ព័ត៌មានអន្ដរជាតិ

អ៊ីរ៉ង់បញ្ជូនឃាតករទៅសម្លាប់លោកត្រាំជាការសងសឹកជូនឧត្តមសេនីយ៍ Qassem Soleimani

បានផុស

៤១ វិនាទី មុន

នៅ

ថ្ងៃសៅរ៍ ៩ វិច្ឆិកា ២០២៤

ដោយ

ប្រធានាធិបតីជាប់ឆ្នោតសហរដ្ឋអាមេរិក លោក ដូណាល់ ត្រាំ ត្រូវបានប៉ងធ្វើឃាតដោយសារតែការចង់សងសឹកពីសំណាក់អ៊ីរ៉ង់ ក្រោយអតីតប្រធានាធិបតីរូបនេះបញ្ជាឲ្យសម្លាប់ឧត្តមសេរីយ៍អ៊ីរ៉ង់កាលឆ្នាំ២០២០។ នេះបើយោងតាមឯកសារចោទប្រកាន់បុរសបីនាក់ដែលប៉ងធ្វើឃាតមិនបានសម្រេចលើលោកដូណាល់ត្រាំ ចំនួន២លើកនៅមុនបោះឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលថ្ងៃសុក្រ រដ្ឋអាជ្ញាអាមេរិកបានប្រកាសការចោទប្រកាន់មនុស្សបីនាក់ពីការប៉ុងប៉ងធ្វើឃាតលោក ដូណាល់ ត្រាំ កាលធ្វើយុទ្ធនាការឃោសនារកអ្នកគាំទ្រកាលខែកក្កដាក្នុងរដ្ឋ Pennsylvannia និងខែកញ្ញាក្នុងរដ្ឋ Florida។

ក្រសួងយុត្តិធម៌អាមេរិក បាននិយាយនៅក្នុងសេចក្តីថ្លែងការណ៍មួយថា លោក Farhad Shakeri អាយុ៥១ឆ្នាំ ជាជនជាតិអាហ្វហ្គានីស្ថាន ដែលត្រូវបានគេជឿថា ស្ថិតនៅក្នុងប្រទេសអ៊ីរ៉ង់ ត្រូវបានប្រគល់ «ភារកិច្ច» ដោយកងឆ្មាំបដិវត្តន៍អ៊ីរ៉ង់ ( IRGC) ក្នុងការផ្តល់ផែនការសម្លាប់លោក ដូណាល់ ត្រាំ ដែលបានបញ្ជាឱ្យធ្វើឃាតឧត្តមសេនីយ៍អ៊ីរ៉ង់ Qassem Soleimani ក្នុងឆ្នាំ២០២០នៅក្នុងការវាយប្រហាររបស់សហរដ្ឋអាមេរិក។

លោក Shakeri និងបុរសពីរនាក់ទៀត មានលោក Carlisle Rivera អាយុ៤៩ឆ្នាំ និង Jonathon Loadholt អាយុ ៣៦ឆ្នាំទាំងពីរនាក់រស់នៅទីក្រុង New York ត្រូវបានចោទប្រកាន់ដាច់ដោយឡែកពីគ្នាពីបទរៀបចំផែនការសម្លាប់អ្នកប្រឆាំង អ៊ីរ៉ង់-អាមេរិកនៅទីក្រុងញូវយ៉ក។

Rivera និង Loadholt ទាំងពីរនាក់នៅក្នុងមន្ទីរឃុំឃាំងរបស់សហរដ្ឋអាមេរិក និងបានបង្ហាញខ្លួននៅតុលាការនៅទីក្រុងញូវយ៉កកាលពីថ្ងៃព្រហស្បតិ៍។

នាយក FBI លោក Christopher Wray បាននិយាយថា៖«ការចោទប្រកាន់ដែលបានប្រកាសនៅថ្ងៃនេះបង្ហាញឱ្យឃើញពីការបន្តការប៉ុនប៉ងដ៏អាក្រក់របស់អ៊ីរ៉ង់ដើម្បីកំណត់គោលដៅពលរដ្ឋអាមេរិក រួមទាំងប្រធានាធិបតីជាប់ឆ្នោតដូណាល់ ត្រាំ មេដឹកនាំរដ្ឋាភិបាលផ្សេងទៀត និងអ្នកប្រឆាំងដែលរិះគន់របបនេះក្នុងទីក្រុង Tehran»។

ការវិលត្រឡាប់ទៅកាន់អំណាចរបស់លោក ដូណាល់ ត្រាំ ត្រូវគេមើលឃើញថា លោកទំនងជាងបន្ធូរបន្ថយស្ថានភាពនៅអ៊ុយក្រែននិងរុស្ស៊ី ប៉ុន្តែលោកមិនដែលលើកឡើងពីការបន្ធូរដៃសម្រាប់ការគាំទ្រអ៊ីស្រាអែល ដែលជាសត្រូវធំរបស់អ៊ីរ៉ង់នៅមជ្ឈិមបូព៌ានោះទេ៕

ដោយ រ៉ាន់ រើយ