ព័ត៌មានអន្ដរជាតិ

លោកស្រី ហារីស និង ដូណាល់ ត្រាំ ឃោសនានៅថ្ងៃចុងក្រោយនៅរដ្ឋប្រទាញប្រទង់ North Carolina ដូចគ្នា

បានផុស

៣ ខែ មុន

នៅ

ថ្ងៃសៅរ៍ ២ វិច្ឆិកា ២០២៤

ដោយ

បេក្ខជនប្រធានាធិបតីសហរដ្ឋអាមេរិកដែលកំពុងប្រជែងយកកៅអីនៅសេតវិមានក្នុងការបោះឆ្នោតលើកទី៦១នៅថ្ងៃទី៥ខែវិច្ឆិកាខាងមុខនេះ បានធ្វើដំណើរទៅដល់រដ្ឋ North Carolina ដែលជាប្រទាញប្រទង់គ្នាសម្រាប់យុទ្ធនាការទាក់ទាញអ្នកគាំទ្រនៅថ្ងៃចុងក្រោយ។

លោក ដូណាល់ ត្រាំ និង លោកស្រី កាម៉ាឡា ហារីស ក្នុងការជជែកដេញដោលកាលពីខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេក្ខជនប្រធានាធិបតីនៃគណបក្សប្រជាធិបតេយ្យ គឺលោកស្រី កាម៉ាឡា ហារីស ( Kamala Harris) និងគណបក្សសាធារណរដ្ឋ គឺលោក ដូណាល់ ត្រាំ (Donald Trump) បានធ្វើដំណើរទៅកាន់រដ្ឋ North Carolina នៅថ្ងៃសៅរ៍សម្រាប់យុទ្ធការចុងក្រោយដើម្បីព្យាយាមដណ្តើមការគាំទ្រនៅក្នុងរដ្ឋដ៏ប្រកួតប្រជែងស្ថិតនៅភាគអាគ្នេយ៍។

ការបោះឆ្នោតសហរដ្ឋអាមេរិកជាប្រវត្តិសាស្រ្តលើកទី៦១សម្រាប់ជ្រើសរើសប្រធានាធិបតីទី៤៧ នៅសល់ត្រឹមតែរយៈពេលបីថ្ងៃទៀតប៉ុណ្ណោះ សម្រាប់ការបោះឆ្នោតប្រធានាធិបតីសហរដ្ឋអាមេរិកដែលនឹងធ្វើឡើងនៅថ្ងៃទី៥ខែវិច្ឆិកាត្រូវថ្ងៃអង្គារសប្តាហ៍ក្រោយនេះ។

តាមការចេញផ្សាយរបស់ទីភ្នាក់ងារព័ត៌មានរ៉យទ័រ ការឃោសនារកអ្នកគាំទ្រនៅរដ្ឋ North Carolina របស់អនុប្រធានាធិបតី ហារីស និងអតីតប្រធានាធិបតី ត្រាំ គឺធ្វើឡើង៤លើកជាប់ៗគ្នា ក្នុងរដ្ឋប្រទាញប្រទង់គ្នាទាំង៧សម្រាប់អាណត្តិនេះ។

ថ្ងៃសៅរ៍ក៏ជាថ្ងៃចុងក្រោយនៃការបោះឆ្នោតមុនកាលកំណត់នៅរដ្ឋ North Carolina ដែលជាកន្លែងបោះឆ្នោតជាង ៣,៨លានសន្លឹក ខណៈដែលតំបន់ភាគខាងលិចរបស់រដ្ឋនៅតែងើបឡើងវិញពីទឹកជំនន់ដ៏សាហាវរបស់ព្យុះសង្ឃរា Helene។

លោកស្រី ហារីស គ្រោងនឹងបង្ហាញខ្លួនជាមួយតារារ៉ុក Jon Bon Jovi នៅទីក្រុង Charlotte ដែលជាទីក្រុងធំបំផុតនៅរដ្ឋ North Carolina ដែលត្រូវបានចងភ្ជាប់ជាមួយរដ្ឋ Georgia សម្រាប់រង្វាន់ដ៏ធំបំផុតទីពីរនៃរដ្ឋប្រទាញប្រទង់គ្នា។ រដ្ឋនីមួយៗនេះមានអង្គបោះឆ្នោត ១៦ ដែលនឹងបន្ថែមទៅលើចំនួនអង្គបោះឆ្នោតដែលភាគីនិមួយៗត្រូវការដើម្បីបង្គ្រប់ទៅកាន់ចំនួន២៧០ដើម្បីឈ្នះការបោះឆ្នោតសម្រាប់ការដឹកនាំរដ្ឋាភិបាលអាមេរិក៕

ដោយ រ៉ាន់ រើយ