អេស្ប៉ាញ ចាប់ផ្តើមកាន់ទុក្ខ ខណៈមនុស្សស្លាប់ក្នុងគ្រោះទឹកជំនន់ដ៏អាក្រក់ កើនលើស១៥០នាក់

ប្រទេសអេស្ប៉ាញបានចាប់ផ្តើមកាន់ទុក្ខ ស្របពេលតួលេខមនុស្សស្លាប់ដោយសារគ្រោះមហន្តរាយទឹកជំនន់ដ៏អាក្រក់បំផុត ដែលបង្កឡើងដោយព្យុះភ្លៀងយ៉ាងធ្ងន់ធ្ងរចាប់តាំងពីថ្ងៃអង្គារមក បានកើនដល់១៥៨នាក់ ខណៈក្រុមជួយសង្គ្រោះនៅតែបារម្ភថា តួលេខជនរងគ្រោះនឹងហក់ឡើងជាបន្តទៀត ព្រោះមានមនុស្សជាច្រើនរកមិនទាន់ឃើញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ BBC នៅថ្ងៃសុក្រទី១ខែវិច្ឆិកាឆ្នាំ២០២៤, Valencia គឺជាខេត្តដែលរងគ្រោះធ្ងន់ជាងគេបំផុត ដោយនៅទីនោះគ្រាន់តែមនុស្សស្លាប់មានរហូតដល់១៥៥នាក់ទៅហើយ ខណៈ២នាក់ស្លាប់នៅតំបន់ Castilla-La Mancha និងម្នាក់ទៀតនៅ Andalusia។

ព្រោះតែសោកនាដកម្មនេះ អេស្ប៉ាញ ក៏ចាប់ផ្តើមការកាន់ទុក្ខជាផ្លូវការ ដោយទង់ជាតិត្រូវបង្ហូតពាក់កណ្តាលដងនៅតាមអគាររដ្ឋ ហើយក៏មានការស្មិងស្មាធិ៍រយៈពេល១នាទីផងដែរ។

ត្បិតតែព្យុះបានថមថយបន្តិចមែន ប៉ុន្តែភ្លៀងនៅតែបន្តធ្លាក់ ជាក់ស្តែងក្នុងតំបន់ Chiva ក្បែរខេត្ត Valencia, គ្រាន់តែ៨ម៉ោង ភ្លៀងធ្លាក់នៅទីនោះគឺស្មើនឹងកម្រិតទឹកភ្លៀងជាមធ្យមប្រចាំឆ្នាំបាត់ទៅហើយ។

ស្របពេលជាមួយគ្នានោះ កងជួយសង្គ្រោះមានគ្នាប្រមាណ ១ ២០០នាក់ នៅតែឈរជើងដើម្បីធ្វើប្រតិបត្តិការ ហើយលោកនាយករដ្ឋមន្ត្រី Pedro Sánchez បានព្រមានដល់ពលរដ្ឋ កុំទាន់ចេញពីជម្រកសុវត្ថិភាពវិលទៅផ្ទះវិញឲ្យសោះ ព្រោះស្ថានការណ៍មិនទាន់ធូរស្រាលទេ។

ទោះប្រទេសកំពុងជួបទុក្ខមែន ប៉ុន្តែប្រជាជនក៏សម្តែងការខឹងសម្បាផងដែរ ជាពិសេសគឺថា អេស្ប៉ាញជាប្រទេសអភិវឌ្ឍនៅអឺរ៉ុបមួយដែរ ប៉ុន្តែហេតុអ្វីបានជាមិនព្រមានពលរដ្ឋអំពីគ្រោះមហន្តរាយបែបនេះឲ្យទាន់ពេល។

សូមបញ្ជាក់ថា ទឹកជំនន់នេះ គឺជាសោកនាដកម្មគ្រោះធម្មជាតិដែលបណ្តាលឲ្យមានមនុស្សស្លាប់ច្រើនបំផុត ក្នុងប្រទេសអេស្ប៉ាញចាប់តាំងពីឆ្នាំ១៩៧៣មក ដោយកាលនោះ មានមនុស្សយ៉ាងតិច១៥០នាក់ បានបាត់បង់ជីវិតនៅខេត្តភាគអាគ្នេយ៍ Granada, Murcia និង Almeria៕

អត្ថបទ៖ សុខ សុវណ្ណ

ចុចអាន៖ ធម្មជាតិកាន់តែសាហាវ! គ្រោះមហន្តរាយទឹកជំនន់នៅអេស្ប៉ាញ សម្លាប់មនុស្សជិត ១០០នាក់