ព័ត៌មានអន្ដរជាតិ

ជនជាតិរ៉ូហ៊ីងយ៉ាច្រើនទៀតភៀសខ្លួនពីមីយ៉ាន់ម៉ាទៅដល់ឥណ្ឌូណេស៊ី ខណៈមានអ្នកស្លាប់៦នាក់

បានផុស

២ ខែ មុន

នៅ

ថ្ងៃសុក្រ ១ វិច្ឆិកា ២០២៤

ដោយ

យ៉ាងហោចណាស់មនុស្ស៦នាក់បានស្លាប់ ខណៈដែលជនជាតិរ៉ូហ៊ីងយ៉ាជិត១០០នាក់រត់ភៀសខ្លួនតាមទូក បានមកដល់ខេត្ត Aceh ប្រទេសឥណ្ឌូណេស៊ី ដែលជាការរត់គេចខ្លួនចុងក្រោយពីប្រទេសមីយ៉ាន់ម៉ាដែលធ្វើទុក្ខបុកម្នេញពួកគេក្នុងរយៈពេលប៉ុន្មានថ្ងៃថ្មីៗនេះ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១ខែវិច្ឆិកានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសហគមន៍នេសាទក្នុងស្រុក បានប្រាប់ទីភ្នាក់ងារសារព័ត៌មានរ៉យទ័រ ថា មនុស្សចំនួន៩៦នាក់ រួមទាំងកុមារ៧ នាក់ នៅតែស្ថិតនៅឆ្នេរមួយនៅភាគខាងកើតខេត្ត Aceh នៅលើកោះស៊ូម៉ាត្រា មិនទាន់មានដំណោះស្រាយនៅឡើយទេ ខណៈពួកគេនៅតែនៅតាមឆ្នេរ ជាមួយគ្នានេះសាកសពពីរនាក់ត្រូវបានរកឃើញនៅលើច្រាំង និងបួននាក់អណ្តែតក្នុងសមុទ្រ។

ជនជាតិរ៉ូហ៊ីងយ៉ាប្រហែល៣០០នាក់បានមកដល់ឆ្នេរសមុទ្រកាលពីសប្តាហ៍មុននៅក្នុងខេត្ត Aceh និងស៊ូម៉ាត្រាខាងជើង។ ទីភ្នាក់ងារជនភៀសខ្លួនរបស់អង្គការសហប្រជាជាតិ UNHCR បានអំពាវនាវឱ្យរដ្ឋាភិបាលឥណ្ឌូនេស៊ីធានាសុវត្ថិភាពរបស់ពួកគេ។ យោងតាមទីភ្នាក់ងារអង្គការសហប្រជាជាតិបានឱ្យដឹងថា ជនជាតិរ៉ូហ៊ីងយ៉ាប្រមាណ ២៥០០ នាក់បានមកតាមទូកនៅ Aceh ចាប់ពីខែមករា ឆ្នាំ២០២៣ ដល់ខែមីនាឆ្នាំ២០២៤ ដែលចំនួនដ៏ច្រើនបានមកដល់ប្រទេសឥណ្ឌូណេស៊ីក្នុងរយៈពេលប្រាំបីឆ្នាំមុន។

ក្រុមជនជាតិរ៉ូហ៊ីងយ៉ាភាគច្រើនប្រឈមមុខនឹងការធ្វើទុក្ខបុកម្នេញក្នុងប្រទេសមីយ៉ាន់ម៉ា ហើយមនុស្សរាប់សែននាក់បានភៀសខ្លួនចេញពីការបង្រ្កាបដោយយោធា ដោយស្វែងរកទីជម្រកនៅក្នុងជំរុំជនភៀសខ្លួនក្នុងប្រទេសបង់ក្លាដែស ខណៈមនុស្សរាប់ពាន់នាក់ប្រថុយគ្រោះថ្នាក់ធ្វើដំណើរទៅប្រទេសថៃ ឥណ្ឌូណេស៊ី និងម៉ាឡេស៊ីតាមទូក។ ដោយសារប្រជាជនមីយ៉ាន់ម៉ាភាគច្រើនជាអ្នកកាន់សាសនាព្រះពុទ្ធចាត់ទុកជនជាតិរ៉ូហ៊ីងយ៉ាថាជាអ្នកជ្រៀតជ្រែកបរទេសមកពីអាស៊ីខាងត្បូង ដោយបដិសេធពួកគេពីភាពជាពលរដ្ឋ។

លើសពីនេះជនជាតិរ៉ូហ៊ីងយ៉ាបាននិងកំពុងទទួលរងនូវការប្រយុទ្ធចុងក្រោយបំផុត ដោយសារតែពួកគេត្រូវបានបង្ខំឱ្យចូលទៅក្នុងជួរកងទ័ព បើទោះបីជាមិនត្រូវបានទទួលស្គាល់ថាជាពលរដ្ឋក៏ដោយ។ បុរសដែលមានអាយុពី១៨ ដល់៣៥ឆ្នាំ និងស្ត្រីដែលមានអាយុពី ១៨ ដល់ ២៧ ឆ្នាំអាចត្រូវបានព្រាងឲ្យចូលក្នុងកងកម្លាំងប្រដាប់អាវុធរយៈពេល ២ ឆ្នាំហើយអាណត្តិនេះអាចបន្តដល់៥ឆ្នាំចំពេលដែលមានការប្រកាសអាសន្នជាតិបែបនេះ។

គួររម្លឹកថាក្នុងឆ្នាំ ២០១៧ ការបង្រ្កាបដោយយោធាបានបង្ខំឱ្យជនភៀសខ្លួនរ៉ូហ៊ីងយ៉ាជាង ៧០០០០០ ភៀសខ្លួនឆ្លងព្រំដែនចូលទៅក្នុងប្រទេសបង់ក្លាដែស។ ក្នុងអំឡុងពេលនៃការបង្រ្កាប ជនភៀសខ្លួនតែងតែរាយការណ៍អំពីការរំលោភ ការធ្វើទារុណកម្ម ការដុត និងសម្លាប់ដោយកងកម្លាំងសន្តិសុខមីយ៉ាន់ម៉ា។ ការបង្រ្កាបឆ្នាំ២០១៧ នេះស្ថិតនៅក្រោមការស៊ើបអង្កេតដោយតុលាការឧក្រិដ្ឋកម្មអន្តរជាតិនៅទីក្រុងឡាអេ ចាប់តាំងពីឆ្នាំ ២០១៩ផងដែរ៕