អ៊ីស្រាអែល សងសឹកអ៊ីរ៉ង់ ហើយ!

តាមការចុះផ្សាយរបស់ BBC នៅថ្ងៃសៅរ៍ទី២៦ខែតុលាឆ្នាំ២០២៤ ពេលនេះ ប្រទេសអ៊ីស្រាអែល បានបើកការវាយប្រហារសងសឹកអ៊ីរ៉ង់ហើយ ដោយផ្តោតសំខាន់ទៅលើគោលដៅយោធារបស់ទីក្រុងតេហេរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងការពារអ៊ីស្រាអែល «IDF» ប្រកាសថា ការបាញ់មីស៊ីលនេះគឺដើម្បីឆ្លើយតបអ៊ីរ៉ង់ ដែលបាននិងកំពុងចូលដៃវាយប្រហារដោយឥតឈប់ឈរលើអ៊ីស្រាអែល ចាប់តាំងពីថ្ងៃទី៧ខែតុលាឆ្នាំ២០២៣មក។ ដូច​ប្រទេស​អធិបតេយ្យ​ដទៃ​ទៀត​ក្នុង​ពិភពលោកដែរ រដ្ឋ​អ៊ីស្រាអែល​មាន​សិទ្ធិ និង​កាតព្វកិច្ច​ក្នុង​ការ​ឆ្លើយ​តប»។ ទន្ទឹមនោះ IDF ក៏បញ្ជាក់ដែរថា ខ្លួនត្រៀមរួចជាស្រេចអស់ហើយ ដើម្បីទទួលការឆ្លើយតប។

ការផ្ទុះដ៏ខ្លាំងជាង១០លើក ត្រូវបានឮនៅក្នុងប្រទេសអ៊ីរ៉ង់ ប៉ុន្តែភ្លាមៗ គេមិនទាន់ដឹងច្បាស់ឡើយថាតើអ៊ីស្រាអែល វាយប្រហារនៅទីតាំងណាខ្លះ។

ជុំវិញបញ្ហានេះ សហរដ្ឋអាមេរិក ដែលជាសម្ព័ន្ធមិត្តអ៊ីស្រាអែល បានចេញមុខបញ្ជាក់ភ្លាមៗថា ខ្លួនមិនមានជាប់ពាក់ព័ន្ធអ្វីសោះឡើយក្នុងការសងសឹកនេះ។

លោក Sean Savett អ្នកនាំពាក្យក្រុមប្រឹក្សាសន្តិសុខជាតិសេតវិមាន បានចេញសេចក្តីថ្លែងការណ៍មួយថា «យើងយល់ថា អ៊ីស្រាអែលកំពុងវាយប្រហារប្រឆាំងគោលដៅយោធាក្នុងប្រទេសអ៊ីរ៉ង់ គ្រាន់ដើម្បីការពារខ្លួននិងឆ្លើយតបទៅការបាញ់មីស៊ីលផ្លោងរបស់អ៊ីរ៉ង់ ប្រឆាំងលើអ៊ីស្រាអែលកាលពីថ្ងៃទី១ខែតុលាប៉ុណ្ណោះ។ យើងនឹងសាកសួររដ្ឋាភិបាលអ៊ីស្រាអែល សម្រាប់ព័ត៌មានបន្ថែមស្តីពីប្រតិបត្តិការរបស់ពួកគេ»។

សូមបញ្ជាក់ជាថ្មី កាលពីថ្ងៃទី១ខែតុលា អ៊ីរ៉ង់បានបាញ់មីស៊ីលប្រហែល២០០គ្រាប់ ស្រោចលើអ៊ីស្រាអែល ដើម្បីសងសឹកចំពោះការធ្វើឃាតមេដឹកនាំក្រុមហាម៉ាស Ismail Haniyeh, មេដឹកនាំក្រុមហេសបូឡា Hassan Nasrallah និងមេបញ្ជាការកងឆ្មាំបដិវត្តន៍ឥស្លាមអ៊ីរ៉ង់ Abbas Nilforoushan ហើយនោះគឺជាលើកទីពីរ ដែលអ៊ីរ៉ង់វាយប្រហារដោយផ្ទាល់លើទឹកដីអ៊ីស្រាអែល ក្នុងរយៈពេលប្រាំមួយខែ បន្ទាប់ពីការបាញ់មីស៊ីលរាប់រយគ្រាប់និងដ្រូនរាប់រយគ្រឿងកាលពីខែមេសា។

ក្រោយមក​អ៊ីស្រាអែលក៏គំរាមវិញ ដោយរដ្ឋមន្ត្រីការពារជាតិ Yoav Gallant បានព្រមានថា ការសងសឹករបស់ទីក្រុង Tel Aviv ទៅលើអ៊ីរ៉ង់ នឹងកាចសាហាវ ហើយធ្វើឲ្យគ្រប់គ្នាភ្ញាក់ផ្អើល៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល ព្រមានថា គ្រប់គ្នាភ្ញាក់ផ្អើលមិនខាន ពេលឃើញការសងសឹករបស់ខ្លួន លើអ៊ីរ៉ង់