ហេតុផលដែលរុស្ស៊ី ពិន័យ Google ២០ ០០០ ០០០ ​០០០ ០០០ ០០០ ០០០ ០០០ ០០០ ០០០ ០០០ ០០០ដុល្លារ

ក្រោយមានការភ្ញាក់ផ្អើលចំពោះទំហំទឹកប្រាក់ដែលរុស្ស៊ី ពិន័យក្រុមហ៊ុន Google ពាក់ព័ន្ធការបិទមាតិការបស់ខ្លួន ពេលនេះវិមានក្រឹមឡាំងបានបញ្ជាក់យ៉ាងច្បាស់ថា ការដែលទីក្រុងមូស្គូពិន័យ Google ចំនួន២០ ០០០ ០០០ ០០០ ០០០  ០០០ ០០០ ០០០ ០០០ ០០០ ០០០ ០០០ដុល្លារ «២០ដេស៊ីលានដុល្លារ» គឺចង់ឲ្យពួកគេដឹងខ្លួននិងចូលមកដោះស្រាយបញ្ហាជាមួយគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍របស់ RT កាលពីថ្ងៃព្រហស្បតិ៍ទី៣១ខែតុលាឆ្នាំ២០២៤ អ្នកនាំពាក្យវិមានក្រឹមឡាំងលោក Dmitry Peskov បញ្ជាក់ថា «ការដែលប្រាក់ពិន័យមានចំនួនច្រើនបែបនេះ គឺរុស្ស៊ីមានបំណងឲ្យ Google យកចិត្តទុកដាក់ចំពោះបញ្ហានិងដោះស្រាយរឿងនេះ។ តួលេខនេះសឹងតែគ្មានអ្នកចេះអាន តែវាជានិមិត្តសញ្ញា។ Google មិនគួរកំណត់សកម្មភាព YouTuber របស់យើងដោយចេតនានោះទេ»។

តួលេខដ៏សម្បើមនេះ ត្រូវបានរាយការណ៍ជាលើកដំបូងដោយសារព័ត៌មាន RBK កាលពីថ្ងៃអង្គារ ហើយកើតចេញពីបណ្តឹងជាបន្តបន្ទាប់ដែលប្តឹង Google ដោយ YouTuber រុស្ស៊ីចំនួន១៧នាក់ ដែលចោទប្រកាន់ក្រុមហ៊ុនបច្ចេកវិទ្យាយក្សមួយនេះ ថាបានបិទមាតិកាដោយខុសច្បាប់ និងលុប channel YouTube របស់ពួកគេ។

ងាកទៅមើលខែតុលាឆ្នាំ២០២២ តុលាការអាជ្ញាកណ្តាលទីក្រុងមូស្គូ បានបញ្ជាឲ្យ Google បើក channel YouTube រុស្ស៊ីទាំងនោះវិញ ដោយដាក់ពិន័យ ១ ០២៨ដុល្លារក្នុងមួយថ្ងៃ ហើយការ​ពិន័យ​នឹង​កើន​ឡើង​ទ្វេ​ដង​ជា​រៀង​រាល់​សប្ដាហ៍។ ដោយសារតែគ្មានដំណោះស្រាយ បច្ចុប្បន្នប្រាក់ពិន័យបានឈានដល់២០ដេស៊ីលានដុល្លារ ហើយនឹងបន្តកើនឡើងបន្ថែមទៀត៕

តាមពិតទៅ ជម្លោះរវាង Google និងអ្នកលេងអ៊ីនធើណិតរុស្ស៊ី ផ្ទុះឡើងតាំងតែពីឆ្នាំ២០២០មកម្ល៉េះ នៅពេលក្រុមហ៊ុនយក្សនេះ បិទ channel YouTube ទូរទស្សន៍ Tsargrad និងទីភ្នាក់ងារព័ត៌មាន RIA ដោយលើកឡើងពីទណ្ឌកម្មអាមេរិក ហើយរឿងកាន់តែអាក្រក់ក្រោយពេលទីក្រុងមូស្គូ កើតសង្គ្រាមជាមួយទីក្រុង កៀវ៕

អត្ថបទ៖ សុខ សុវណ្ណ

ចុចអាន៖ Google កាត់បន្ថយបុគ្គលិក ១០០ នាក់ក្នុងផ្នែកជាច្រើនរបស់ក្រុមហ៊ុន