ព័ត៌មានអន្ដរជាតិ

លោក ចូ បៃដិន ប្រៀបធៀបអ្នកគាំទ្រត្រាំ ដូចនឹងសំរាមអណ្តែតទឹក

បានផុស

២១ វិនាទី មុន

នៅ

ថ្ងៃព្រហស្បតិ៍ ៣១ តុលា ២០២៤

ដោយ

លោកប្រធានាធិបតី ចូ បៃដិន ថ្មីៗនេះបានវាយបកប្រឆាំងនឹងអ្នកគាំទ្ររបស់លោក ដូណាល់ ត្រាំ ខណៈដែលលោកបានប្រតិកម្មទៅនឹងការជួបជុំចុងសប្តាហ៍របស់បេក្ខជនប្រធានាធិបតីមកពីគណបក្សសាធារណរដ្ឋនៅ Madison Square Garden ដែលត្រូវបានគ្របដណ្ដប់ដោយវោហាសាស្ត្រដ៏ឃោរឃៅ និងប្រកាន់ពូជសាសន៍។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៣០ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការអំពាវនាវដែលរៀបចំឡើងដោយក្រុមតស៊ូមតិនិយាយភាសាអេស្ប៉ាញ Voto Latino លោក បៃ ដិន បានឆ្លើយតបទៅនឹងរឿងកំប្លែងមួយនៅឯការជួបជុំរបស់លោកត្រាំ ដែលបានហៅព័រតូរីកូថាជា «កោះអណ្តែតទឹក»។

លោកបៃដិនបាននិយាយថា «កាលពីថ្ងៃមុននេះ វាគ្មិននៅឯការប្រមូលផ្តុំរបស់ត្រាំបានហៅព័រតូរីកូថា ជាកោះសំរាមអណ្តែតទឹក ខ្ញុំសូមប្រាប់អ្នកពីរឿងមួយ ខ្ញុំមិនយល់ទេ «ព័រតូរីកូ»ដែលខ្ញុំស្គាល់នៅជាមួយខ្ញុំ ពួកគេជាមនុស្សល្អ មានកិត្តិយសសមរម្យ»។ បន្ទាប់មក លោកប្រធានាធិបតី បានបន្ថែមថា៖«សំរាមតែមួយគត់ដែលខ្ញុំឃើញអណ្តែតនៅទីនោះ គឺអ្នកគាំទ្ររបស់លោកត្រាំ។ អ្វីដែលត្រាំធ្វើវាមិនមែនជាជនជាតិអាមេរិកទេ វាផ្ទុយស្រឡះពីអ្វីគ្រប់យ៉ាងដែលយើងបានធ្វើ »។

អ្នកនាំពាក្យសេតវិមាន លោក Andrew Bates បាននិយាយថា លោក Biden បានសំដៅទៅលើវោហាសាស្ត្រដ៏គួរឱ្យស្អប់ខ្ពើមនៅឯការជួបជុំ Madison Square Garden ថាជា «សំរាម»។ បន្ទាប់មក លោក បៃដិន បានចូលប្រព័ន្ធផ្សព្វផ្សាយសង្គម ដើម្បីបញ្ជាក់ដោយផ្ទាល់នូវអ្វីដែលលោកបាននិយាយ។

លោកបានបង្ហោះនៅលើ X ថា«ខ្ញុំបានសំដៅទៅលើវោហាសាស្ត្រដ៏គួរឱ្យស្អប់ខ្ពើមអំពី «ព័រតូរីកូ» ដែលនិយាយដោយអ្នកគាំទ្ររបស់លោកត្រាំ នៅឯការជួបជុំ Madison Square Garden របស់ត្រាំថាជាសំរាម ខណៈការលើកឡើងក្នុងការជួបជុំនោះមិនឆ្លុះបញ្ចាំងថាយើងជានរណាក្នុងនាមជាប្រជាជាតិមួយនោះទេ»។

ទោះជាយ៉ាងណាក៏ដោយ ក្នុងការសំដៅលើអ្នកគាំទ្ររបស់លោក ត្រាំ ថា ជា«សំរាម»សម្លេងរបស់ បៃដិន មានភាពផ្ទុយគ្នាជាមួយនឹងសារដែលបេក្ខជនមកពីគណបក្សប្រជាធិបតេយ្យ កាម៉ាឡា ហារីសកំពុងស្វែងរកដើម្បីបង្ហាញ ខណៈដែលលោកស្រីមានបំណងធ្វើការអំពាវនាវយ៉ាងទូលំទូលាយ រួមទាំងចំពោះសមាជិកគណបក្សសាធារណរដ្ឋដែលរងការប៉ះពាល់។

ភ្លាមៗបន្ទាប់ពីការអត្ថាធិប្បាយរបស់លោក បៃដិន លោកស្រី ហារីស បាននិយាយចេញពី Ellipse ក្នុងទីក្រុង Washington ដោយប្តេជ្ញាថានឹងធ្វើជាប្រធានាធិបតីដែលនឹងបង្រួបបង្រួមប្រទេស។

ទាក់ទងបញ្ហានេះអ្នកនាំពាក្យយុទ្ធនាការលោកត្រាំ លោក Karoline Leavitt បាននិយាយនៅក្នុងសេចក្តីថ្លែងការណ៍ជាបន្តបន្ទាប់ថា «មិនមានវិធីដើម្បីបង្វិលវាទេលោក បៃដិន និងលោកស្រី ហារីស មិនគ្រាន់តែស្អប់ប្រធានាធិបតី ត្រាំ ទេ ពួកគេមើលងាយជនជាតិអាមេរិករាប់សិបលាននាក់ដែលគាំទ្រគាត់» ។

ខណៈដែលប្រតិកម្មទៅនឹងប្រតិកម្មរបស់លោក បៃដិន បានចាប់ផ្តើមហោះហើរ ទន្ទឹមនឹងនោះលោក ត្រាំ ត្រូវបានសួរនៅក្នុងបទសម្ភាសន៍មួយកាលពីយប់ថ្ងៃអង្គារជាមួយប៉ុស្តិ៍ Fox News អំពីការរើសអើងជាតិសាសន៍ និងពាក្យជេរប្រមាថនៅឯការជួបជុំនៅទីក្រុងញូវយ៉ករបស់គាត់។ គាត់បានឆ្លើយតបថា៖ «មានអ្នកខ្លះនិយាយកំប្លែងពីអ្វីដែលលោកបាននិយាយលេងអំពីព័រតូរីកូ ហើយខ្ញុំមិនដឹងថាគាត់ជានរណាទេ»។ អតីតប្រធានាធិបតីរូបនេះបានបន្ថែមថា «ខ្ញុំមិននឹកស្មានថាវាជារឿងធំទេ»។

គួរបញ្ជាក់ថាការបោះឆ្នោតប្រធានាធិបតីនឹងខិតជិតមកដល់នាថ្ងៃទី០៥ខែតុលានេះហើយ ខណៈបេក្ខភាពម្នាក់ៗព្យាយាមទាក់ទាញប្រជាប្រិយភាពរៀងៗខ្លួនតាមរដ្ឋនីមួយៗ ហើយសកម្មភាពឬក៏ពាក្យសម្ដីរបស់បេក្ខភាពទាំងពីរនេះតែងតែត្រូវបានលើកយកមកជជែកវែកញែក ក្នុងន័យផ្សេងៗទៅតាមការគាំទ្ររបស់បក្សនីមួយៗ៕