កូរ៉េខាងជើង ប្រកាសឈរប្រកៀកស្មារុស្ស៊ី រហូតដល់ទីក្រុងមូស្គូឈ្នះ

ក្នុងជំនួបពិភាក្សារវាងរដ្ឋមន្ត្រីការបរទេសកូរ៉េខាងជើងលោកស្រី Choe Son-hui ជាមួយសមភាគីរុស្ស៊ីលោក Sergei Lavrov នៅទីក្រុងមូស្គូ កាលពីថ្ងៃសុក្រទី១ខែវិច្ឆិកាឆ្នាំ២០២៤, លោកស្រី Choe ប្រកាសថា ទីក្រុងព្យុងយ៉ាង នឹងឈរប្រកៀកស្មាទីក្រុងមូស្គូ រហូតដល់ «ថ្ងៃជ័យជម្នះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីនិយាយថា “គ្មានអ្វីត្រូវងឿងឆ្ងល់ឡើយថា ក្រោមការដឹកនាំដ៏ល្អរបស់ប្រធានាធិបតីរុស្ស៊ី វ្លាឌីមៀរ ពូទីន, កងទ័ពនិងប្រជាជនរុស្ស៊ីប្រាកដជានឹងទទួលជ័យជម្នះយ៉ាងធំធេងក្នុងការតស៊ូដ៏ពិសិដ្ឋដើម្បីការពារអធិបតេយ្យភាពនិងសន្តិសុខជាតិរបស់ប្រទេស។ ខ្ញុំ​សូម​បញ្ជាក់​ជា​ថ្មី​ថា យើង​នឹង​ឈរប្រកៀកស្មាមិត្ត​រុស្ស៊ី​ ​រហូត​ដល់​ថ្ងៃ​ទទួល​បាន​ជ័យជម្នះ»។

ទោះបីជាយ៉ាងណាក៏ដោយ លោកស្រីមិនបានបញ្ជាក់ថា ជ័យជម្នះនេះគឺចង់សំដៅទៅលើសង្គ្រាមរុស្ស៊ី-អ៊ុយក្រែននោះទេ ប៉ុន្តែគេដឹងថា លោកស្រីនិយាយក្នុងន័យនេះហើយ។

ដំណើរទស្សនកិច្ចរបស់លោកស្រីនៅប្រទេសរុស្ស៊ី គឺធ្វើឡើងចំពេលប្រទេសលោកខាងលិច ចោទកូរ៉េខាងជើង ថាបានបញ្ជូនទ័ពរាប់ម៉ឺននាក់ ទៅជួយរុស្ស៊ីប្រយុទ្ធជាមួយអ៊ុយក្រែន នៅសមរភូមិជួរមុខ។

យ៉ាងណា តំណាងកូរ៉េខាងជើងប្រចាំអង្គការសហប្រជាជាតិ បានអះអាងកាលពីថ្ងៃទី២១ខែតុលាហើយថា ខ្លួនមិនបានបញ្ជូនកងទ័ពទៅគាំទ្រយុទ្ធនាការរបស់រុស្ស៊ីនៅអ៊ុយក្រែនទេ ហើយការចោទប្រកាន់បែបនេះគឺជាពាក្យចចាមអារ៉ាមដែលគ្មានមូលដ្ឋានទាល់តែសោះ។

សូមបញ្ជាក់ថា រុស្ស៊ី-កូរ៉េខាងជើង មានព្រំដែនគោកនិងទំនាក់ទំនងជាប្រវត្តិសាស្ត្រ តាំងពីសម័យសូវៀតមក។ លោកពូទីន ធ្លាប់ទៅបំពេញទស្សនកិច្ចនៅកូរ៉េខាងជើងក្នុងឆ្នាំ២០០០ ភ្លាមៗបន្ទាប់ពីក្លាយជាប្រធានាធិបតី ដែលកាលនោះបានជួបជាមួយមេដឹកនាំគីម ជុងអ៊ីល។

សម្ព័ន្ធមិត្តទាំងពីរកាន់តែមានភាពស្និទ្ធស្នាល ក្រោយពេលរុស្ស៊ីចាប់ផ្តើមប្រតិបត្តិការសឹកក្នុងប្រទេសអ៊ុយក្រែននៅដើមឆ្នាំ២០២២។ ជាក់ស្តែងក្នុងអំឡុងពេលដំណើរទស្សនកិច្ចរបស់ប្រធានាធិបតីរុស្ស៊ី ទៅកាន់ទីក្រុងព្យុងយ៉ាងកាលពីខែមិថុនា លោកពូទីននិងមេដឹកនាំគីមជុងអ៊ុន បានចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយ ជាមួយការសន្យាថា បើប្រទេសណាមួយរងការវាយប្រហារ ប្រទេសមួយទៀតត្រូវជួយគ្នា៕

អត្ថបទ៖ សុខ សុវណ្ណ

ចុចអាន៖ របាយការណ៍​ថ្មី​របស់​អាមេរិក បង្ហាញ​ថា ទ័ព​កូរ៉េ​ខាង​ជើង ៨ ០០០​នាក់​កំពុងនៅ​ព្រំដែន​អ៊ុយក្រែន