តំបន់ Dixville Notch បោះឆ្នោតមុនគេ, លទ្ធផល ត្រាំនិងហារីស ស្មើគ្នា

ថ្ងៃបោះឆ្នោតជ្រើសរើសប្រធានាធិបតីអាមេរិក បានចូលមកដល់ជាផ្លូវការហើយ ដោយការិយាល័យភាគច្រើនទូទាំងប្រទេសនឹងត្រូវបើកទ្វានៅម៉ោង៦ព្រឹក ខុសតែនៅតំបន់តូចមួយមានប្រជាជនមិនដល់១០០នាក់ឈ្មោះ Dixville Notch នៃរដ្ឋ New Hampshire ប៉ុណ្ណោះដែលបើកមុនគេ ពោលគឺបើកនៅពាក់កណ្តាលអាធ្រាត្រតែម្តង។

មិនមែនជារឿងចម្លែកឡើយ ព្រោះជាប្រពៃណីទៅហើយ ដែលចាប់តាំងពីឆ្នាំ១៩៦០មក តំបន់នេះបើកការបោះឆ្នោតមុនគេ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លាមៗក្រោយការបោះឆ្នោតនៅទីនោះបិទបញ្ចប់ លទ្ធផលបង្ហាញថា លោក ដូណាល់ ​ត្រាំ នៃគណបក្សសាធារណរដ្ឋនិងអ្នកស្រី កាម៉ាឡា ហារីស ទទួលបាន ៣សំឡេងស្មើគ្នា។ នេះសបញ្ជាក់ឲ្យឃើញថា ការប្រកួតប្រជែងសម្រាប់តំណែងសេតវិមានលើកនេះ ពិតជាតានតឹងខ្លាំងណាស់។

សូមបញ្ជាក់ថា ឆ្នាំនេះ ពលរដ្ឋអាមេរិកប្រហែល២៤៤លាននាក់គឺមានសិទ្ធិបោះឆ្នោត តែយ៉ាងណា ក្នុងចំណោមនោះ មានជាង៧៤លាននាក់បានទៅបោះឆ្នោតមុនរួចទៅហើយ។

ដំណើរការរាប់សន្លឹកឆ្នោតឆ្នាំនេះ ត្រូវគេរំពឹងថានឹងលឿនជាងឆ្នាំ២០២០ ព្រោះកាលនោះមានរដ្ឋជាច្រើនត្រូវចាយពេលយូរដើម្បីរាប់សន្លឹកឆ្នោតតាមប្រៃសណីយ៍ ដោយសារវិបត្តិជំងឺរាតត្បាតកូវីដ១៩ ជាក់ស្តែងកាលពី៤ឆ្នាំមុន ការរាប់សន្លឹកឆ្នោតត្រូវចំណាយពេលរហូតដល់ទៅ៤ថ្ងៃឯណោះ ទើបរកអ្នកឈ្នះឃើញ៕

អត្ថបទ៖ សុខ សុវណ្ណ

ចុចអាន៖ រឿងសំខាន់ត្រូវដឹង ក្នុងការបោះឆ្នោតអាមេរិក ថ្ងៃនេះ!