​WSJ: Elon Musk រក្សាទំនាក់​ទំនង​​ជាមួយ​ពូទីន​និង​​មន្ត្រី​ជាន់ខ្ពស់រុស្ស៊ី​តាំងចុងឆ្នាំ​២០២២​

យោង​តាមការ​ចេញ​ផ្សាយ​របស់​​​កាសែត Wall Street Journal (WSJ) នៅ​ថ្ងៃទី២៥​ខែតុលា​នេះ មហាសេដ្ឋី​បច្ចេកវិទ្យា​ និង​​ស្ថាប​និក​រថយន្តអគ្គិសនី​ដ៏ល្បីល្បាញ លោក Elon Musk ដែលជាអ្នកមានបំផុតនៅលើពិភពលោក និង​​ជាអ្នក​ជួយ​​បេក្ខភាព​​ប្រធានាធិបតី​សហរដ្ឋអាមេរិក លោក ដូណាល់ ត្រាំ ​សម្រាប់​ការបោះឆ្នោត​នៅខែ​វិច្ឆិកា​ខាងមុខ​នេះ បានទាក់ទងជាទៀងទាត់ជាមួយប្រធានាធិបតីរុស្ស៊ីលោក វ៉ា្លឌីមៀ ពូទីន (Vladimir Putin) និងមន្ត្រី​កំពូលៗ​​​របស់​រុស្ស៊ី​ចាប់​តាំពីចុងឆ្នាំ​២០២២​។

​បេក្ខភាព​ប្រធានាធិបតីសហរដ្ឋអាមេរិកដ៏លេច​ធ្លោ​ លោក​ ដូណាល់ ត្រាំ តែង​តែ​​និយាយជាចំហរ​​អំពី​​ការ​​បញ្ចប់សង្គ្រាម​រវាង​រុស្ស៊​និង​អ៊ុយក្រែន​នៅពេលដែល​លោក​ឈ្នះ​ការ​បោះឆ្នោត​​នៅ​ខែ​វិច្ឆិកា​ខាងមុខ​នេះ ហើយ ឲ្យ​អ៊ុយក្រែន​កាត់​ដី​ដែល​រុស្ស៊ី​កាន់​កាប់​ទៅ​ឲ្យភាគី​រុស្ស៊ី​​​ជា​ថ្នូរ​សន្តិភាព​​។​

លោក​ Elon Musk ដែលត្រូវបានគេស្គាល់ថា ជាស្ថាបនិក និងជានាយកប្រតិបត្តិនៃក្រុមហ៊ុនអវកាស និងទូរគមនាគមន៍ SpaceX និងជាម្ចាស់​ប្រព័ន្ធ​ផ្សព្វផ្សាយ​បណ្តាញ​សង្គម X បានចេញមកគាំទ្រអ៊ុយក្រែន​នៅ​​ពេលចាប់ផ្តើមការលុកលុយទ្រង់ទ្រាយធំកាល​ដើម​ឆ្នាំ២០២២ ដោយបរិច្ចាគស្ថានីយទំនាក់ទំនង Starlink ដែល​បានជួយយ៉ាងច្រើន​ខ្សែការពារអ៊ុយក្រែន។

លោក​ Musk បានផ្លាស់ប្តូរ​ការ​យល់​ឃើញ​របស់​លោក​បន្តិចម្តងៗឆ្ពោះទៅកាន់​ការ​​គាំទ្ររុស្ស៊ីនៅពេលក្រោយ​ក្នុងអំឡុងសង្រ្គាម ហើយមហាសេដ្ឋីបានរារាំងអ៊ុយក្រែនពីការប្រើប្រាស់ស្ថានីយ Starlink ក្នុងការវាយប្រហារលើកងនាវារុស្ស៊ី។ លោក​ក៏បានត្អូញត្អែរថាគាត់កំពុង «ខាត​លុយ»​ តាមរយៈការផ្តល់សេវា Starlink ដល់អ៊ុយក្រែន។

មហាសេដ្ឋី​ជំនួញ​រូប​នេះ ដែល​បាន​គាំទ្រ​យុទ្ធនាការ​របស់​បេក្ខជន​ប្រធានាធិបតី​មកពី​គណបក្ស​សាធារណរដ្ឋ និង​អតីត​ប្រធានាធិបតី​អាមេរិក លោកប្រធានាធិបតី លោក ដូណាល់ ត្រាំ (Donald Trump) ធ្លាប់បាន​បដិសេធមិនយល់ស្របជាមួយទីក្រុងមូស្គូ ហើយបានអះអាងថា លោកបាននិយាយជាមួយលោក ​ពូទីន​តែម្តងគត់ក្នុងខែមេសា ឆ្នាំ ២០២១​អំពីប្រធានបទទាក់ទងនឹងអវកាស។

​មន្ត្រី​​ អឺរ៉ុប ​សហរដ្ឋអាមេរិក និង​រុស្ស៊ី​ក្នុង​អតីត​​​និង​បច្ចុប្បន្ន បានប្រាប់ WSJ ថា Musk បានធ្វើការសន្ទនាបន្ថែមទៀតជាមួយលោក ពូទីន​ និងមន្ត្រីជាន់ខ្ពស់របស់វិមានក្រឹមឡាំង ចាប់តាំងពីចុងឆ្នាំ២០២២​​៕​