លោក បៃដិន និងអ្នកស្រី ហារីស ត្រូវគេឃើញនៅជាមួយគ្នាលើកដំបូង ក្រោយចាញ់ឆ្នោត

នេះជាលើកដំបូងហើយចាប់តាំងពីគណបក្សប្រជាធិបតេយ្យចាញ់ឆ្នោត ដែលលោកស្រី កាម៉ាឡា ហារីស និងលោក ចូ បៃដិន ត្រូវបានគេឃើញនៅជាមួយគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វត្តមានរបស់អ្នកទាំងពីរគឺក្នុងពិធីរម្លឹកវិញ្ញាណក្ខន្ធដល់ទាហានអាមេរិក នៅទីបញ្ចុះសពជាតិ Arlington ក្នុងរដ្ឋ Virginia កាលពីព្រឹកថ្ងៃទី១១ខែវិច្ឆិកា។

អំឡុងពិធីដាក់កម្រងផ្កា លោក បៃដិន និយាយថា «នេះគឺជាលើកចុងក្រោយហើយដែលខ្ញុំឈរនៅទីនេះ នៅ Arlington ក្នុងឋានៈជាមេបញ្ជាការ។ វាពិតជាកិត្តិយសដ៏ធំបំផុតនៃជីវិតរបស់ខ្ញុំ ដែលបានដឹកនាំ បម្រើ ថែរក្សា និងការពារអ្នក ដូចដែលអ្នកបានការពារយើងពីមួយជំនាន់ទៅមួយជំនាន់»។

លោក បៃដិន បានបញ្ចប់យុទ្ធនាការឃោសនាបោះឆ្នោតអាណត្តិថ្មី ក្នុងខែកក្កដា បន្ទាប់ពីខ្លួនធ្វើមិនបានល្អទាល់តែសោះ ក្នុងការជជែកដេញដោលជាមួយលោក ត្រាំ ហើយបន្ទាប់មកក៏ប្រគល់តួនាទីជាបេក្ខជនឈរឈ្មោះខាងគណបក្សប្រជាធិបតេយ្យ ទៅឲ្យអ្នកស្រីហារីស ជំនួសវិញ។

យ៉ាងណា អ្នកស្រីហារីស នៅតែមិនអាចយកឈ្នះលោក ត្រាំ ខាងគណបក្សសាធារណរដ្ឋបាន ហើយក្រោយបរាជ័យនៅថ្ងៃទី៥ខែវិច្ឆិកា ជំនួយការរបស់ហារីស មួយចំនួន បានបន្ទោសប្រធានាធិបតីបៃដិនចំៗ ថាគាត់គួរតែដកខ្លួនឲ្យលឿនជាងនេះ ទម្រាំគាត់សម្រេចចិត្ត អ្វីៗគឺហួសពេលហើយ៕

អត្ថបទ៖ សុខ សុវណ្ណ

ចុចអាន៖ លោក ត្រាំ តែងតាំងបុគ្គលប្រឆាំងអ៊ីរ៉ង់ ឲ្យកាន់តំណែងជាឯកអគ្គរដ្ឋទូតប្រចាំ UN