គណបក្សសាធារណរដ្ឋ រៀបផែនការរួចហើយ ពីអ្វីដែល ត្រាំ ត្រូវធ្វើ ពេលឡើងកាន់តំណែង ១០០ថ្ងៃដំបូង

មន្ត្រីថ្នាក់ខ្ពស់ក្នុងគណបក្សសាធារណរដ្ឋ បានរៀបចំផែនការនិងដាក់ចេញរបៀបវារៈរួចហើយអំពីថាតើ លោក ដូណាល់​ ត្រាំ នឹងត្រូវធ្វើអ្វីខ្លះក្នុងរយៈពេល១០០ថ្ងៃដំបូងនៃការឡើងកាន់តំណែងអាណត្តិថ្មី ប្រសិនបើគាត់ឈ្នះឆ្នោតក្លាយជាប្រធានាធិបតីអាមេរិកម្តងទៀត ត្បិតបច្ចុប្បន្ន ការស្ទាបស្ទង់មតិបង្ហាញលទ្ធផលថា គាត់និងលោកស្រី កាម៉ាឡា ហារីស នៅខាងគណបក្សប្រជាធិបតេយ្យឯណោះ កំពុងមានសំឡេងគាំទ្រប្រកៀកប្រកិតគ្នាក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់សារព័ត៌មាន The Hill កាលពីថ្ងៃអាទិត្យទី២៧ខែតុលាឆ្នាំ២០២៤, មេដឹកនាំសំឡេងភាគតិចនៃព្រឹទ្ធសភា លោក Mitch McConnell, ប្រធានរដ្ឋសភា Mike Johnson និងមេដឹកនាំសំឡេងភាគច្រើននៃរដ្ឋសភាលោក Steve Scalise បានរៀបរៀងអំពីគោលដៅកំពូលៗសម្រាប់រដ្ឋបាលលោក ត្រាំ រួចហើយ ក្នុងគោលបំណងធានាឲ្យមានការឯកភាពពីសមាជិកបក្សសាធារណរដ្ឋនៅក្នុងសេតវិមាន ក្រោយការបោះឆ្នោតខែវិច្ឆិកា ហើយអាទិភាពកំពូលនោះគឺ នាំសេដ្ឋកិច្ចអាមេរិកវិលត្រលប់មករកផ្លូវត្រូវវិញ និងពង្រឹងផ្នែកការពារព្រំដែន។

របៀបវារៈសំខាន់បំផុត គឺគណបក្សសាធារណរដ្ឋ នឹងផ្តល់មូលនិធិសម្រាប់គំនិតផ្តួចផ្តើមសន្តិសុខព្រំដែនថ្មី ដោយក្នុងនោះនឹងសម្រេចផែនការសាងសង់ជញ្ជាំងព្រំដែនតាមបំណងបស់លោក ត្រាំ ក៏ដូចជាកាត់បន្ថយការជះថវិកាឥតប្រយោជន៍មួយចំនួន ដែលធ្លាប់តែអនុវត្តនៅក្រោមការដឹកនាំរបស់លោក ចូ បៃដិន ផងដែរ។

អាទិភាពមួយទៀតគឺការកាត់បន្ថយពន្ធ ហើយលើសពីនេះ គណបក្សសាធារណរដ្ឋក៏កំពុងរៀបចំកញ្ចប់ថវិកាដ៏មានមហិច្ឆតាបំផុតតាមដែលអាចធ្វើទៅបាន ក្នុងឆ្នាំដំបូងនៃអាណត្តិទីពីររបស់លោក ត្រាំ ផងដែរ។

យ៉ាងណាក្តី ទាំងនេះគ្រាន់តែជាផែនការប៉ុណ្ណោះ ខណៈអ្វីៗគ្រប់យ៉ាងគឺត្រូវពឹងផ្អែកលើលទ្ធផលនៃការបោះឆ្នោតថ្ងៃទី៥ខែវិច្ឆិកា ក៏ដូចជាលទ្ធភាពរបស់គណបក្សសាធារណរដ្ឋ ក្នុងការក្តាប់យកកៅអីសភាទាំងពីរបានប៉ុន្មានសំឡេង៕

អត្ថបទ៖ សុខ សុវណ្ណ

ចុចអាន៖ ត្រាំ សន្យាឈប់បញ្ជូនទ័ពអាមេរិក ទៅប្រយុទ្ធក្នុងសង្គ្រាមនៅបរទេស