ព័ត៌មានអន្ដរជាតិ

អ៊ីស្រាអែល ថាបានសម្លាប់មេបញ្ជាការហេសបូឡា ដែលមានតួនាទីគ្រប់គ្រងការបាញ់មីស៊ីល

បានផុស

៥ ខែ មុន

នៅ

ថ្ងៃអាទិត្យ ៣ វិច្ឆិកា ២០២៤

ដោយ

Chheang

កងកម្លាំងការពារអ៊ីស្រាអែល (IDF) បាននិយាយកាលពីថ្ងៃសៅរ៍ថា ខ្លួនបានសម្លាប់លោក Jaafar Khader Faour ដែលជាមេបញ្ជាការដែលត្រួតពិនិត្យប្រតិបត្តិការមីស៊ីល និងរ៉ុកកែតរបស់ក្រុមហេសបូឡា នៅក្នុងអង្គភាព Nasser។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

IDF បានរាយការណ៍ថា លោក Faour ត្រូវបានកំណត់គោលដៅ និងសម្លាប់នៅក្នុងការវាយប្រហារតាមដែនអាកាសដោយយន្តហោះចម្បាំងរបស់អ៊ីស្រាអែល នៅក្នុងភូមិ Jouaiyya ភាគខាងត្បូងប្រទេសលីបង់ ដោយមិនបានប្រាប់ពីពេលវេលានៃប្រតិបត្តិការនោះទេ។

IDF បានប្រាប់ថា លោក Faour ទទួលខុសត្រូវចំពោះការផ្តួចផ្តើមការបញ្ជាបាញ់លើកដំបូងរបស់ក្រុមហេសបូឡាកាលពីថ្ងៃទី៨ខែតុលាឆ្នាំមុន ហើយចាប់តាំងពីពេលនោះមក គាត់មានតួនាទីចំពោះការវាយប្រហារជាច្រើនពីភាគខាងកើតលីបង់ប្រឆាំងនឹងជនស៊ីវិល និងទាហានអ៊ីស្រាអែល។

លោក Faour ក៏ទទួលខុសត្រូវចំពោះការវាយប្រហារដោយគ្រាប់រ៉ុកកែតជាច្រើនលើកទៅកាន់តំបន់ Golan Heights ដែលអ៊ីស្រាអែលកាន់កាប់ រួមទាំងការវាយប្រហារលើទីក្រុង Druze Majdal Shams ដែលបណ្តាលឲ្យមានកុមារ និងក្មេងជំទង់ស្លាប់ចំនួន ១២នាក់ក្នុងខែកក្កដា។ នេះបើយោងតាម IDF។

IDF បានបន្តថា ឥស្សរជនជាន់ខ្ពស់ម្នាក់ទៀតនៅក្នុងអង្គភាព Nasser របស់ហេសបូឡា ដែលជាមេបញ្ជាការប្រតិបត្តិការយន្តហោះគ្មានមនុស្សបើក ក៏ត្រូវបានសម្លាប់នៅក្នុងការវាយប្រហារតាមអាកាសផងដែរ។ យ៉ាងណា IDF មិនទាន់បញ្ជាក់ឈ្មោះមេបញ្ជាការរូបនោះនៅឡើយទេ។

ពាក់ព័ន្ធនឹងរឿងនេះ ក្រុមសកម្មប្រយុទ្ធហេសបូឡាមិនបានធ្វើការអត្ថាធិប្បាយអ្វីឡើយ៕

ដោយ៖ ឈាង