ព័ត៌មានអន្ដរជាតិ

ស៊ុយអែតវិភាជថវិកាជាតិ២០លានអឺរ៉ូបន្ថែមឱ្យឧស្សាហកម្មផលិតអាវុធអ៊ុយក្រែន

បានផុស

៣ ខែ មុន

នៅ

ថ្ងៃអង្គារ ២៩ តុលា ២០២៤

ដោយ

រដ្ឋាភិបាលស៊ុយអែតដែលទើបចូលជាសមាជិកអង្គការប្រដាប់អាវុធណាតូកាលដើមឆ្នាំ២០២៤ បន្ទាប់ពីការភ័យខ្លាចរុស្ស៊ីឈ្លានពានដូចអ៊ុយក្រែនដែរ នឹងវិភាជទឹកប្រាក់របស់រដ្ឋចំនួន២០លានអឺរ៉ូ (ជាង២១លានដុល្លារ)សម្រាប់ការទិញឧបករណ៍ការពារជាតិសម្រាប់ផ្តល់់ដល់ឧស្សាហកម្មផលិតអាវុធនៃប្រទេសអ៊ុយក្រែន។ ស៊ុយអែតបានផ្តល់ថវិកាជំនួយដល់អ៊ុយក្រែនជាង៥ពាន់លានដុល្លាររហូតដល់ពេលនេះ។

យោធាអ៊ុយក្រែនឈរបញ្ជាការប្រយុទ្ធនៅសមរភូមិតំបន់ Kursk ក្នុងប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេហទំព័ររដ្ឋាភិបាលបាននិយាយថា អាជ្ញាធរស៊ុយអែតបានណែនាំរួចរាល់ហើយ ដល់ទីភ្នាក់ងារពាក់ព័ន្ធឱ្យចរចា និងបញ្ចប់កិច្ចព្រមព្រៀងជាមួយប្រទេសដាណឺម៉ាក លើការបែងចែកថវិកាចំនួន២០លានអឺរ៉ូ សម្រាប់ការទិញឧបករណ៍ជំនួយយោធាតាមឧស្សាហកម្មការពារជាតិអ៊ុយក្រែនសម្រាប់ផ្ទេរទៅទីក្រុងកៀវ។

សេចក្តីប្រកាសព័ត៌មានបាននិយាយថា «តាមរយៈការបង្កើនផលិតកម្មនៅក្នុងប្រទេសអ៊ុយក្រែន មូលដ្ឋានឧស្សាហកម្មការពារជាតិអឺរ៉ុបទាំងមូលត្រូវបានពង្រឹង»។

យោងតាមអាជ្ញាធរស៊ុយអែត ទឹកប្រាក់ចំនួន៤៣លានអឺរ៉ូផ្សេងទៀតនឹងទៅដល់«គំនិតផ្តួចផ្តើមពហុភាគីដែលបានបង្កើតឡើងជាច្រើនក្នុងគោលបំណងផ្តល់ការគាំទ្រយ៉ាងឆាប់រហ័ស និងមានប្រសិទ្ធភាពដល់កងកម្លាំងប្រដាប់អាវុធអ៊ុយក្រែន»។

ជាឧទាហរណ៍ ប្រទេសស៊ុយអែតមានបំណងចូលរួមចំណែកដល់មូលនិធិណាតូ-អ៊ុយក្រែន សម្រាប់ការទិញឧបករណ៍យោធា រួមទាំងមីស៊ីលសម្រាប់យន្តហោះចម្បាំង F-16 ការហ្វឹកហាត់សម្រាប់កងទ័ពជើងទឹករបស់ប្រទេស ឬការបោសសម្អាតមីន។

យោងតាមទិន្នន័យរបស់រដ្ឋាភិបាល ប្រទេសស៊ុយអែតបានបែងចែកជំនួយចំនួន ៥៧,៤ ពាន់លានក្រូន(ជិត៥,៤ពាន់លានដុល្លារ) ដល់អ៊ុយក្រែនចាប់តាំងពីខែកុម្ភៈឆ្នាំ២០២២ដែលក្នុងនោះ៤៨,៤ពាន់លានក្រូន(៤,៥ពាន់លានដុល្លារ) ជាជំនួយផ្នែកយោធា។

កន្លងមករដ្ឋាភិបាលអ៊ុយក្រែនបានស្នើឱ្យអន្តរជាតិបង្កើនការផ្តល់ជំនួយដល់ខ្លួន ជាពិសេសជំនួយយោធាដើម្បីឲ្យខ្លួនអាចប្រយុទ្ធជាមួយរុស្ស៊ី ឱ្យបានជ័យជម្នះ។ ជំនួយយោធាដែលអ៊ុយក្រែនចង់បានបំផុតគឺ កាំជ្រូចផ្លោងរយៈចម្ងាយឆ្ងាយដែលអាចបាញ់ចូលជ្រៅទៅក្នុងប្រទេសរុស្ស៊ី៕