ព័ត៌មានអន្ដរជាតិ

ព្យុះ ត្រាមី វាយប្រហារហ្វីលីពីន ចាស់ដៃ, មនុស្សស្លាប់កើនដល់ ២៤នាក់

បានផុស

៥ ខែ មុន

នៅ

ថ្ងៃព្រហស្បតិ៍ ២៤ តុលា ២០២៤

ដោយ

ព្យុះត្រូពិក ត្រាមី «Trami» បានវាយប្រហារប្រទេសហ្វីលីពីនយ៉ាងចាស់ដៃ ដោយបង្កឲ្យមានបំណាក់ដីនិងគ្រោះទឹកជំនន់ធំធេង ខណៈគិតត្រឹមរសៀលថ្ងៃព្រហស្បតិ៍ទី២៤ខែតុលាឆ្នាំ២០២៤ តួលេខមនុស្សស្លាប់ដោយសារឥទ្ធិពលព្យុះនេះ កើនដល់២៤នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយកម្លាំងខ្យល់ល្បឿនថេរជាអតិបរមា ៩៥គីឡូម៉ែត្រក្នុង១ម៉ោង និងខ្យល់កន្ទ្រាក់ ១៦០គីឡូម៉ែត្រក្នុង១ម៉ោង, ព្យុះ ត្រាមី បានចូលវាយប្រហារតំបន់ Cordillera ភាគឦសានប្រទេសហ្វីលីពីន កាលពីថ្ងៃពុធ ដោយបង្ខំឲ្យរដ្ឋាភិបាលចេញការព្រមានជម្លៀសប្រជាជននៅតាមតំបន់មានហានិភ័យ បិទសាលារៀន និងថែមទាំងផ្អាកជើងហោះហើរមួយចំនួន ទៀតផង។

ពាក់ព័ន្ធការស្លាប់, មនុស្សភាគច្រើនត្រូវបាត់បង់ជីវិតដោយសារលង់ទឹកក្នុងតំបន់ Bicol ដែលរងការវាយប្រហារខ្លាំងនិងខេត្ត Quezon នៅជាប់នោះ ហើយអាជ្ញាធរក៏ព្រមានដែរថា តួលេខជនរងគ្រោះនឹងបន្តហក់ឡើងកាន់តែច្រើន។

យ៉ាងណាក្តី ក្រុមមន្ត្រីបានដាក់ពង្រាយកងជួយសង្គ្រោះរាប់ពាន់នាក់ ឲ្យធ្វើការទាំងយប់ទាំងថ្ងៃ ដើម្បីជួយសង្គ្រោះប្រជាជន ជាពិសេសអ្នកដែលនៅតាមតំបន់កាត់ផ្តាច់និងអ្នកជាប់ក្នុងផ្ទះ។

សូមបញ្ជាក់ថា មួយឆ្នាំៗ ហ្វីលីពីន ជួបព្យុះមិនក្រោម២០ទេ ហើយក្នុងឆ្នាំ២០១៣, Haiyan គឺជាព្យុះស៊ីក្លូនខ្លាំងបំផុតដែលវាយប្រហារប្រទេសនេះ ដោយឆក់យកជីវិតមនុស្សជាង ៧ ៣០០នាក់ ព្រមទាំងបង្កការបំផ្លិចបំផ្លាញធំធេងថែមទៀតផង៕