​ទោះ​បី​កៀក​បោះឆ្នោត អាមេរិក​នៅតែ​បញ្ជូន​ជំនួយ​​យោធា​តម្លៃ​៤២៥​លាន​ដុល្លារ​ទៅ​​អ៊ុយក្រែន

មន្ទីរបញ្ចកោណបានប្រកាស​នៅ​ថ្ងៃសុក្រថា ខ្លួន​កំពុងបញ្ជូនជំនួយយោធាបន្ថែម​តម្លៃ​​ ៤២៥​លានដុល្លារដល់អ៊ុយក្រែន ខណៈដែលទីក្រុងកៀវ​​ត្រៀមប្រឈមមុខនឹងកងកម្លាំងរុស្ស៊ីដែលចូលរួមដោយកងទ័ពកូរ៉េខាងជើងជាង​១០០០០នាក់។

ទីភ្នាក់ងារព័ត៌មាន AP មាន​មូល​ដ្ឋាន​​នៅ​សហរដ្ឋ​អាមេរិក បាន​ផ្សាយ​នៅថ្ងៃទី០២ខែតុលានេះថា រដ្ឋមន្ត្រីក្រសួងការពារជាតិ​អាមេរិក​ លោក Lloyd Austin បាននិយាយថា ជំនួយបន្ថែម​ទៀត​នឹងមកដល់ក្នុងពេលឆាប់ៗនេះ ក្នុងដំណើរទស្សនកិច្ចរបស់លោកទៅកាន់ទីក្រុងកៀវ​កាលពីសប្តាហ៍មុន។

កញ្ចប់ជំនួយនេះរួមមានអាវុធដែលនឹងត្រូវ​យក​ចេញពីឃ្លាំងស្តុករបស់សហរដ្ឋអាមេរិកដែលមានស្រាប់ រួមទាំងខែលការពារ​ដែនអាកាសសម្រាប់ប្រព័ន្ធមីស៊ីលពីផ្ទៃដីទៅអាកាសកម្រិតខ្ពស់ គ្រាប់បែកសម្រាប់ប្រព័ន្ធរ៉ុក្កែត កាំភ្លើងធំចល័ត កាំភ្លើងធំ ១៥៥មីលីម៉ែត្រ រថពាសដែក និងអាវុធប្រឆាំងរថក្រោះ។

មកដល់ពេលនេះទីក្រុងភាគខាងកើតប្រទេសអ៊ុយក្រែនបន្តប្រឈមមុខនឹងការវាយលុកដោយរ៉ុក្កែតរបស់រុស្ស៊ី​។ បន្ថែមពីលើនេះ អ៊ុយក្រែនកំពុងប្រឈមមុខនឹងភាពមិនប្រាកដប្រជាថ្មី ខណៈដែលរលកនៃទាហានកូរ៉េខាងជើងដែលដាក់ពង្រាយនៅប្រទេសរុស្ស៊ីបានមកដល់ជិតព្រំដែនអ៊ុយក្រែន ហើយកំពុងរៀបចំដើម្បីចូលរួមការប្រយុទ្ធជាមួយកងទ័ពអ៊ុយក្រែននៅប៉ុន្មានថ្ងៃខាងមុខនេះ។

គួរបញ្ជាក់ថា កញ្ចប់ជំនួយដែលបានប្រកាសដោយមន្ទីរ​បញ្ចកោណ​នេះនាំមកនូវចំនួនសរុបនៃជំនួយយោធាដែលសហរដ្ឋអាមេរិកបានផ្តល់ឱ្យអ៊ុយក្រែនចាប់តាំងពីប្រទេសរុស្ស៊ីបានឈ្លានពានក្នុងខែកុម្ភៈឆ្នាំ​២០២២ កើនដល់ចំនួន ៦០,៤ ពាន់លានដុល្លារ៕

អត្ថបទ៖ ប៊ុន សុភាព