ជាប្រវត្តិសាស្រ្ត! ព្យុះ៤ ត្រូវថតជាប់ក្នុងពេលតែមួយ នៅមហាសមុទ្រប៉ាស៊ីហ្វិក

មិនធ្លាប់មានសោះឡើយក្នុងប្រវត្តិសាស្រ្តដែលព្យុះរហូតដល់ទៅ៤ ត្រូវបានថតជាប់ក្នុងពេលតែមួយនៅមហាសមុទ្រប៉ាស៊ីហ្វិក។

តាមការចុះផ្សាយរបស់ VN Express កាលពីថ្ងៃអាទិត្យទី១៧ខែវិច្ឆិកាឆ្នាំ២០២៤, រូបភាពនេះ គឺថតដោយផ្កាយរណបអង្គការណាសា នៅថ្ងៃទី១១ខែវិច្ឆិកា បង្ហាញពីព្យុះ Toraji, Yinxing, Usagi និង Man-yi ស្ថិតនៅជិតប្រទេសហ្វីលីពីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Gene Huang អ្នកព្យាករនៅរដ្ឋបាលអាកាសធាតុកោះតៃវ៉ាន់ បានប្រាប់កាសែត New York Times ថា មិនធ្លាប់មានសោះឡើយដែលគេឃើញព្យុះចំនួន៤ ក្នុងពេលតែមួយបែបនេះ ចាប់តាំងពីទិន្នន័យព្យុះ ត្រូវបានចងក្រងក្នុងឆ្នាំ១៩៥១។

ចំណែកលោក Olivia Shuk-ming Lee មន្ត្រីវិទ្យាសាស្ត្រជាន់ខ្ពស់នៅមន្ទីរសង្កេតការណ៍ក្រុងហុងកុងនិយាយថា ច្រើនបំផុតហើយ មានព្យុះចំនួន៣ ដែលគេឃើញលើមហាសមុទ្រប៉ាស៊ីហ្វិកនិងសមុទ្រចិនខាងត្បូង ប៉ុន្តែមិនធ្លាប់ឃើញមានដល់ទៅ៤ដូចលើកនេះទេ ហើយព្យុះ៣នោះ ត្រូវគេឃើញចុងក្រោយបំផុតក្នុងឆ្នាំ២០០៩។

សូមបញ្ជាក់ថា មួយឆ្នាំៗ មានខ្យល់ព្យុះមិនក្រោម២០ឡើយ ដែលវាយប្រហារប្រទេសហ្វីលីពីនឬដែនទឹកជុំវិញខ្លួននៃតំបន់អាស៊ីអាគ្នេយ៍ ដោយសម្លាប់មនុស្សរាប់សិបនាក់។

ក្រៅពីបង្កទុក្ខវេទនាដល់មនុស្សហើយនោះ ព្យុះក៏បំផ្លិចបំផ្លាញសំណង់ហេដ្ឋារចនាសម្ព័ន្ធ និងបង្កការខាតបង់ដល់សេដ្ឋកិច្ចអស់ទឹកប្រាក់រាប់ពាន់លានដុល្លារផងដែរ៕

អត្ថបទ៖ សុខ សុវណ្ណ

ចុចអាន៖ ព្យុះទី២៤ មែនយី បានវិវដ្ដទៅជាព្យុះសង្ឃរា និងមានឥទ្ធិពលខ្លាំងលើរបបខ្យល់មូសុងឦសាន