ទ័ព​រុស្ស៊ី និង​កូរ៉េ​ខាងជើង ៥០ ០០០​នាក់ ត្រៀម​វាយ​ដណ្ដើម​យក​តំបន់ Kursk ពី​អ៊ុយក្រែនវិញ

ទាំង​មន្ត្រីអាមេរិក និងអ៊ុយក្រែន បាន​ប្រាប់​ថា យោធារុស្ស៊ីបានប្រមូលផ្តុំកម្លាំងទាហានចំនួន ៥០ ០០០​នាក់ ក្នុង​នោះ​មាន​ទាំងទាហានកូរ៉េខាងជើងផងដែរ ត្រៀមចាប់ផ្តើមការវាយលុក ក្នុងគោលបំណងដណ្តើមយកមកវិញនូវទឹកដី​តំបន់ Kursk ដែលកំពុង​កាន់កាប់ដោយអ៊ុយក្រែន។

អាមេរិក បាន​​​ប៉ាន់ស្មាន​ថា ការ​ប្រមូល​ផ្ដុំ​កម្លាំង​ទាហាន​នេះ គឺ​រុស្ស៊ី​មិន​បាន​ដកទាហាន​នៅ​ជួរ​មុខ​របស់​ខ្លួន​ចេញពីភាគខាងកើត​ប្រទេស​អ៊ុយក្រែន ដែលជាអាទិភាពសមរភូមិដ៏សំខាន់របស់ខ្លួន​នោះ​ទេ ពោល​គឺ​រុស្ស៊ី​នឹង​ដាក់សម្ពាធលើ​រណសិរ្ស​ជាច្រើន​​ចំពោះ​ទី​​ក្រុង​កៀវ​ក្នុងពេលដំណាលគ្នា​តែ​ម្ដង។

មន្ត្រី​អាមេរិក បាន​បន្ត​ថា ទាហាន​រុស្ស៊ី​បាន​និង​កំពុង​វាយ​ដណ្តើម​យក​មកវិញ​នូវ​ទឹកដី​មួយចំនួន​ដែល​អ៊ុយក្រែន​ដណ្តើម​បាន​នៅ​តំបន់​ Kursk ក្នុងឆ្នាំនេះ ដោយ​​ប្រើ​មីស៊ីល និង​កាំភ្លើងធំ​ ប៉ុន្តែពួកគេមិនទាន់បានចាប់ផ្តើម​ប្រតិបត្តិការ​វាយប្រហារទ្រង់ទ្រាយ​​ធំ​នៅទីនោះនៅឡើយទេ។

មន្ត្រីអ៊ុយក្រែន បាននិយាយថា ពួកគេរំពឹងថានឹងមានការវាយប្រហារបែបនេះ ដែល​មាន​ការ​ចូលរួម​ពី​ទាហានកូរ៉េខាងជើង នៅ​ប៉ុន្មានថ្ងៃខាងមុខ ខណៈ​ទាហាន​​កូរ៉េខាងជើងកំពុងហ្វឹកហាត់ជាមួយកងកម្លាំងរុស្ស៊ីនៅ​​​ភាគខាងលិច​នៃ​តំបន់ Kursk ។

ការ​ត្រៀម​វាយលុករបស់រុស្ស៊ី និង​កូរ៉េខាងជើង កើតឡើង​នៅពេលដែលប្រធានាធិបតី​​អាមេរិក​ទើប​ជាប់ឆ្នោត លោក ដូណាល់ ត្រាំ (Donald Trump) ត្រៀមចូលកាន់តំណែងជាថ្មីជាមួយនឹងគោលដៅ ដែលធ្លាប់​​បញ្ជាក់ក្នុងការបញ្ចប់សង្រ្គាម​ឲ្យ​បាន​ឆាប់រហ័ស។ លោក ត្រាំ បាននិយាយតិចតួចអំពីរបៀបដែលគាត់នឹងដោះស្រាយជម្លោះ ប៉ុន្តែអនុប្រធានាធិបតី​​របស់​លោក គឺ​លោក JD Vance បានគូសបញ្ជាក់អំពីផែនការដែលនឹងអនុញ្ញាតឲ្យរុ​ស្ស៊ីរក្សាទឹកដីដែលខ្លួនបានរឹបអូសនៅក្នុង​ប្រទេស​អ៊ុយក្រែន។

