ព័ត៌មានអន្ដរជាតិ

ចិន ជោគជ័យបញ្ជូនអវកាសយានិកក្មេងបំផុតទៅ ស្ថានីយអវកាស

បានផុស

២ ខែ មុន

នៅ

ថ្ងៃពុធ ៣០ តុលា ២០២៤

ដោយ

នៅទីបំផុត ប្រទេសចិន បានទទួលជោគជ័យក្នុងការបញ្ជូន អវកាសយានិកចំនួន៣នាក់ទៅកាន់ស្ថានីយអវកាស Tiangong របស់ខ្លួន ដើម្បីបំពេញបេសកកម្មរយៈពេលប្រាំមួយខែ ដោយក្នុងនោះមាន២នាក់ ជាអវកាសយានិកវ័យក្មេងបំផុតដែលចិនមិនធ្លាប់បញ្ជូនទៅសោះ។

យានអវកាស Shenzhou-19 ត្រូវបាញ់បង្ហោះ (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, យានអវកាស Shenzhou-19 ភ្ជាប់ជាមួយរ៉ុកកែត Long March-2F បានបាញ់បង្ហោះនៅម៉ោង៤និង២៧នាទីព្រឹកថ្ងៃពុធទី៣០ខែតុលាឆ្នាំ២០២៤ ចេញពីមជ្ឈមណ្ឌលបាញ់បង្ហោះផ្កាយរណប Jiuquan ក្នុងតំបន់ Inner Mongolia នៃខេត្ត Gansu។

អវកាសយានិកវ័យក្មេងបំផុត២នាក់ក្នុងយានអវកាសនោះ គឺ Song Lingdong អាយុ៣៤ឆ្នាំជាអតីតអ្នកបើកយន្តហោះឲ្យកងទ័ពអាកាស និង Wang Haoze អាយុ៣៤ឆ្នាំដូចគ្នា ជាវិស្វករយានអវកាស។ ចំណែកម្នាក់ទៀតនៅក្នុងនោះដែរ គឺមេបញ្ជាការ Cai Xuzhe ដែលធ្លាប់ត្រូវបានបញ្ជូនទៅបំពេញបេសកកម្ម Shenzhou-14។

(រាប់ពីឆ្វេងទៅស្តាំ) Wang Haoze, Song Lingdong និង Cai Xuzhe មុនពេលបាញ់បង្ហោះ (រូបថត៖ EFE)

ក្រុមអវកាសយានិក Shenzhou-19 នឹងចូលបន្តវេនពីក្រុមបច្ចុប្បន្នដែលមាន Ye Guangfu, Li Cong និង Li Guangsu ពីបេសកកម្ម Shenzhou-18។

ក្រុមថ្មីនេះនឹងធ្វើការពិសោធន៍ចំនួន៨៦លើកនៅក្នុងលំហ ដោយផ្តោតជាពិសេសលើវិទ្យាសាស្ត្រជីវសាស្ត្រនិងរូបវិទ្យា។ ពួកគេនឹងដំឡើងឧបករណ៍ប្រឆាំងបំណែកនៅលំហអវកាស គ្រប់គ្រងប្រតិបត្តិការនៅស្ថានីយ៍ ដើរក្នុងលំហរអាកាស និងរៀបចំឧបករណ៍នានា។

សូមបញ្ជាក់ថា ស្ថានីយអវកាស Tiangong ត្រូវសាងសង់ដោយប្រទេសចិនសុទ្ធសាធ ហើយនឹងដំណើរការយ៉ាងហោចណាស់មួយទសវត្សរ៍ទៀត៕

អត្ថបទ៖ សុខ សុវណ្ណ

ចុចអាន៖ អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