ព័ត៌មានអន្ដរជាតិ

លោក បៃដិន ថា សង្គ្រាមនៅហ្គាហ្សាគួរតែបញ្ចប់ ខណៈតួលេខអ្នកស្លាប់លើសពី ៤៣ ០០០នាក់ហើយ

បានផុស

៣ ខែ មុន

នៅ

ថ្ងៃអង្គារ ២៩ តុលា ២០២៤

ដោយ

Chheang

ប្រធានាធិបតីអាមេរិកលោក ចូ បៃដិន (Joe Biden) បាននិយាយកាលពីថ្ងៃចន្ទថា សង្គ្រាមរបស់អ៊ីស្រាអែលលើតំបន់ហ្គាហ្សាស្ទ្រីប «គួរតែបញ្ចប់» ខណៈដែលចំនួនអ្នកស្លាប់របស់ប៉ាឡេស្ទីននៅក្នុងសង្គ្រាមនេះបានកើនឡើងដល់ ៤៣ ០០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន បានប្រាប់ថា៖ «យើងត្រូវការបទឈប់បាញ់មួយ។ សង្រ្គាមនេះគួរតែបញ្ចប់» ដោយបន្ថែមថា លោកនឹងធ្វើការអំពាវនាវឲ្យមានការ «តាមដាន» លើកិច្ចខិតខំប្រឹងប្រែងបទឈប់បាញ់ជាបន្តបន្ទាប់ទៀត។

ការលើកឡើងរបស់ប្រធានាធិបតីអាមេរិក ធ្វើឡើងក្រោយអាជ្ញាធរសុខាភិបាលក្នុងតំបន់ហ្គាហ្សាបានប្រកាសកាលពីថ្ងៃទី២៨ខែតុលាថា ចំនួនអ្នកស្លាប់ដែលត្រូវបានបញ្ជាក់នៅក្នុងតំបន់ហ្គាហ្សាបានកើនឡើងលើសពី ៤៣ ០០០នាក់ ខណៈដែលជាង ១០១ ០០០នាក់ផ្សេងទៀតបានរងរបួស។ អ្នកស្លាប់ភាគច្រើនជាស្ត្រី និងកុមារ។

សង្គ្រាមរបស់អ៊ីស្រាអែលលើតំបន់ហ្គាហ្សា បានធ្វើឲ្យជនស៊ីវិលស្ទើរតែអស់នៅហ្គាហ្សាត្រូវជម្លៀសខ្លួន ព្រមទាំងមានការរាំងខ្ទប់ដែលនាំឲ្យមានកង្វះខាតអាហារ ទឹកស្អាត និងថ្នាំពេទ្យយ៉ាងធ្ងន់ធ្ងរ។

កិច្ចខិតខំប្រឹងប្រែងសម្របសម្រួលដែលដឹកនាំដោយសហរដ្ឋអាមេរិក អេហ្ស៊ីប និងកាតា ដើម្បីឈានដល់កិច្ចព្រមព្រៀងបទឈប់បាញ់ និងកិច្ចព្រមព្រៀងផ្លាស់ប្តូរអ្នកទោសរវាងអ៊ីស្រាអែល និងក្រុមហាម៉ាស បានបរាជ័យជុំវិញការបដិសេធរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ក្នុងការបញ្ឈប់សង្រ្គាម។

អ៊ីស្រាអែលក៏ប្រឈមមុខនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិចំពោះសកម្មភាពរបស់ខ្លួននៅហ្គាហ្សាផងដែរ៕

ដោយ៖ ឈាង