រដ្ឋអាជ្ញា វៀតណាម ប្រាប់តុលាការកុំឲ្យលើកលែងទោសប្រហារជីវិតអតីតសេដ្ឋិនីអចលនទ្រព្យ

រដ្ឋអាជ្ញាវៀតណាមកាលពីថ្ងៃសុក្រ បានជំរុញឲ្យតុលាការឧទ្ធរណ៍គាំទ្រការកាត់ទោសប្រហារជីវិតលើលោកស្រី Truong My Lan ដោយលើកអង្គហេតុថា មិនមានការវិវឌ្ឍន៍ថ្មីនៅក្នុងសវនាការកាត់ក្ដីលើអតីតសេដ្ឋិនីអចលនទ្រព្យរូបនេះឡើយ ។

លោកស្រី Truong My Lan ដែលត្រូវបានកាត់ទោសប្រហារជីវិតកាលពីខែមេសា ពីបទកេងបន្លំប្រាក់ ២៧ ពាន់លានដុល្លារពីធនាគារ Saigon Commercial (SCB) ក្នុងរយៈពេល ១០ ឆ្នាំនោះ ក៏មានវត្តមានក្នុងតុលាការឧទ្ធរណ៍នៅទីក្រុងហូជីមិញផងដែរ ។

រដ្ឋអាជ្ញាបាននិយាយថា ទោះបីជាប្រធានក្រុមហ៊ុនអភិវឌ្ឍន៍អចលនទ្រព្យ Van Thinh Phat រូបនេះបានបង្ហាញវិប្បដិសារី និងសន្យាប្រើប្រាស់ទ្រព្យសម្បត្តិរាប់រយកន្លែងរបស់លោកស្រី ដើម្បីទូទាត់សំណងដល់ធនាគារ SCB សម្រាប់ការខាតបង់ដែលលោកស្រីបានបង្កឡើងក៏ដោយ ប៉ុន្តែទោសទណ្ឌទាំងនោះមិនគ្រប់គ្រាន់ដើម្បីលុបចោលការកាត់ទោសប្រហារជីវិតរបស់លោកស្រីឡើយ ។

ក្រៅពីការកាត់ទោសប្រហារជីវិត អតីតសេដ្ឋិនីវ័យ ៦៨ ឆ្នាំរូបនេះក៏ត្រូវបានកាត់ទោសឲ្យជាប់ពន្ធនាគាររយៈពេល ២០ ឆ្នាំផងដែរពីបទស៊ីសំណូក និងបំពានបទប្បញ្ញត្តិធនាគារ ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី១៥ ខែវិច្ឆិកា ។

ទន្ទឹមនោះ កាលពីខែមុន នៅក្នុងការកាត់ក្តីដាច់ដោយឡែកមួយ លោកស្រី Truong My Lan ក៏ត្រូវបានកាត់ទោសឲ្យជាប់ពន្ធនាគារមួយជីវិតពីបទ “ក្លែងបន្លំទ្រព្យសម្បត្តិ” តាមរយៈការចេញមូលបត្របំណុល និងការផ្ទេរប្រាក់ឆ្លងដែនខុសច្បាប់ជាដើម ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖ព្យុះមួយទៀត ចូលដល់ប្រទេស វៀតណាម