដែលនៅសេសសល់ ១០១នាក់ត្រឡប់ទៅប្រទេសកំណើតរបស់ពួកគេវិញ ហើយបញ្ឈប់ជម្លោះប្រដាប់អាវុធមួយនេះ។

ការវាយសងសឹករបស់អ៊ីស្រាអែលនៅហ្គាហ្សា បានធ្វើឲ្យប្រជាជនភាគច្រើនត្រូវបំផ្លាស់ទីលំនៅទៅរស់នៅជុំរុំភៀសខ្លួន។ លោក Blinken បានប្រាប់ថា អ៊ីស្រាអែលត្រូវធ្វើយ៉ាងណាធានាឲ្យបាននូវការផ្គត់ផ្គង់ជំនួយមនុស្សធម៌ដល់ប្រជាជនដែលកំពុងរស់នៅក្នុងស្ថានភាពដ៏ត្រដាបត្រដួស។

ពលរដ្ឋប៉ាឡេស្ទីនភាគច្រើន បានកើតក្ដីព្រួយបារម្ភថា អ៊ីស្រាអែលមានបំណងបង្ខិតបង្ខំពួកគេឲ្យចាកចេញពីតំបន់ហ្គាហ្សាស្ទ្រីប ដើម្បីដាក់ការគ្រប់គ្រងនៅទីនោះវិញ ដោយអនុញ្ញាតឲ្យជនជាតិជ្វីហ្វវិលត្រឡប់ទៅតាំងលំនៅបន្ទាប់ពីការដកខ្លួនរបស់ពួកគេក្នុងឆ្នាំ២០០៥។

លោក Blinken បានបញ្ជាក់ម្តងទៀតថា សហរដ្ឋអាមេរិកបានជំទាស់រាល់ការកាន់កាប់របស់អ៊ីស្រាអែលលើតំបន់ហ្គាហ្សា។ លោកបន្ថែមថា លោក Benjamin Netanyahu នាយករដ្ឋមន្ត្រីអ៊ីស្រាអែល បានធានាជាមួយអាមេរិកថា លោកពុំមានផែនការបែបនេះទេ ទោះបីជាមានសម្ពាធពីមនុស្សជាច្រើននៅក្នុងបក្សរបស់លោកក្នុងការអនុញ្ញាតឲ្យជនជាតិជ្វីហ្វត្រឡប់ទៅវិញក៏ដោយ៕

ដោយ៖ ឈាង

ចុចអាន៖ ក្រុមហាម៉ាស ប្រកាសថាមិនដោះលែងចំណាប់ខ្មាំង ទោះលោក Sinwar ត្រូវបានសម្លាប់