មួយថ្ងៃ ហ្វីលីពីន រកឃើញអ្នកឆ្លងកូវីដ៣,៧៤៩ករណី មិនធ្លាប់មានសោះក្នុងរយៈពេលជិត៦ខែ

កាលពីថ្ងៃព្រហស្បតិ៍ទី១១ខែមីនា ក្រសួងសុខាភិបាលហ្វីលីពីន បានកត់ត្រាការឆ្លងជំងឺកូវីដ១៩ថ្មីចំនួន៣,៧៤៩ករណីហើយមានអ្នកស្លាប់៦៣នាក់។ នេះជាតួលេខប្រចាំថ្ងៃខ្ពស់បំផុតក្នុងរយៈពេលជិត៦ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយថា ករណីសរុបបានកើនឡើងដល់៦០៧,០៤៨ករណី ខណៈការស្លាប់កើនដល់១២,៦០៨នាក់។ អាជ្ញាធរបានព្រមានសាធារណជនកុំឲ្យមានការព្រួយបារម្ភ ហើយត្រូវអនុវត្តវិធានការគម្លាតសង្គម ដើម្បីចៀសវាងការរីករាលដាលនៃវីរុសបន្ថែមទៀត។

ប្រទេសហ្វីលីពីន បានចាប់ផ្តើមយុទ្ធនាការចាក់វ៉ាក់សាំងរបស់ខ្លួនកាលពីថ្ងៃទី១ខែមីនា ដោយលោកប្រធានាធិបតី Rodrigo Duterte, មន្រ្តីខុទ្ទកាល័យ, បុគ្គលិកសុខាភិបាល, យោធានិងប៉ូលិស ស្ថិតក្នុងចំណោមអ្នកដែលត្រូវចាក់វ៉ាក់សាំងដំបូងនៅមន្ទីរពេទ្យចំនួន៦ ក្នុងទីក្រុង ម៉ានីល។

ក្នុងនាមជាប្រទេសមានអ្នកឆ្លង និងស្លាប់ដោយសារកូវីដខ្ពស់បំផុតលំដាប់ទី២នៅអាស៊ីអាគ្នេយ៍, ហ្វីលីពីនបានដាក់ចេញនូវវិធានការរឹតត្បិតយ៉ាងតឹងរ៉ឹងនៅក្នុងទីក្រុងម៉ានីល និងខេត្តនានា។ ការរឹតត្បិតនេះបានជះឥទ្ធិពលដល់សេដ្ឋកិច្ចរបស់ប្រទេស ដែលធ្លាប់តែមានសេដ្ឋកិច្ចរីកចម្រើនលឿនបំផុតមួយនៅអាស៊ី មុនពេលរោគរាតត្បាតផ្ទុះឡើង។

អ្នកនាំពាក្យលោក Harry Roque បាននិយាយនៅក្នុងសេចក្តីថ្លែងការណ៍មួយកាលពីខែមុនថា ការហាមឃាត់នឹងបន្តរយៈពេលមួយខែទៀតក្នុងទីក្រុងម៉ានីល ដែលទីក្រុងនេះរួមចំណែក៤០ភាគរយនៃផលិតផលសេដ្ឋកិច្ចជាតិ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ វីរុសបម្លែងខ្លួនប្រភេទថ្មីសាហាវជាងកូវីដ ផ្ទុះការចម្លងក្នុងសហគមន៍ ហ្វីលីពីន

ចុចអាន៖ វ៉ាក់សាំង Novavax មានប្រសិទ្ធភាពសឹង១០០ភាគរយប្រឆាំងកូវីដ និង៨៦ភាគរយប្រឆាំងវីរុសបំប្លែងខ្លួន