ព័ត៌មានអន្ដរជាតិ

អ៊ុយក្រែនតវ៉ាទៅក្រុមប្រឹក្សាសន្តិសុខអង្គការសហប្រជាជាតិ រឿងកូរ៉េខាងជើងបញ្ជូនទ័ពទៅរុស្ស៊ី

បានផុស

៥ ខែ មុន

នៅ

ថ្ងៃព្រហស្បតិ៍ ៣១ តុលា ២០២៤

ដោយ

អ៊ុយក្រែនថា ឧត្តមសេនីយកូរ៉េខាងជើងបីរូបកំពុងដឹកនាំអមដំណើរកងទ័ពប្រជាជនកូរ៉េ(KPA)រាប់ពាន់នាក់ ដែលត្រូវបានដាក់ពង្រាយទៅកាន់ប្រទេសរុស្ស៊ី ដើម្បីជួយដល់សង្រ្គាមរបស់ទីក្រុងម៉ូស្គូនៅអ៊ុយក្រែន។ នេះយោងតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រដែលដកស្រង់ប្រភពពីរដ្ឋាភិបាលអ៊ុយក្រែន។

លោក គឹម ជុងអ៊ុន ដឹកនាំត្រួតពលក្នុងពេលកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈប្រតិភូអ៊ុយក្រែនបានចេញសេចក្តីថ្លែងការណ៍មួយផ្ញើជូនទៅកាន់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី៣០ខែតុលា ដោយបានលើកឡើងថា ឧត្តមសេនីយទាំងបីនាក់ក្នុងចំណោមកងកម្លាំងកូរ៉េខាងជើងយ៉ាងហោចណាស់៥០០នាក់ដែលត្រូវបានបញ្ជូនទៅប្រទេសរុស្ស៊ី។

ដោយយោងសេចក្តីថ្លែងការណ៍នោះ រ៉យទ័រ បានរាយការណ៍ថា អ៊ុយក្រែនបានកំណត់អត្តសញ្ញាណលោកវរសេនីយ៍ឯក Kim Yong Bok ឧត្តមសេនីយជាន់ខ្ពស់ដែលមានបញ្ជាកងកំលាំងពិសេស រួមទាំង XI Corps ដែលត្រូវបានគេស្គាល់ផងដែរថាជា Storm Corps ដែលសេវាចារកម្មកូរ៉េខាងត្បូងបាននិយាយថាត្រូវបានបញ្ជូនទៅកាន់ប្រទេសរុស្ស៊ី។

សេចក្តីថ្លែងការណ៍បាននិយាយថា ផែនការអំពាវនាវឱ្យកងទ័ពកូរ៉េខាងជើងត្រូវបានប្រជុំជើង ដោយយ៉ាងហោចណាស់ចំនួនប្រាំទម្រង់នៃទាហានពី២០០០ទៅ៣០០០នាក់ ហើយបញ្ចូលទៅក្នុងអង្គភាពរុស្ស៊ីដើម្បីលាក់បាំងវត្តមានរបស់ពួកគេ។

រុស្ស៊ីមិនបានបដិសេធការចូលរួមរបស់ទាហានកូរ៉េខាងជើងក្នុងសង្គ្រាមដែលខ្លួនបានធ្វើនៅអ៊ុយក្រែនតាំងពីខែកុម្ភៈ ឆ្នាំ២០២២មកម្ល៉េះ។ ប៉ុន្តែក្នុងដំណាក់កាលចុងក្រោយនៃភាពសាយភាយនៃការបញ្ជូនទ័ពរបស់កូរ៉េខាងជើង រុស្ស៊ីបានបដិសេធថា គ្មានវត្តមានកងទ័ពកូរ៉េខាងជើងឡើយ។

យោងទីភ្នាក់ងាររ៉យទ័រ បន្ទាប់ពីការបដិសេធដំបូង កូរ៉េខាងជើងក៏បានការពារគំនិតនៃការដាក់ពង្រាយទ័ពដូចទៅនឹងច្បាប់អន្តរជាតិ។

នៅក្នុងកិច្ចប្រជុំក្រុមប្រឹក្សាសន្តិសុខដដែល បេសកជនរុស្ស៊ី លោក Vassily Nebenzia បាននិយាយថា អន្តរកម្មយោធារបស់រុស្ស៊ីជាមួយកូរ៉េខាងជើងមិនបំពានច្បាប់អន្តរជាតិនោះទេ ហើយថា ទីក្រុងមូស្គូមានសិទ្ធិស្វែងរកជំនួយពីដៃគូរបស់ខ្លួន៕

ដោយ រ៉ាន់ រើយ