ព័ត៌មានអន្ដរជាតិ

អគ្គរដ្ឋទូតអូស្ត្រាលីនៅអាមេរិក លុបចោលសាររិះគន់លោក ត្រាំ ពីមុនៗចេញអស់

បានផុស

៥ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

Chheang

ក្រោយលោក ដូណាល់ ត្រាំ បានឈ្នះការបោះឆ្នោត លោក Kevin Rudd ដែលជាអតីតនាយករដ្ឋមន្ត្រី និងជាអគ្គរដ្ឋទូតអូស្ត្រាលីបច្ចុប្បន្នប្រចាំក្រុងវ៉ាស៊ីនតោន បានលុបសារដែលបង្ហោះពីមុនៗទាក់ទងនឹងការរិះគន់ប្រធានាធិបតីថ្មីទី៤៧របស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rudd បាននិយាយនៅថ្ងៃព្រហស្បតិ៍នេះថា ការលុបសារទាំងនោះ ពុំបានឆ្លុះបញ្ចាំងអំពីទស្សនៈនៃរដ្ឋាភិបាលអូស្ត្រាលីឡើយ ដោយបន្ថែមថា ការបញ្ចេញមតិពីលោក ត្រាំ កាលណោះ គឺលោកធ្វើឡើងក្នុងនាមជាប្រធានស្ថាប័នស្រាវជ្រាវមួយដែលមានមូលដ្ឋាននៅសហរដ្ឋអាមេរិកប៉ុណ្ណោះ។ លោកបន្តថា ការលុបនេះ គឺដើម្បីកុំឲ្យមានភាន់ច្រឡំថាជាការបញ្ចេញមតិរបស់លោកក្នុងនាមជាមន្ត្រីការទូតរបស់រដ្ឋាភិបាលអូស្ត្រាលី។

ក្នុងចំណោមសារដែលធ្លាប់បានបង្ហោះរបស់លោក Rudd មានសារមួយដែលពណ៌នាលោក ត្រាំ ថាជា «ប្រធានាធិបតីដែលមានការបំផ្លិចបំផ្លាញបំផុតនៅក្នុងប្រវត្តិសាស្ត្រ»។

លោកស្រី Penny Wong រដ្ឋមន្ត្រីការបរទេសអូស្ត្រាលី បាននិយាយនៅថ្ងៃទី៧ខែវិច្ឆិកានេះដែរថា រដ្ឋាភិបាលលោកស្រីមានទំនុកចិត្តចំពោះសម្ព័ន្ធភាពរវាងខ្លួន និងអាមេរិក ដែលជាដៃគូសន្តិសុខដ៏ធំបំផុត ដែលបានចុះកិច្ចព្រមព្រៀង AUKUS ស្ដីពីការលក់នាវាមុជទឹកដើរដោយថាមពលនុយក្លេអ៊ែររបស់អាមេរិកឲ្យអូស្ត្រាលី នៅក្នុងពេល១០ឆ្នាំខាងមុខ។

ពាក់ព័ន្ធនឹងរឿងរបស់លោក Rudd លោកស្រី Wong បានប្រាប់ថា លោកស្រីជឿជាក់លើសមត្ថភាពអគ្គរដ្ឋទូតរូបនេះថាអាចធ្វើការយ៉ាងល្អជាមួយរដ្ឋបាលបក្សសាធារណរដ្ឋរបស់លោក ត្រាំ៕

ដោយ៖ ឈាង