ព័ត៌មានអន្ដរជាតិ

កូរ៉េខាងត្បូង ត្រៀមលុយជិត ៥ពាន់លានដុល្លារជួយប្រជាជនចិញ្ចឹមកូន

បានផុស

២៥ វិនាទី មុន

នៅ

ថ្ងៃពុធ ៣០ តុលា ២០២៤

ដោយ

Chheang

ប្រទេសកូរ៉េខាងត្បូង នឹងចំណាយប្រាក់រហូតដល់ ៦,៧ទ្រីលានវ៉ុន ឬស្មើនឹង ៤,៨ពាន់លានដុល្លារ ចន្លោះពីឆ្នាំ២០២៥ដល់ឆ្នាំ២០២៦ ដើម្បីជំរុញឲ្យប្រជាជនពលរដ្ឋរបស់ខ្លួនយកកូន។ កញ្ចប់ថវិកានេះ ត្រូវបានប្រកាសដោយរដ្ឋាភិបាលក្រុងសេអ៊ូលកាលពីថ្ងៃទី២៩ខែតុលាឆ្នាំ២០២៤ ហើយវាជាការពង្រីកបន្ថែមនូវគម្រោងលើកទឹកចិត្តដល់អត្រាកំណើតថ្មី ដែលដាក់ចេញកាលពីខែកុម្ភៈកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតផ្តួចផ្ដើមសំខាន់នៃកញ្ចប់ថវិកានេះ មានគោលបំណងគាំទ្រគូស្វាមីភរិយាថ្មីថ្មោង និងលើកទឹកចិត្តប្ដីប្រពន្ធដែលមិនទាន់មានផ្ទះស្នាក់នៅ។ ចាប់ពីខែមករាឆ្នាំ២០២៥ ក្រុងសេអ៊ូលនឹងផ្ដល់ឲ្យក្រុមគ្រួសារដែលទើបមានកូន តែគ្មានផ្ទះ នូវប្រាក់ឧបត្ថម្ភកន្លែងស្នាក់នៅចំនួនសរុប ៧២ម៉ឺនវ៉ុនក្នុងរយៈពេល២ឆ្នាំ ឬក៏ ៣ម៉ឺនវ៉ុនជារៀងរាល់ខែ។

ប្រាក់ឧបត្ថម្ភនេះ ត្រូវបានបង្កើតឡើងដើម្បីជួយសម្រាលបញ្ហាហិរញ្ញវត្ថុ ដែលទំនងជាបញ្ហារាំងស្ទះដល់ក្រុមគ្រួសារមួយចំនួនពីការយកកូន។ សម្រាប់ឆ្នាំដំបូងនៃការអនុវត្ត គម្រោងប្រាក់លើកទឹកចិត្ត នឹងជួយដល់ក្រុមគ្រួសារចំនួន ១ ៣៨០គ្រួសារ ហើយនឹងពង្រីកឲ្យបានដល់ ៤ ១៤០គ្រួសារនៅដើមឆ្នាំ២០២៦។

ក្រុងសេអ៊ូល ក៏នឹងបង្កើនការកំណត់ប្រាក់កម្ចីសម្រាប់ប្ដីប្រពន្ធថ្មីថ្មោងផងដែរពី ២០០លានវ៉ុន ឡើងដល់ ៣០០លានវ៉ុន ហើយផ្ដល់ជូនការគាំទ្រអត្រាការប្រាក់ចំនួន ១០ឆ្នាំ។

សូមបញ្ជាក់ថា អត្រាកំណើតនៅកូរ៉េខាងត្បូង បានធ្លាក់ចុះយ៉ាងគំហុកនៅក្នុងឆ្នាំ២០២៣ ដែលកត្តានេះបានក្លាយជានិន្នាការប៉ះពាល់ដល់ប្រជាសាស្ត្រជាតិជាសកល។ វិបត្តិប្រជាសាស្ត្រនេះ ផ្ដើមចេញពីកត្តាជាច្រើន ប៉ុន្តែកត្តាចម្បងៗដែលរកឃើញមានចំនួន២ គឺពាក់ព័ន្ធនឹងបញ្ហាលុយកាក់ និងការប៉ះពាល់ដល់គុណភាពជីវិតក្នុងភាពជាដៃគូ៕

ដោយ៖ ឈាង

Related Topics:ប្រទេសកូរ៉េខាងត្បូង