វៀតណាម ព្រមានឲ្យពលរដ្ឋត្រៀមជម្លៀស ខណៈព្យុះ ត្រាមី បង្កើនឥទ្ធិពលរឹតខ្លាំង

តាមការចុះផ្សាយរបស់សារព័ត៌មាន Vietnam Plus កាលពីថ្ងៃព្រហស្បតិ៍ទី២៤ខែតុលាឆ្នាំ២០២៤, វៀតណាម បានចេញការព្រមានឲ្យពលរដ្ឋខ្លួន ត្រៀមជម្លៀសនិងត្រូវប្រុងប្រយ័ត្នឲ្យមែនទែនចំពោះព្យុះថ្មីឈ្មោះថា ត្រាមី ខណៈពេលនេះវាកំពុងបង្កើនកម្លាំងដល់កម្រិតទី១០ ដែលអាចនាំមកជាមួយខ្យល់ល្បឿន ១០២គីឡូម៉ែត្រក្នុងមួយម៉ោង ហោះសំដៅទៅឆ្នេរភាគកណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបនាយករដ្ឋមន្ត្រី Tran Hong Ha បានចេញបញ្ជាឲ្យមន្ត្រីពាក់ព័ន្ធ ត្រូវចាត់វិធានការចាំបាច់ទាំងអស់ ដើម្បីកាត់បន្ថយផលប៉ះពាល់ជាពិសេសនៅក្នុងខេត្ត Thanh Hoa, Nghe An, Ha Tinh, Quang Binh, Quang Tri, Thua Thien-Hue, Quang Nam, Quang Ngai, Binh Dinh និង Phu Yen។

ព្យុះទីហ្វុង ត្រាមី កំពុងបង្កើនកម្លាំងរឹតខ្លាំង បន្ទាប់ពីវាយប្រហារកោះ Luzon ក្នុងប្រទេសហ្វីលីពីន ខណៈមជ្ឈមណ្ឌលជាតិសម្រាប់ការព្យាករណ៍ធនធានជលសាស្ត្រវៀតណាម ព្រមានថា ព្យុះនេះ នឹងបោកបក់មកលើភាគកណ្តាលប្រទេសចន្លោះថ្ងៃទី២៧ដល់២៩ខែតុលា។

អាស្រ័យហេតុដូច្នេះហើយ អាជ្ញាធរមូលដ្ឋានបានប្រុងជើងការរួចជាស្រេច ដើម្បីជម្លៀសពលរដ្ឋនិងបានជូនដំណឹងដល់អ្នកនេសាទក៏ដូចជាទេសចរ ផ្អាកធ្វើដំណើរតាមផ្លូវទឹកសិន ដើម្បីសុវត្ថិភាព។

សូមបញ្ជាក់ថា ត្រាមី គឺជាព្យុះទី៦ ដែលកកើតឡើងនៅសមុទ្រចិនខាងត្បូង ចាប់តាំងពីដើមឆ្នាំនេះមក ហើយក្នុងនោះ យ៉ាកជី គឺជាព្យុះដែលមានកម្លាំងខ្លាំងជាងគេ ពេលវាវាយប្រហារខេត្ត Quang Ninh នៅថ្ងៃទី៧ខែកញ្ញា ដោយសម្លាប់មនុស្សរាប់រយនាក់ និងបង្កការខូចខាតផ្នែកសេដ្ឋកិច្ចអស់ទឹកប្រាក់ជាង ៨១ ០០០ពាន់លានដុង៕

អត្ថបទ៖ សុខ សុវណ្ណ

ចុចអាន៖ អ្នក​ស្លាប់​ព្រោះ​ព្យុះ ត្រាមី នៅ​ហ្វីលីពីន កើន​ឡើង​ដល់ ៤០​នាក់​ហើយ