ព័ត៌មានអន្ដរជាតិ

កូរ៉េខាងជើង ផ្ដល់សច្ចាប័នលើសន្ធិសញ្ញាការពារគ្នាទៅវិញទៅមកជាមួយរុស្ស៊ី

បានផុស

២ នាទី មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

Chheang

ទីភ្នាក់ងារព័ត៌មានរដ្ឋកូរ៉េខាងជើង KCNA បានចុះផ្សាយនៅទី១២ខែវិច្ឆិកានេះថា រដ្ឋាភិបាលក្រុងព្យុងយ៉ាងបានផ្តល់សច្ចាប័នលើសន្ធិសញ្ញាការពារគ្នាទៅវិញទៅមកជាមួយរុស្ស៊ី ដែលបានចុះហត្ថលេខាដោយមេដឹកនាំប្រទេសទាំងពីរកាលពីខែមិថុនា ដោយអនុញ្ញាតឲ្យភាគីនីមួយៗ អាចរកជំនួយពីភាគីម្ខាងទៀត ក្នុងករណីមានការវាយប្រហារដោយប្រដាប់អាវុធ។

លោក វ៉្លាឌឺមៀរ ពូទីន និងលោក គីម ជុងអ៊ុន (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់ KCNA នេះ បានកើតឡើងចំពេលមានការរិះគន់ពីអន្តរជាតិ ជុំវិញការបង្កើនកិច្ចសហប្រតិបត្តិការយោធារវាងប្រទេសទាំងពីរ ដោយកូរ៉េខាងជើងបានបញ្ជូនទាហានរាប់ម៉ឺននាក់ទៅកាន់រុស្ស៊ី ដើម្បីគាំទ្រសង្រ្គាមប្រឆាំងនឹងអ៊ុយក្រែន។

KCNA បានបញ្ជាក់ថា មេដឹកនាំកូរ៉េខាងជើង លោក គីម ជុងអ៊ុន បានចុះហត្ថលេខាលើក្រឹត្យមួយដើម្បីផ្តល់សច្ចាប័នលើកិច្ចព្រមព្រៀង កាលពីថ្ងៃចន្ទ ដោយបន្ថែមថាវានឹងមានប្រសិទ្ធភាពនៅពេលដែលភាគីទាំងពីរផ្លាស់ប្តូរការផ្តល់សច្ចាប័នគ្នា។

គួរបញ្ជាក់ថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន ក៏បានចុះហត្ថលេខាលើសន្ធិសញ្ញានេះចូលជាច្បាប់ផងដែរ ដែលចែងថា ប្រទេសទាំងពីរគួរតែ «ផ្តល់យោធា និងជំនួយផ្សេងទៀតជាបន្ទាន់ ដោយប្រើគ្រប់មធ្យោបាយដែលមាន» ប្រសិនបើភាគីណាមួយស្ថិតក្នុងស្ថានភាពសង្រ្គាម។

លោក គីម បានចុះកិច្ចព្រមព្រៀងជាមួយលោក ពូទីន នៅក្នុងកិច្ចប្រជុំកំពូលមួយកាលពីខែមិថុនា ដោយបានហៅវាថាជាជំហានមួយ ដើម្បីលើកកម្ពស់ទំនាក់ទំនងទ្វេភាគី។

កូរ៉េខាងត្បូង សហរដ្ឋអាមេរិក និងអ៊ុយក្រែន បាននិយាយថា មានទាហានកូរ៉េខាងជើងជាង ១ម៉ឺននាក់នៅក្នុងប្រទេសរុស្ស៊ី ហើយមន្ត្រីសហរដ្ឋអាមេរិក និងរដ្ឋមន្ត្រីការពារជាតិអ៊ុយក្រែន បានប្រាប់ថា ពួកគេមួយចំនួនបានចូលរួមរួចមកហើយក្នុងការប្រយុទ្ធនៅតំបន់ Kursk ជិតព្រំដែនអ៊ុយក្រែន។

ប្រធានាធិបតីអ៊ុយក្រែនលោក Volodymyr Zelensky បានលើកឡើងកាលពីសប្តាហ៍មុនថា ទាហានកូរ៉េខាងជើងបានរងរបួសនៅក្នុងការប្រយុទ្ធជាមួយកងកម្លាំងរបស់លោក ហើយការប្រយុទ្ធដំបូងរវាងពួកគេ «បានបើកទំព័រថ្មីមួយនៃអស្ថិរភាពនៅក្នុងពិភពលោក»៕

ដោយ៖ ឈាង

ចុចអាន៖ ពូទីន អនុម័តច្បាប់ជួយគ្នាទៅវិញទៅមក ជាមួយកូរ៉េខាងជើង បើប្រទេសណាត្រូវវាយប្រហារ