ព័ត៌មានអន្ដរជាតិ

កូរ៉េខាងជើង បាញ់មីស៊ីលមួយគ្រាប់ ចំថ្ងៃបោះឆ្នោតអាមេរិក

បានផុស

៤ នាទី មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

ប្រទេសកូរ៉េខាងជើង បានបាញ់មីស៊ីលបាលីស្ទិកមួយគ្រាប់ សំដៅទៅសមុទ្រជប៉ុន នៅព្រឹកព្រលឹមថ្ងៃអង្គារទី៥ខែវិច្ឆិកាឆ្នាំ២០២៤ ដែលចំថ្ងៃសហរដ្ឋអាមេរិក រៀបចំការបោះឆ្នោតជ្រើសរើសប្រធានាធិបតីថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពនេះគឺដូចទៅនឹងការព្រមានរបស់ប្រធានការិយាល័យសន្តិសុខជាតិកូរ៉េខាងត្បូង លោក Shin Won-sik ដែលថា ទីក្រុងព្យុងយ៉ាង អាចបាញ់សាកល្បងមីស៊ីល អំឡុងពេលសហរដ្ឋអាមេរិក រៀបចំការបោះឆ្នោតជ្រើសរើសប្រធានាធិបតី។

តាមការបញ្ជាក់ពីសារព័ត៌មាន NHK, មីស៊ីលនេះបានធ្លាក់នៅខាងក្រៅតំបន់សេដ្ឋកិច្ចពិសេសជប៉ុនក្នុងមហាសមុទ្រ ខណៈនាយករដ្ឋមន្ត្រីជប៉ុនលោក Shigeru Ishiba បានណែនាំដល់មន្ត្រីរាជការទាំងអស់ឲ្យប្រមូលនិងវិភាគព័ត៌មាន រួចជូនដំណឹងដល់សាធារណជនឲ្យបានទាន់ពេលវេលា ព្រមទាំងពិនិត្យឲ្យបានហ្មត់ចត់អំពីសុវត្ថិភាពយន្តហោះនិងកប៉ាល់។

ការបាញ់សាកល្បងមីស៊ីលរបស់កូរ៉េខាងជើង កើតឡើងត្រឹមប្រាំថ្ងៃប៉ុណ្ណោះ បន្ទាប់ពីប្រទេសនេះធ្វើតេស្តមីស៊ីលអន្តរទ្វីបថ្មីឈ្មោះ Hwasong-19។

មីស៊ីលនេះត្រូវគេអះអាងថា មានសមត្ថភាពអស្ចារ្យនិងកម្លាំងខ្លាំងបំផុត ពោលអាចហោះបានរយៈពេលរហូតដល់៨៦នាទី ក្នុងចម្ងាយជាង ១០០០គីឡូម៉ែត្រ ហើយកម្ពស់របស់មីស៊ីលគឺឈានដល់ទៅ ៧ ០០០គីឡូម៉ែត្រឯណោះ នៅពេលវាឡើងដល់ចំណុចកំពូល។

ស្របពេលជាមួយគ្នានោះ ជប៉ុនក៏ព្រមានដែរថា មីស៊ីលអន្តរទ្វីបនេះ អាចហោះដល់ដីគោកអាមេរិកឯណោះ។

លោក Yoshimasa Hayashi ប្រធានខុទ្ទកាល័យជប៉ុនព្រមានថា «ផ្អែកលើព័ត៌មានដែលយើងទទួលបានអំពីចម្ងាយហោះហើរនិងរយៈកម្ពស់នៃមីស៊ីល ICBM របស់កូរ៉េខាងជើងនេះ យើងជឿថា វាអាចហោះដល់ចម្ងាយ ១៥ ០០០គីឡូម៉ែត្រឯណោះ អាស្រ័យលើក្បាលគ្រាប់បំពាក់លើវា។ គ្មានអ្វីត្រូវឆ្ងល់ឡើយ មីស៊ីលនេះពិតជាអាចធ្វើដំណើរបានឆ្ងាយដល់ដីគោកអាមេរិកមែន ព្រោះចម្ងាយរវាងប្រទេសទាំងពីរ មានប្រមាណត្រឹម ៩ ៩០០ គីឡូម៉ែត្រប៉ុណ្ណោះ»៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង បាញ់មីស៊ីល២គ្រាប់ទៀត ក្រោយពេល នាវាមុជទឹកអាមេរិក មកដល់ កូរ៉េខាងត្បូង