អ៊ីស្រាអែល​ទម្លាក់​គ្រាប់​បែក​នៅ​ភាគ​ខាង​ជើង​តំបន់​ហ្គាហ្សា​សម្លាប់​កុមារ​១៣​នាក់​

អ៊ីស្រាអែលធ្វើការវាយប្រហារទៅលើជំរុំជនភៀសខ្លួន Jabalia សម្លាប់មនុស្សយ៉ាងហោចណាស់៣២នាក់ក្នុងនោះមានកុមារ១៣នាក់ ខណៈដែលក្រុមសិទ្ធិមនុស្សបានព្រមានអំពី «ស្ថានភាពធ្ងន់ធ្ងរបំផុត» នៅតំបន់ហ្គាហ្សាភាគខាងជើងចំពេលមានការឡោមព័ទ្ធយោធាអ៊ីស្រាអែលជាច្រើនសប្តាហ៍។ នេះបើយោងតាមការចេញផ្សាយរបស់សារព័ត៌មាន AP នៅថ្ងៃទី១១ខែវិច្ឆិកានេះ។

ការវាយប្រហារនេះកើតឡើងភ្លាមៗ និងដោយគ្មានការព្រមានជាមុនណាមួយ ខណៈយោងតាមសាក្សីម្នាក់ ផ្ទះដែល​រង​ការ​វាយប្រហារ​នោះពោរពេញដោយស្ត្រី និងកុមារជាច្រើននាក់ដែលត្រូវបានផ្លាស់ទីលំនៅពីផ្នែកផ្សេងៗនៃភាគខាងជើង។ ការវាយប្រហារនេះបានសម្លាប់មនុស្សយ៉ាងហោចណាស់៣២នាក់ដែលក្នុងនោះមានកុមារប្រមាណ១៣នាក់ ចំពេលដែលមានការឡោមព័ទ្ធរបស់យោធាអ៊ីស្រាអែល ចាប់តាំងពីថ្ងៃទី ៦ខែតុលាមកម្លេះ។

ចំណែកនៅក្នុងការវាយប្រហារដាច់ដោយឡែកមួយនៅហ្គាហ្សាដែលជាការវាយប្រហារតាមអាកាសរបស់អ៊ីស្រាអែលទៅលើផ្ទះមួយនៅក្នុងសង្កាត់ Sabra បានសម្លាប់លោក Wael al-Khour មន្ត្រីនៅក្រសួងសុខុមាលភាព និងសមាជិកគ្រួសារប្រាំពីរនាក់ផ្សេងទៀតរបស់គាត់ រួមទាំងប្រពន្ធ និងកូនរបស់គាត់។ យោងតាមក្រសួងសុខាភិបាលនៅហ្គាហ្សាបាននិយាយថា មនុស្សជាង៥០នាក់បានស្លាប់ជាសរុប និង១៦៤នាក់បានរងរបួសនៅក្នុងការវាយប្រហារបីលើកនៅទូទាំងតំបន់ហ្គាហ្សាកាលពីថ្ងៃអាទិត្យ។

សូមបញ្ជាក់ថា អ៊ីស្រាអែលបានសម្លាប់ប្រជាជនប៉ាឡេស្ទីនជាង ៤៣០០០ នាក់ ចាប់តាំងពីវាបានចាប់ផ្តើមសង្រ្គាមបំផ្លិចបំផ្លាញរបស់ខ្លួននៅលើតំបន់ហ្គាហ្សា បន្ទាប់ពីការវាយប្រហាររបស់ពួកហាម៉ាសកាលពីថ្ងៃទី ៧ ខែតុលា ឆ្នាំ ២០២៣ ដែលបានសម្លាប់មនុស្សជាង ១១០០នាក់ និងប្រហែល ២៥០ នាក់ផ្សេងទៀតត្រូវបានចាប់ជាឈ្លើយ។

ជាមួយគ្នានេះការិយាល័យសិទ្ធិមនុស្សរបស់អង្គការសហប្រជាជាតិ (OHCHR) បាននិយាយកាលពីថ្ងៃសុក្រថា ស្ត្រី និងកុមារមានជិត ៧០ ភាគរយនៃចំនួនអ្នកស្លាប់របស់ប៉ាឡេស្ទីន។ ក្នុងរយៈពេល ៣៦ ថ្ងៃកន្លងមកនេះ កងកម្លាំងអ៊ីស្រាអែល​បានដាក់ការឡោមព័ទ្ធនៅតំបន់ភាគខាងជើងនៃតំបន់ហ្គាហ្សា រួមទាំង Jabalia និង Beit Lahiya ដោយរារាំងការចូលនៃការផ្គត់ផ្គង់មនុស្សធម៌ដែលខ្វះខាតរួចទៅហើយ។

គិតត្រឹមថ្ងៃទី៤ខែវិច្ឆិកា ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានប៉ាន់ប្រមាណថាមនុស្សប្រហែល១០០០០០ នាក់ត្រូវបានផ្លាស់ទីលំនៅក្នុងរយៈពេល ៤ សប្តាហ៍ ពីភាគខាងជើងទៅកាន់ទីក្រុង ហ្គាហ្សាដើម្បីគេចចេញពីការវាយប្រហារ។ ទោះយ៉ាងណាមនុស្សរហូតដល់ ៩៥០០០នាក់នៅតែស្ថិតក្នុងតំបន់ហ្គាហ្សាខាងជើង៕

អត្ថបទ៖ ប៊ុន សុភាព