ព័ត៌មានអន្ដរជាតិ

ចំនួនអ្នកស្លាប់កើនលើស៣០០០នាក់ក្នងការវាយប្រហាររបស់អ៊ីស្រាអែលនៅលីបង់

បានផុស

៤ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

ក្រសួងសុខាភិបាលលីបង់ បានឱ្យដឹងថា ការវាយប្រហាររបស់អ៊ីស្រាអែលលើប្រទេសលីបង់ មកដល់ពេលនេះបានសម្លាប់មនុស្សជាង៣០០០នាក់ក្នុងរយៈពេល១៣ខែ ចាប់តាំងពីការប្រយុទ្ធគ្នាបានផ្ទុះឡើងរវាងក្រុមហេសបូឡានិងអ៊ីស្រាអែល តាមបណ្តោយព្រំដែនលីបង់ភាគខាងត្បូង និងខាងជើងអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Al Jazeera ផ្សាយនៅថ្ងៃទី៥ខែវិច្ឆិកានេះ បានឱ្យដឹងថា ក្រសួងសុខាភិបាលបានឲ្យដឹងថា មនុស្ស ៣០០២នាក់ត្រូវបានសម្លាប់ និង១៣៤៩២នាក់បានរងរបួសចាប់តាំងពីការចាប់ផ្តើមនៃការឈ្លានពាន របស់អ៊ីស្រាអែលប្រឆាំងនឹងប្រទេសលីបង់។ នៅក្នុងតួលេខនេះបង្ហាញថា មានស្ត្រីចំនួន ៥៨៩ នាក់ និងកុមារយ៉ាងតិច ១៨៥នាក់ ក្នុងចំណោមមនុស្ស ៣០០២នាក់ត្រូវបានសម្លាប់រហូតមកដល់ពេលនេះ ។

ស្របពេលដែលអ៊ីស្រាអែលអះអាងថា យុទ្ធជនហេសបូឡា រាប់រយនាក់ត្រូវបានសម្លាប់នៅក្នុងការវាយប្រហាររបស់ខ្លួន សាក្សី និងរបាយការណ៍ឯករាជ្យពីសហគមន៍ដែលត្រូវបានទម្លាក់គ្រាប់បែកនៅទូទាំងប្រទេសលីបង់ បញ្ជាក់ពីចំនួនជនស៊ីវិលដែលស្លាប់បាត់បង់ជីវិតយ៉ាងច្រើនពីការវាយប្រហារតាមអាកាស និងការបាញ់ផ្លោងរបស់អ៊ីស្រាអែលយ៉ាងទូលំទូលាយ និងមិនរើសមុខ។

នាយកប្រតិបត្តិអង្គការ UNICEF លោកស្រី Catherine Russell មានប្រសាសន៍ថា «ចាប់តាំងពីថ្ងៃទី ៤ ខែតុលា ឆ្នាំនេះ យ៉ាងហោចណាស់ កុមារម្នាក់បានស្លាប់ និង ១០ នាក់បានរងរបួសជារៀងរាល់ថ្ងៃ» ។ ទីភ្នាក់ងារនេះបាននិយាយថា «កុមាររាប់ពាន់នាក់ទៀតដែលបានរួចរស់ជីវិតពីការបំផ្ទុះគ្រាប់បែកឥតឈប់ឈរជាច្រើនខែ ឥឡូវនេះមានទុក្ខយ៉ាងធ្ងន់ធ្ងរដោយសារអំពើហិង្សា និងភាពចលាចលនៅជុំវិញពួកគេ»។

ចំនួនអ្នកស្លាប់កើនឡើងនេះកើតឡើង ខណៈដែលប្រជាជនលីបង់ប្រមាណ១.២លាននាក់នៃចំនួនសរុប ៥.៨ លាននាក់ត្រូវបានផ្លាស់ទីលំនៅដោយបង្ខំពីទីក្រុង ទីប្រជុំជន និងភូមិ ព្រមទាំងសង្កាត់នានាក្នុងរដ្ឋធានី Beirut ដែលអ៊ីស្រាអែលបានទម្លាក់គ្រាប់បែកម្តងហើយម្តងទៀត និងបន្តចេញបញ្ជាជម្លៀសដោយបង្ខំ។

ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួន (UNHCR) បានឲ្យដឹងថា ជាមធ្យមមានមនុស្សពី ៤០០ ទៅ ៦០០ នាក់មកពីប្រទេសលីបង់ បានមកដល់ប្រទេសអ៊ីរ៉ាក់ជារៀងរាល់ថ្ងៃក្នុងសប្តាហ៍កន្លងមកនេះ។ ពួកគេភាគច្រើនជាជនជាតិលីបង់ ប៉ុន្តែក៏មានការកើនឡើងផងពីការមកដល់នៃជនជាតិស៊ីរី និងប៉ាឡេស្ទីន។

ទីភ្នាក់ងារនេះបាននិយាយថា យ៉ាងហោចណាស់ជនភៀសខ្លួន ២៨,៣៥០ នាក់មកពីប្រទេសលីបង់បានមកដល់ប្រទេសនេះចាប់តាំងពីការកើនឡើងនៃការប្រយុទ្ធគ្នារវាងអ៊ីស្រាអែល និងក្រុមហេសបូឡាក្នុងខែកញ្ញា។ ។ ទន្ទឹមនឹងនោះ មនុស្សប្រមាណ៤៧២,០០០ នាក់មកពីប្រទេសលីបង់បានឆ្លងចូលទៅក្នុងប្រទេសស៊ីរីក្នុងរយៈពេលប៉ុន្មានសប្តាហ៍ថ្មីៗនេះ។

ចំណែកនៅក្នុងប្រទេសអ៊ីស្រាអែល មនុស្សចំនួន ៧២ នាក់ត្រូវបានរាយការណ៍ថាបានសម្លាប់នៅក្នុងការវាយប្រហាររបស់ក្រុមហេបូឡាចាប់តាំងពីខែតុលាឆ្នាំមុន ដែលជាតួលេខរួមមានទាហានអ៊ីស្រាអែលយ៉ាងហោចណាស់ ៣០ នាក់ត្រូវបានសម្លាប់នៅក្នុងការប្រយុទ្ធជាមួយក្រុមប្រដាប់អាវុធលីបង់។ លើសពីនេះមនុស្សជាង ៦០០០០នាក់ត្រូវបានផ្លាស់ទីលំនៅចេញពីផ្ទះរបស់ពួកគេនៅភាគខាងជើងប្រទេសអ៊ីស្រាអែល។

ការបញ្ឈប់ការប្រយុទ្ធគ្នាហាក់បីដូចជាផ្លូវដ៏ឆ្ងាយមួយ ចំពេលមានការកើនឡើងនៃចំនួនអ្នកស្លាប់ និងការបំផ្លិចបំផ្លាញហេដ្ឋារចនាសម្ព័ន្ធលីបង់ និងទ្រព្យសម្បត្តិជនស៊ីវិលយ៉ាងធ្ងន់ធ្ងរ៕