ព័ត៌មានអន្ដរជាតិ

រុស្ស៊ី វេតូសេចក្ដីសម្រេច UN ដែលបង្កើតឲ្យមានបទឈប់បាញ់នៅស៊ូដង់

បានផុស

៣ ខែ មុន

នៅ

ថ្ងៃអង្គារ ១៩ វិច្ឆិកា ២០២៤

ដោយ

Chheang

ប្រទេសរុស្ស៊ី នៅថ្ងៃចន្ទនេះបានវេតូ (ជំទាស់) លើសេចក្តីព្រាងនៃសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឲ្យអនុវត្តបទឈប់បាញ់ភ្លាមៗ ដើម្បីបញ្ចប់ជម្លោះរវាងកងទ័ពស៊ូដង់ និងកងកម្លាំងគាំទ្ររហ័ស (RSF) ដែលបានសម្លាប់មនុស្សអស់ជាង ២ម៉ឺននាក់ និងបង្ខំឲ្យពលរដ្ឋជាង ១១លាននាក់ត្រូវផ្លាស់ប្ដូរទីលំនៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីព្រាងនេះ ដែលដឹកនាំដោយចក្រភពអង់គ្លេស និងប្រទេសសៀរ៉ាឡេអូន ត្រូវបានដាក់ឲ្យបោះឆ្នោតនៅក្នុងក្រុមប្រឹក្សាសន្តិសុខដែលមានសមាជិកចំនួន ១៥ប្រទេស។

រុស្ស៊ី ជាប្រទេសតែមួយគត់ក្នុងចំណោមសមាជិកប្រទេសទាំងអស់ ដែលបានដាក់វេតូប្រឆាំងនឹងសេចក្ដីសម្រេច។

រដ្ឋមន្ត្រីការបរទេសអង់គ្លេស លោក David Lammy បាននិយាយថា ទង្វើរបស់រុស្ស៊ីនេះ បានបង្ហាញពីចេតនាដ៏អាក្រក់ និងឃោរឃៅ។

លោក Lammy បានលើកឡើងថា៖ «ប្រទេសមួយគឺជាសត្រូវនៃសន្តិភាព។ វេតូរបស់រុស្ស៊ីនេះគឺជាការអាម៉ាស់មួយ ហើយវាបង្ហាញដល់ពិភពលោកម្តងទៀតនូវពណ៌ពិតរបស់រុស្ស៊ី»។ លោកបន្តថា៖ «តើមានជនជាតិស៊ូដង់ប៉ុន្មាននាក់ទៀតត្រូវគេសម្លាប់ តើមានស្ត្រីប៉ុន្មាននាក់ទៀតត្រូវគេរំលោភ តើមានកុមារប៉ុន្មាននាក់ទៀតត្រូវបន្តអត់អាហារ មុនពេលរុស្ស៊ីចេញសកម្មភាព? រុស្ស៊ីនឹងត្រូវតែពន្យល់ទៅកាន់សមាជិកអង្គការសហប្រជាជាតិទាំងមូលនៅពេលឥឡូវនេះ»។

ជាការឆ្លើយតប លោក Dmitry Polyanskiy តំណាងរុស្ស៊ីប្រចាំអង្គការសហប្រជាជាតិ បានប្រាប់ថា រុស្ស៊ីយល់ស្របដែលថា ជម្លោះនៅស៊ូដង់ត្រូវការដំណោះស្រាយយ៉ាងឆាប់រហ័ស ប៉ុន្តែតួនាទីរបស់ក្រុមប្រឹក្សាសន្តិសុខ គឺជួយឲ្យបទឈប់បាញ់មានការយល់ព្រមដោយភាគីទាំងសងខាង។

លោកបាននិយាយថា៖ «បញ្ហាចម្បងនៃសេចក្តីព្រាងច្បាប់របស់ចក្រភពអង់គ្លេសគឺថា វាមានការយល់ខុសអំពីអ្នកណាដែលត្រូវទទួលខុសត្រូវចំពោះការការពារជនស៊ីវិលក្នុងប្រទេសស៊ូដង់។ យើងយល់ឃើញថា វាគួរតែជារដ្ឋាភិបាលនៃប្រទេសស៊ូដង់តែមួយគត់ដែលគួររ៉ាប់រងតួនាទីនោះ»។

សេចក្តីព្រាងនៃសេចក្ដីសម្រេច បានអំពាវនាវឲ្យភាគីទាំងពីរនៅស៊ូដង់បំពេញកាតព្វកិច្ចរបស់ពួកគេក្រោមសេចក្តីប្រកាស Jeddah ដែលបានចុះហត្ថលេខានៅថ្ងៃទី១១ខែឧសភាឆ្នាំ២០២៣ ព្រមទាំងមានការថ្កោលទោសចំពោះការវាយប្រហាររបស់កងកម្លាំង RSF នៅទីក្រុង El Fasher និងទីតាំងផ្សេងទៀត។

សេចក្ដីសម្រេច ក៏បានអំពាវនាវឲ្យមានការស៊ើបអង្កេតលើការរំលោភសិទ្ធិមនុស្ស និងការដាក់ទណ្ឌកម្មចំពោះអ្នកដែលទទួលខុសត្រូវ ដោយជំរុញឲ្យរដ្ឋជាសមាជិកជៀសវាង «ការជ្រៀតជ្រែកពីខាងក្រៅ»៕

ដោយ៖ ឈាង