ព័ត៌មានអន្ដរជាតិ

ប្រធានាធិបតីប្រទេសឆាដ៖ការវាយប្រហារលើមូលដ្ឋានយោធាសម្លាប់ទាហាន៤០នាក់

បានផុស

៤ ខែ មុន

នៅ

ថ្ងៃអង្គារ ២៩ តុលា ២០២៤

ដោយ

ប្រធានាធិបតីរបស់ប្រទេសឆាដនៅទ្វីបអាហ្រ្វិកបានឲ្យដឹងថា ក្រុមអ្នកវាយប្រហារដែលមិនស្គាល់អត្តសញ្ញាណបានសម្លាប់ទាហានយ៉ាងហោចណាស់៤០នាក់ក្នុងអំឡុងពេលការវាយប្រហារពេញមួយយប់លើមូលដ្ឋានយោធាមួយនៅភាគខាងលិចរបស់ប្រទេស។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៩ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីប្រទេសឆាដ លោក Mahamat Deby Itno បានទៅត្រួតពិនិត្យមូលដ្ឋាននៅ Barkaram ដែលជាកោះមួយក្នុងតំបន់បឹង Chad ហើយបានប្រកាសពីការចាប់ផ្តើមប្រតិបត្តិការយោធា ដើម្បីតាមដានក្រុមអ្នកវាយប្រហារ ដែលសម្លាប់ទាហាយ៉ាងរង្គាលនេះ។

ភ្លាមៗនោះ គេមិនទាន់ដឹងថា នរណាជាអ្នកនៅពីក្រោយការវាយប្រហារចុងក្រោយនេះទេ ប៉ុន្តែការវាយប្រហារពីមុនៗ នៅក្នុងតំបន់ត្រូវបានស្តីបន្ទោសដោយរដ្ឋាភិបាលទៅលើក្រុមសកម្មប្រយុទ្ធបូកូហារ៉ាម(Boko Haram)។

គួរបញ្ជាក់ថា ប្រទេសឆាដបានប្រយុទ្ធជាយូរមកហើយជាមួយនឹងការបះបោរនៅភាគខាងលិចរបស់ប្រទេសនៅជិតព្រំដែនជាមួយនីហ្សេរីយ៉ា។ ក្រុម Boko Haram ដែលបានចាប់ផ្តើមការបះបោរជាងមួយទសវត្សរ៍មុនប្រឆាំងនឹងការអប់រំលោកខាងលិច ស្វែងរកការបង្កើតច្បាប់អ៊ីស្លាមនៅភាគឦសាននៃប្រទេសនីហ្សេរីយ៉ាដោយខ្លួនឯង។

ការបះនេះបោរបានរាលដាលដល់ប្រទេសជិតខាងនៅអាហ្វ្រិកខាងលិចដែលរួមមានកាមេរូន នីហ្សេរីយ៉ា និងឆាដ។ ប្រជាពលរដ្ឋជាច្រើនបានភៀសខ្លួនចេញពីផ្ទះរបស់ពួកគេ ដើម្បីគេចពីក្រុមបូកូហារ៉ាម។ យ៉ាងណាមិញប្រជាជននីហ្សេរីយ៉ាកំពុងតាំងលំនៅពួកគេឡើងវិញទោះបីជាមានការភ័យខ្លាចក៏ដោយ។

ប្រទេសឆាដ ដែលជាប្រទេសមានប្រជាជនជិត១៨លាននាក់ បាននិងកំពុងវិលវល់ពីភាពចលាចលនយោបាយកាលពីមុន និងក្រោយការបោះឆ្នោតប្រធានាធិបតីដ៏ចម្រូងចម្រាស ដែលនាំឱ្យលោក Deby Itno ទទួលជ័យជម្នះ។ លោកបានបន្តដឹកនាំប្រទេសក្នុងនាមជាប្រធានាធិបតីបណ្ដោះអាសន្នក្នុងអំឡុងពេលការគ្រប់គ្រងដោយយោធាបន្ទាប់ពីឪពុករបស់លោកក្នុងឆ្នាំ ២០២១៕