ព័ត៌មានអន្ដរជាតិ

ក្រុមសកម្មប្រយុទ្ធបើកការប្រហារដ៏ខ្លាំងក្លាសម្លាប់ប៉ូលិស១០នាក់នៅប៉ាគីស្ថាន

បានផុស

៥ ខែ មុន

នៅ

ថ្ងៃសុក្រ ២៥ តុលា ២០២៤

ដោយ

ក្រុមសកម្មប្រយុទ្ធប្រដាប់ដោយកាំភ្លើងវែង និងគ្រាប់បែកដៃបានវាយប្រហារប៉ុស្តិ៍ប៉ូលិសមួយនៅភាគពាយព្យប្រទេសប៉ាគីស្ថាន និងបានសម្លាប់ប៉ូលិសចំនួន១០នាក់នៅក្នុងការបាញ់ប្រហារដ៏ខ្លាំងក្លាមួយ។ នេះបើយោងតាមការចេញផ្សាយរបស់ទីភ្នាក់ងារព័ត៌មានAP នៅថ្ងៃទី២៥ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីប៉ូលិសក្នុងតំបន់ បានឲ្យដឹងថា ក្រៅពីប៉ូលិស១០នាក់បានស្លាប់ កងកម្លាំងសន្តិសុខផ្សេងទៀតបានរងរបួសនៅក្នុងការវាយប្រហារពេញ១យប់លើប៉ុស្តិ៍ប៉ូលិសនៅ ស្រុក Dera Ismail Khan ក្នុងខេត្ត Khyber Pakhtunkhwa។ ក្រុមអ្នកវាយប្រហារបានរងរបួស ប៉ុន្តែពួកគេបានរត់គេចខ្លួន មុនពេលនៅពេលដែលអាជ្ញាធរបញ្ជូនកងកម្លាំងទៅដល់។

គ្មាននរណាម្នាក់អះអាងទទួលខុសត្រូវចំពោះការវាយប្រហារនេះទេ ប៉ុន្តែការសង្ស័យទំនងជាធ្លាក់ទៅលើក្រុមតាលីបង់ប៉ាគីស្ថាន ដែលតែងតែកំណត់គោលដៅលើកងកម្លាំងសន្តិសុខទូទាំងប្រទេស ជាពិសេសនៅតំបន់អតីតកុលសម្ព័ន្ធនៅភាគពាយ័ព្យដែលមានកំពុងបញ្ហា។

ក្រោយការវាយប្រហារលើប៉ុស្តិ៍ប៉ូលិសនេះបានកើតឡើងក្នុងរយៈពេល ២៤ ម៉ោងមានប្រតិបត្តិការពីរដាច់ដោយឡែកពីគ្នា របស់កងកម្លាំងសន្តិសុខបានបាញ់សម្លាប់ពួកបះបោរចំនួន ១៩ នាក់នៅ Bajur ស្រុកមួយក្នុង Khyber Pakhtunkhwa និងទីក្រុង Mianwali ដែលជាទីក្រុងមួយនៅភាគខាងកើតខេត្ត Punjab។

គួរបញ្ជាក់ថាថ្មីៗនេះ កងកម្លាំងសន្តិសុខបាននិងកំពុងធ្វើប្រតិបត្តិការដែលមានមូលដ្ឋានលើការស៊ើបការណ៍សម្ងាត់ប្រឆាំងនឹងពួកតាលីបង់ប៉ាគីស្ថាន ដែលត្រូវបានគេស្គាល់ថា Tehrik-e-Taliban Pakistan (TTP)ដែលបានពង្រឹងខ្លួនចាប់តាំងពីពួកតាលីបង់អាហ្វហ្គានីស្ថានបានដណ្តើមអំណាចនៅក្នុងប្រទេសអាហ្វហ្គានីស្ថានក្នុងឆ្នាំ ២០២១ ខណៈTTP គឺជាក្រុមដាច់ដោយឡែកមួយ ប៉ុន្តែជាសម្ព័ន្ធមិត្តជិតស្និទ្ធរបស់ពួកតាលីបង់អាហ្វហ្គានីស្ថាន៕