ព័ត៌មានអន្ដរជាតិ

ម៉ាឡេស៊ី ត្រៀមបើកប្រតិបត្តិការរុករកយន្តហោះ MH370 សាជាថ្មី

បានផុស

៥ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

Chheang

ក្រោយបាត់ដំណឹងពីយន្តហោះ MH370 អស់រយៈពេល១ទសវត្សរ៍កន្លងមកនេះ ម៉ាឡេស៊ីនឹងចាប់ផ្ដើមគម្រោងរុករកសាជាថ្មីម្ដងទៀតហើយ ក្រោយមានសំណើគួរឲ្យទុកចិត្តមួយពីក្រុមហ៊ុនឯកជន Ocean Infinity។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះ MH370 ដែលផ្ទុកអ្នកដំណើរចំនួន ២២៧នាក់ និងនាវិក ១២នាក់ បានបាត់ដំណឹងសូន្យឈឹងរកពុំឃើញដានទាល់តែសោះ កាលពីថ្ងៃទី៨ខែមីនាឆ្នាំ២០១៤ ខណៈកំពុងធ្វើការហោះហើរពីទីក្រុងកូឡាឡាំពួរ សំដៅទៅកាន់ទីក្រុងបេកាំង ប្រទេសចិន។

ម៉ាឡេស៊ី ចិន និងអូស្ត្រាលី បានបញ្ចប់ការរុករករួមគ្នារបស់ពួកគេនៅក្នុងខែមករាឆ្នាំ២០១៧ ក្រោយមិនបានប្រទះឃើញដានអ្វីដែលសំខាន់ពីយន្តហោះ MH370។ ក្រោយមក ការរុករកដោយក្រុមហ៊ុន Ocean Infinity របស់អាមេរិក ក៏បានបញ្ចប់ប្រតិបត្តិការរបស់ពួកគេដោយពុំទទួលបានជោគជ័យផងដែរនៅក្នុងខែមិថុនាឆ្នាំ២០១៨។

យ៉ាងណា លុះដល់ខែមិថុនាឆ្នាំ២០២៤នេះ ក្រុមហ៊ុន Ocean Infinity បានដាក់សំណើទៅកាន់រដ្ឋាភិបាលម៉ាឡេស៊ី សម្រាប់ការរុករកបំណែករបស់យន្តហោះ MH370 នៅក្នុងរង្វង់ផ្ទៃទឹក ១៥ ០០០គីឡូម៉ែត្រក្រឡាពីឆ្នេរសមុទ្ររដ្ឋ Western Australia នៃប្រទេសអូស្ត្រាលី។ សំណើរបស់ក្រុមហ៊ុន Ocean Infinity គឺផ្អែកលើគោលការណ៍ «មិនឃើញ មិនយកលុយ» ដែលបានន័យថា រដ្ឋាភិបាលម៉ាឡេស៊ីនឹងមិនត្រូវបង់ប្រាក់នោះទេ បើបំណែកនៃយន្តហោះ MH370 មិនត្រូវបានប្រទះឃើញ។

លោក Anthony Loke រដ្ឋមន្ត្រីដឹកជញ្ជូនម៉ាឡេស៊ី បាននិយាយកាលពីថ្ងៃទី៥ខែវិច្ឆិកាថា ក្រុមហ៊ុន Ocean Infinity បានទាមទារទឹកប្រាក់ចំនួន ៧០លានដុល្លារ បើរកឃើញ MH370 ដែលទឹកប្រាក់នេះប្រហាក់ប្រហែលទៅនឹងថ្លៃរុករកកាលពីឆ្នាំ២០១៨អ៊ីចឹងដែរ។

ពាក់ព័ន្ធនឹងព័ត៌មានលម្អិតអពីការរុករកនេះ ក្រសួងដឹកជញ្ជូនម៉ាឡេស៊ីនឹងប្រកាសនៅពេលក្រោយទៀត៕

ដោយ៖ ឈាង