យ៉ាងហោចណាស់មនុស្ស៣៦នាក់ស្លាប់ បន្ទាប់ពីរថយន្តក្រុងធ្លាក់ចូលក្នុងជ្រលងភ្នំ​នៅ​ឥណ្ឌា

យ៉ាងហោចណាស់មនុស្ស៣៦នាក់បានស្លាប់ និង២៧នាក់បានរងរបួស ក្នុងហេតុការណ៍រ​ថ​យន្តក្រុងមួយគ្រឿងបានធ្លាក់ចូលទៅក្នុងជ្រលងភ្នំមួយក្នុងរដ្ឋ Uttarakhand ភាគខាងជើងនៃប្រទេសឥណ្ឌា។ នេះបើយោងតាមការចេញផ្សាយរបស់សារព័ត៌មា​ន BBC នៅថ្ងៃទី​៥ខែវិច្ឆិកានេះ។

រថយន្តក្រុងនេះកំពុងធ្វើដំណើរទៅកាន់ស្រុក Ramnagar កាលពីព្រឹកថ្ងៃចន្ទ ដោយក្នុងពេលកើតហេតុមានមនុស្សចំនួន ៤៤នាក់នៅលើរថយន្ត ខណៈមូលហេតុគឺដោយសារតែអ្នកបើកបរបាត់បង់ការគ្រប់គ្រង បណ្ដាលឲ្យរថយន្តក្រុងធ្លាក់ចូលទៅក្នុងជ្រោះជម្រៅ​៥០​ម៉ែត្រក្នុងទីក្រុង Marchula។

អ្នកដំណើរជាច្រើននាក់បានស្លាប់នៅនឹងកន្លែង ចំណែកអ្នករងរបួសត្រូវបានបញ្ជូនទៅមន្ទីរពេទ្យក្បែរនោះ ខណៈប្រតិបត្តិការ​ជួយ​សង្គ្រោះ​នៅ​តែ​កំពុង​ដំណើរការ។ រដ្ឋាភិបាលបានបញ្ជាឱ្យស៊ើបអង្កេតលើឧបទ្ទវហេតុនេះ។

នាយករដ្ឋមន្ត្រីឥណ្ឌាលោក Narendra Modi ក៏បានចូលរួមរំលែកទុក្ខដល់ក្រុមគ្រួសារជនរងគ្រោះផងដែរ។ គាត់បានប្រកាសផ្តល់សំណងចំនួន ២០០០០០ រូពីស្មើនឹង ២,៣៧៨ ដុល្លារ ដល់គ្រួសារនៃអ្នកស្លាប់ និង ៥០,០០០ រូពីដល់អ្នករងរបួស។ ជាមួយគ្នានេះប្រធានរដ្ឋ Uttarakhand លោក Pushkar Singh Dhami ក៏បានប្រកាសផ្តល់ជំនួយហិរញ្ញវត្ថុដល់ជនរងគ្រោះ និងក្រុមគ្រួសាររបស់ពួកគេផងដែរ។

គួរបញ្ជាក់ថាឡានក្រុងគឺជាមធ្យោបាយដឹកជញ្ជូនទូទៅនៅក្នុងប្រទេសឥណ្ឌា ជាពិសេសរវាងទីក្រុង និងស្រុកតូចៗ។ ទោះជាយ៉ាងណាក៏ដោយ ជារឿយៗការបើកបរមិនគោរពច្បាប់សុវត្ថិភាព និងស្ដង់ដារសុវត្តិភាពនោះទេ។ មនុស្សប្រហែល ១៦០០០០នាក់បានស្លាប់ដោយគ្រោះថ្នាក់ចរាចរណ៍នៅក្នុងប្រទេសឥណ្ឌាជារៀងរាល់ឆ្នាំ ដែលជាចំនួនខ្ពស់បំផុតនៅក្នុងពិភពលោក ខណៈមូលហេតុភាគច្រើនដោយសារតែការបើកបរហួសល្បឿនកំណត់ និងការបើកបរមិនប្រុងប្រយ័ត្ន៕

អត្ថបទ៖ ប៊ុន សុភាព