ព័ត៌មានអន្ដរជាតិ

ប្រធានាធិបតីស៊ែប៊ី៖ ការបោះឆ្នោតអាមេរិកអាចនាំសន្តិភាពឬសង្គ្រាមលោកលើកទី៣

បានផុស

២ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

ការបោះឆ្នោតប្រធានាធិបតីសហរដ្ឋអាមេរិកលើកទី៦១ដើម្បីជ្រើសប្រធានាធិបតីទី៤៧ បានក្លាយជាប្រវត្តិសាស្រ្តសំខាន់បំផុតសម្រាប់មនុស្សជាតិនៅលើភពផែនដីនេះដែលកំពុងប្រឈមវិបត្តិសង្គ្រាមដ៏ធ្ងន់ធ្ងរ។ ការបោះឆ្នោតនេះត្រូវបានគេមើលឃើញថា ជាការនាំមកនូវសន្តិភាពដោយបញ្ចប់សង្គ្រាមដែលញំញីពិភពលោកអស់រយៈពេលជិត៣ឆ្នាំនិងរីកសាយទៅកាន់តំបន់ជាច្រើនទៀត ឬក៏អាចថា ជាដំណើរទៅរកសង្គ្រាមលើកទី៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Aleksandar Vucic ប្រធានាធិបតីស៊ែប៊ីដែលមាននិន្នាការគាំទ្ររុស្ស៊ី ត្រូវបានដកស្រង់សម្តីដោយទូរទស្សន៍ TV Happy ដែលបានផ្សាយថា ការបោះឆ្នោតប្រធានាធិបតីអាមេរិកនឹងក្លាយជាការសម្រេចចិត្តសម្រាប់មនុស្សជាតិទាំងអស់ថា «វានឹងនាំមកនូវសន្តិភាព ឬការផ្លាស់ប្តូរឆ្ពោះទៅរកសង្គ្រាមលោកលើកទី៣»។

បើទោះបីជាប្រធានាធិបតីស៊ែប៊ី មិនបានលើកឈ្មោះចំៗចំពោះបេក្ខជនដែលអាចនាំទៅរកសន្តិភាពឬសង្គ្រាមលោកលើកទី៣ ប៉ុន្តែគេអាចដឹងថា លោកទំនងសំដៅលើបេក្ខភាពលោកស្រី កាម៉ាឡា ហារីស នាំមកនូវសង្គ្រាមលោកលើកទី៣ ព្រោះថា សង្គ្រាមនេះកើតឡើងក្នុងអំឡុងពេលដែលលោកស្រីកាន់អំណាចជាមួយលោក ចូ បៃដិន ខណៈដែលលោក ដូណាល់ ត្រាំ ហាក់បានបញ្ចេញវោហារស័ព្ទបញ្ចប់សង្គ្រាមក្នុងពេលដែលលោកឈ្នះឆ្នោត។

លោកស្រី កាម៉ាឡា ហារីស តែងបង្ហាញជំហរគាំទ្រអ៊ុយក្រែនក្នុងការធ្វើសង្គ្រាមដើម្បីសេរីភាពរបស់ពួកគេ ខណៈដែលសង្គ្រាមនៅមជ្ឈិមបូព៌ាក៏បង្ហាញពីការការពារខ្លួនរបស់អ៊ីស្រាអែលពីការវាយប្រហាររបស់ក្រុមសកម្មជនហាម៉ាស។

លោក Vucic ត្រូវបានដកស្រង់សម្តីបន្តដោយទីភ្នាក់ងារព័ត៌មានរុស្ស៊ី TASS ដូចនិយាយថា៖«ការបោះឆ្នោតនេះពិតជាមានសារៈសំខាន់បំផុត។ ប្រហែលជាការបោះឆ្នោតដ៏សំខាន់បំផុតក្នុងប្រវត្តិសាស្ត្រមនុស្សជាតិ ដែលអាចនាំទៅរកសន្តិភាព ឬសង្រ្គាម។ វាប្រហែលកើតឡើង។ វាមិនប្រាកដទេ ប៉ុន្តែវាអាចកើតឡើងដែលការបោះឆ្នោតនេះនាំមកនូវសន្តិភាព ឬបន្តសង្គ្រាមដែលអាចនឹងកើតមានក្នុងសង្គ្រាមលោកលើកទីបី»។

ប្រជាជនអាមេរិកដែលមានសិទ្ធិបោះឆ្នោតជាង១៦០លាននាក់ នឹងកំណត់ជោគវាសនារបស់បេក្ខជនប្រធានាធិបតីសហរដ្ឋអាមេរិកពីររូបគឺ លោកស្រី កាម៉ាឡា ហារីស តំណាងគណបក្សប្រជាធិបតេយ្យ និងកំពុងកាន់ដំណែងអនុប្រធានាធិបតីស្រាប់ ឬក៏ លោក ដូណាល់ ត្រាំ ដែលជាអតីតប្រធានាធិបតីសហរដ្ឋអាមេរិកចន្លោះឆ្នាំ២០១៧ ដល់២០២១ សម្រាប់កាន់ដំណែងកៅអីសេតវិមានរយៈពេល៤ឆ្នាំចាប់ពីដើមឆ្នាំ២០២៥ ដល់ឆ្នាំ២០២៨៕

ដោយ រ៉ាន់ រើយ