ព័ត៌មានអន្ដរជាតិ

មិនធ្លាប់មាន! អូស្ត្រាលី កើតមានរន្ទះបាញ់ជាង ១លានដងក្នុងពេលត្រឹម២៤ម៉ោង

បានផុស

២ ខែ មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

Chheang

ប្រទេសអូស្ត្រាលី បានរងការវាយប្រហារដោយរន្ទះបាញ់ជាង ១,១លានដង កាលពីថ្ងៃទី១០ខែវិច្ឆិកា ដែលជាកំណត់ត្រាថ្មីសន្លាងមិនធ្លាប់មានពីមុនមក។ នេះបើយោងតាមរបាយការណ៍ពីទីភ្នាក់ងារឧតុនិយមអូស្ត្រាលី Weathezone។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅតំបន់ Uluru រន្ទះបាញ់បានកើតមានចំនួន ៧១៩ ០៦៨ដង លើផ្ទៃដីប្រវែង ៨០០គីឡូម៉ែត្រ អំឡុងពេលមានព្យុះដ៏ធំមួយ។ ចំណែកឯភាគអាគ្នេយ៍នៃរដ្ឋ Queensland មានភ្លៀងធ្លាក់ខ្លាំង និងព្យុះ ហើយគេមើលឃើញមានរន្ទះបាញ់ចំនួន ៣២៨ ៦២៧ដង។

ដោយឡែកនៅតំបន់ភាគខាងជើងប្រទេសអូស្ត្រាលីវិញ មានរន្ទះបាញ់ប្រហែល ៩៥ ០០០ដង។

កាលពីថ្ងៃអាទិត្យ នៅរដ្ឋ Queensland ការប្រគំតន្ត្រីមួយចំនួន ត្រូវបានលុបចោល ហើយប្រជាពលរដ្ឋរាប់ពាន់នាក់ ត្រូវបានជម្លៀសខ្លួន នៅអំឡុងពេលកំពុងកើតមានព្យុះភ្លៀងដ៏អាក្រក់។ កសិដ្ឋានមួយកន្លែងនៅក្រុង Dalby ត្រូវបានរន្ទះបាញ់ចំបណ្ដាលឲ្យឆេះគំនរចំប៉ើងមានតម្លៃ ៣ម៉ឺនដុល្លារ។

ភ្នាក់ងារឧតុនិយម បានចេញសារព្រមានពីគ្រោះថ្នាក់នៃរន្ទះបាញ់ និងព្យុះ ដែលត្រូវបានព្យាករថានឹងបន្តរហូតដល់ប៉ុន្មានថ្ងៃខាងមុខទៀត៕

ដោយ៖ ឈាង