ព័ត៌មានអន្ដរជាតិ

អាមេរិក កូរ៉េខាងត្បូង និងជប៉ុន រៀបចំសមយុទ្ធត្រីភាគីលើកទី២នៅសប្ដាហ៍នេះ

បានផុស

២ ខែ មុន

នៅ

ថ្ងៃពុធ ១៣ វិច្ឆិកា ២០២៤

ដោយ

Chheang

សមយុទ្ធ Freedom Edge នឹងត្រូវរៀបចំឡើងជាលើកទី២នៅក្នុងឆ្នាំ២០២៤នេះ ដោយមានការចូលរួមពីប្រទេសចំនួន៣ ដូចជា សហរដ្ឋអាមេរិក កូរ៉េខាងត្បូង និងជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមអគ្គសេនាធិការចម្រុះកូរ៉េខាងត្បូង សមយុទ្ធត្រីភាគីលើកនេះ នឹងប្រព្រឹត្តទៅចាប់ពីថ្ងៃទី១៣ដល់ថ្ងៃទី១៥ខែវិច្ឆិកា នៅផ្លូវសមុទ្រអន្តរជាតិនៃកោះ Jeju ដែលជាកោះធំបំផុតរបស់ប្រទេសកូរ៉េខាងត្បូង។

ប្រទេសសម្ព័ន្ធមិត្តទាំងបី បានធ្វើសមយុទ្ធត្រីភាគីជាលើកដំបូងដែលមិនធ្លាប់មាននៅក្នុងខែមិថុនា ដោយអនុលោមតាមកិច្ចព្រមព្រៀងដែលពួកគេបានធ្វើក្នុងអំឡុងកិច្ចប្រជុំកំពូល Camp David កាលពីខែសីហាឆ្នាំមុន។

សម្រាប់សមយុទ្ធនេះ កូរ៉េខាងត្បូងនឹងចល័តនាវាពិឃាតកងទ័ពជើងទឹកពីរគ្រឿង រួមទាំងនាវាពិឃាត Aegis Seoae Ryu Seong-ryong ក៏ដូចជាយន្តហោះល្បាតដែនសមុទ្រ P-3 និងយន្តហោះចម្បាំង F-35A និង F-15K។

សមយុទ្ធនេះ ក៏មានការចូលរួមពីនាវាផ្ទុកយន្តហោះ USS George Washington របស់កងទ័ពជើងទឹកអាមេរិក និងនាវាពិឃាត JS Haguro របស់ជប៉ុនផងដែរ។

អគ្គសេនាធិការចម្រុះកូរ៉េខាងត្បូង បាននិយាយថា សមយុទ្ធនឹងរួមបញ្ចូលលំហាត់យោធាពីលើអាកាសដែលប្រើប្រាស់យន្តហោះចម្បាំងជំនាន់ទីប្រាំ ក៏ដូចជាការហ្វឹកហ្វឺនការពារមីស៊ីលតាមសមុទ្រ សង្គ្រាមប្រឆាំងនាវាមុជទឹក ការរារាំងដែនសមុទ្រ និងការហ្វឹកហ្វឺនការការពារតាមអ៊ីនធឺណិត៕

ដោយ៖ ឈាង