មន្ត្រីយោធា និងចារកម្មអាមេរិកមួយចំនួន បានបង្កើនភាពទុទិដ្ឋិនិយមបន្ថែមទៀតអំពីទស្សនវិស័យទាំងមូលរបស់អ៊ុយក្រែន ដោយកត់សម្គាល់ថា រុស្ស៊ីទទួលបានដីជាបន្តបន្ទាប់ ទាំងនៅ​តំបន់ Kursk និងនៅភាគខាងកើតអ៊ុយក្រែន។ ក្រុមមន្ត្រី បាននិយាយថា ការធ្លាក់ចុះនេះគឺជាលទ្ធផលមួយផ្នែកនៃការបរាជ័យរបស់អ៊ុយក្រែនក្នុងការដោះស្រាយបញ្ហាកង្វះខាតដ៏សំខាន់នៅក្នុង​កង​កម្លាំងរបស់​ខ្លួន។

ប្រធានាធិបតី​អាមេរិក​បច្ចុប្បន្ន លោក ចូ បៃដិន (Joe Biden) បានគាំទ្រយ៉ាង​ខ្លាំង​ដល់អ៊ុយក្រែន ដោយជំរុញឲ្យ​សភាអនុម័តជំនួយរាប់ពាន់លានដុល្លារ និងមានភ្នាក់ងារយោធា ព្រមទាំង​​ចារកម្មអាមេរិក ផ្តល់ការស៊ើបការណ៍សម្ងាត់ ដើម្បីជួយអ៊ុយក្រែន ប្រយុទ្ធនឹងសង្រ្គាម។

មន្ត្រីលោកខាងលិច​សុំ​មិន​បញ្ចេញ​ឈ្មោះ​ម្នាក់ បាន​ប្រាប់​ថា ការលុកលុយដ៏គួរឲ្យ​ភ្ញាក់ផ្អើលរបស់អ៊ុយក្រែនចូលទៅក្នុង​តំបន់ Kursk កាល​ពី​ខែសីហា បានកាត់បន្ថយកម្លាំងរបស់ខ្លួននៅទូទាំងសមរភូមិភាគខាងកើតអ៊ុយក្រែន ដោយទុកឲ្យ​ពួកគេងាយរងគ្រោះដោយសារការ​វាយ​ប្រហារ​យ៉ាង​ឆាប់​រហ័ស​របស់រុស្ស៊ី។ យ៉ាង​ណា​មិញ មន្ត្រីនោះ និងមន្ត្រីអាមេរិក បាននិយាយ​ដូច​គ្នា​ថា អ៊ុយក្រែននៅតែមានការការពារដ៏រឹងមាំនៅក្នុង​តំបន់ Kursk ហើយប្រហែលជាអាចទប់​ទល់​​បានយ៉ាងហោចណាស់មួយរយៈ​ពេល​ទៀត។

សូម​បញ្ជាក់​ថា លោកខាងលិច និងអ៊ុយក្រែន បាន​​​​លើក​ឡើង​ថា វត្តមាន​របស់​កងកម្លាំងកូរ៉េខាងជើង គឺជាការកើនឡើង​កម្ដៅ​​នៃ​ជម្លោះ​ដ៏សំខាន់មួយ បន្ទាប់ពីសង្រ្គាមជាងពីរឆ្នាំ​កន្លង​មក​នេះ។ អាមេរិក បាន​​បង្ហើប​ថា កូរ៉េ​ខាង​ជើង​ បាន​បញ្ជូន​កង​កម្លាំង​ច្រើន​ជាង ១​ម៉ឺន​នាក់​​ឲ្យ​​ជួយ​រុស្ស៊ី​ប្រយុទ្ធ​នៅ​តំបន់ Kursk។ ទាហាន​កូរ៉េ​ខាង​ជើង​ទាំង​នោះ បាន​បន្លំ​ស្លៀក​ពាក់​នៅ​ក្នុង​​​ឈុត​ឯកសណ្ឋាន​ជា​​ទាហាន​រុស្ស៊ី ហើយ​​រុស្ស៊ី​បាន​បំពាក់​ពួក​គេ​ជាមួយ​កាំភ្លើង​យន្ត កាំភ្លើង​លប​បាញ់ មីស៊ីល​ប្រឆាំង​រថក្រោះ និង​គ្រាប់​បែក​ដៃ៕

ដោយ៖ ឈាង