ព័ត៌មានអន្ដរជាតិ

ចិន ថា ការរឹតចំណងទ្វេភាគីរវាងកូរ៉េខាងជើងនិងរុស្ស៊ី គឺជារឿងរបស់គេ

បានផុស

៣ ខែ មុន

នៅ

ថ្ងៃសៅរ៍ ២ វិច្ឆិកា ២០២៤

ដោយ

ស្របពេលសហរដ្ឋអាមេរិក កំពុងបារម្ភអំពីការបញ្ជូនទ័ពកូរ៉េខាងជើង ទៅប្រយុទ្ធនៅសមរភូមិអ៊ុយក្រែននិងទំនាក់ទំនងកាន់តែស្អិតរមួតរវាងទីក្រុងព្យុងយ៉ាងនិងទីក្រុងមូស្គូ, អ្នកនាំពាក្យក្រសួងការបរទេសចិនលោក Lin Jian បានបញ្ជាក់ថា «កូរ៉េខាងជើងនិងរុស្ស៊ី ជារដ្ឋអធិបតេយ្យភាពឯករាជ្យ។ ការដែលពួកគេអភិវឌ្ឍទំនាក់ទំនងទ្វេភាគីគឺជារឿងរបស់គេ»។

អ្នកនាំពាក្យក្រសួងការបរទេសចិនលោក Lin Jian (រូបថត៖ ក្រសួងការបរទេសចិន)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា «ទីក្រុងប៉េកាំងមិនបានដឹងអ្វីឡើយអំពីការកិច្ចសហប្រតិបត្តិការទ្វេភាគីរវាងកូរ៉េខាងជើងនិងរុស្ស៊ី។ នោះគឺជារឿងរបស់ពួកគេ ប៉ុន្តែចិនសង្ឃឹមថា ភាគីទាំងឡាយនឹងជួយបន្ធូរបន្ថយស្ថានការណ៍ ហើយការងារសម្រាប់ដំណោះស្រាយនយោបាយចំពោះវិបត្តិអ៊ុយក្រែនគឺមិនផ្លាស់ប្តូរ»។

លើការឡើងរបស់អ្នកនាំពាក្យរូបនេះគឺឆ្លើយតបទៅការចោទប្រកាន់របស់ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី ដែលថា លោកពិតជាភ្ញាក់ផ្អើលខ្លាំងណាស់ដែលចិន នៅស្ងៀមឈឹង ជុំវិញរឿងកូរ៉េខាងជើង បញ្ជូនទ័ពទៅជួយរុស្ស៊ី។

លោកបានបង្ហោះសារលើបណ្តាញសង្គម X ថា «ខ្ញុំបានផ្តល់បទសម្ភាសដល់ទូរទស្សន៍ KBS របស់កូរ៉េខាងត្បូង ដោយសង្កត់ធ្ងន់លើតួនាទីផ្លូវការរបស់កូរ៉េខាងជើងនៅក្នុងសង្គ្រាមនេះ។ វាមិនមែនគ្រាន់តែជាអាវុធឬកម្មករនៅក្នុងរោងចក្ររុស្ស៊ីនោះទេ ទាហានកូរ៉េខាងជើងស្ថិតនៅក្នុងទីក្រុង Kursk ដែលជាទឹកដីកាន់កាប់របស់យើង។ ត្រៀមប្រយុទ្ធនឹងអ៊ុយក្រែន នេះជាសង្រ្គាមប្រទេសពីរទល់នឹងមួយ។ សកម្មភាពរបស់កូរ៉េខាងជើងមិនមែនចៃដន្យទេ ពួកគេមានគោលដៅយុទ្ធសាស្ត្រ។ ខ្ញុំភ្ញាក់ផ្អើលនឹងភាពស្ងៀមស្ងាត់របស់ចិន។ ខ្ញុំមិនអាចនិយាយថា ចិននៅខាងយើងទេ ប៉ុន្តែជាតំបន់។ អ្នកធានាសន្តិសុខ ភាពស្ងៀមស្ងាត់របស់ចិន មិនស្រួលទេ»។

ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី (រូបថត៖ AP)

តាមរបាយការណ៍ចុងក្រោយរបស់សហរដ្ឋអាមេរិក បានឲ្យដឹងថា ទាហានចំនួន ៨ ០០០នាក់របស់ក្រុងព្យុងយ៉ាងកំពុងមានវត្តមាននៅលើទឹកដីប្រទេសរុស្ស៊ីកៀកនឹងព្រំដែនអ៊ុយក្រែន ហើយកំពុងត្រៀមខ្លួនជួយវិមានក្រឹមឡាំងប្រឆាំងនឹងក្រុងកៀវនាពេលប៉ុន្មានថ្ងៃខាងមុខ។

លោក Antony Blinken រដ្ឋមន្ត្រីការបរទេសអាមេរិក បានប្រាប់ថា ក្នុងចំណោមទាហានទាំង ៨ ០០០នាក់របស់កូរ៉េខាងជើង អាមេរិកមិនទាន់សង្កេតឃើញថាមានកងកម្លាំងណាមួយចូលទៅក្នុងសមរភូមិប្រយុទ្ធជាមួយអ៊ុយក្រែននៅឡើយទេ។ យ៉ាងណា លោកបានបន្ថែមថា អាមេរិករំពឹងថា ទាហានកូរ៉េខាងជើងនឹងចូលខ្លួនប្រយុទ្ធលើសមរភូមិនាពេលឆាប់ៗខាងមុខ៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង ប្រកាសឈរប្រកៀកស្មារុស្ស៊ី រហូតដល់ទីក្រុងមូស្គូឈ្នះ