ព័ត៌មានអន្ដរជាតិ

លោក ពូទីន មិនបដិសេធរបាយការណ៍អាមេរិកអំពីការបញ្ជូនទ័ពកូរ៉េខាងជើង

បានផុស

៤ ខែ មុន

នៅ

ថ្ងៃសុក្រ ២៥ តុលា ២០២៤

ដោយ

Chheang

ប្រធានាធិបតីរុស្ស៊ី លោក វ៉្លាឌឺមៀរ ពូទីន កាលពីថ្ងៃទី២៤ខែតុលាមិនបានបដិសេធរបាយការណ៍របស់សហរដ្ឋអាមេរិក ដែលអះអាងថាមានការបញ្ជូនទ័ពកូរ៉េខាងជើងទៅកាន់ប្រទេសរុស្ស៊ីនោះទេ។ ផ្ទុយទៅវិញ លោក ពូទីន បានលើកឡើងពីកិច្ចព្រមព្រៀងការពារគ្នាទៅវិញទៅមករវាងរុស្ស៊ី និងកូរ៉េខាងជើង ហើយបានចោទប្រកាន់លោកខាងលិចថាជាអ្នកធ្វើឲ្យសង្គ្រាមនៅអ៊ុយក្រែនកាន់តែធំឡើងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហរដ្ឋអាមេរិក បាននិយាយថា ខ្លួនមានព័ស្តុតាងដែលបង្ហាញថា កូរ៉េខាងជើងបញ្ជូនទ័ព ៣ ០០០នាក់ទៅរុស្ស៊ី ដើម្បីច្បាំងក្នុងសង្គ្រាមនៅអ៊ុយក្រែន ដែលជាសញ្ញានៃការកើនឡើងភាពតានតឹងបន្ថែមទៀត។

លោក ពូទីន បានរៀបរាប់ពីមាត្រា៤នៃកិច្ចព្រមព្រៀងការពារគ្នារវាងរុស្ស៊ី-កូរ៉េខាងជើង ដោយនិយាយថា៖ «វាមានមាត្រាទី៤។ យើងមិនដែលសង្ស័យបន្តិចទេថា ថ្នាក់ដឹកនាំកូរ៉េខាងជើងគោរពកិច្ចព្រមព្រៀងនេះបានខ្ជាប់ខ្ជួនល្អ។ ប៉ុន្តែអ្វីដែលយើងធ្វើនៅក្នុងក្របខណ្ឌនៃមាត្រានេះគឺជាកិច្ចការរបស់ពួកយើង»។

មាត្រា៤នៃកិច្ចព្រមព្រៀង បានចែងថា បើប្រទេសណាមួយរងការវាយលុកដោយប្រដាប់អាវុធ នោះប្រទេសមួយទៀតនឹងជួយផ្ដល់ជាយោធា និងជំនួយដទៃទៀត នៅក្នុងគ្រប់មធ្យោបាយទាំងអស់ដែលខ្លួនមាន។ មាត្រានេះ បានបង្ហាញពីការផ្សារភ្ជាប់យ៉ាងស្អិតរមួតរវាងក្រុងមូស្គូ និងក្រុងព្យុងយ៉ាង ចាប់តាំងពីសម័យសង្គ្រាមត្រជាក់។

ទន្ទឹមនោះ លោក ពូទីន ក៏បានចោទប្រកាន់លោកខាងលិចផងដែរថាបានបង្កើនវិបត្តិកាន់តែខ្លាំងនៅក្នុងសង្គ្រាមនៅអ៊ុយក្រែន ហើយបន្ថែមថា មន្ត្រីអង្គការណាតូមានការជាប់ពាក់ព័ន្ធដោយផ្ទាល់នៅក្នុងសង្គ្រាមមួយនេះ។

មេដឹកនាំរុស្ស៊ី បាននិយាយថា៖ «យើងដឹងថានរណាមានវត្តមាននៅទីនោះ មកពីប្រទេសណាតូអឺរ៉ុបមួយណា ហើយនិងរបៀបដែលពួកគេធ្វើការងារទាំងនេះ»៕

ដោយ៖ ឈាង

ចុចអាន៖ អ៊ុយក្រែន ថា ទ័ពកូរ៉េខាងជើង បញ្ចប់ការបំពាក់បំប៉ន និងចូលរួមក្នុងសមរភូមិរួចហើយ