ព័ត៌មានអន្ដរជាតិ

សុវត្ថិភាពសាធារណៈនៅចិនបង្កក្តីបារម្ភ ក្រោយជួបការវាយប្រហារផ្ទួនៗលើហ្វូងមនុស្ស

បានផុស

១ ខែ មុន

នៅ

ថ្ងៃពុធ ២០ វិច្ឆិកា ២០២៤

ដោយ

រថយន្តមួយគ្រឿងបានបើកទៅបុកហ្វូងមនុស្សនៅខាងក្រៅសាលាបឋមសិក្សាមួយក្នុងខេត្តហ៊ូណាន ភាគខាងត្បូងប្រទេសចិន បានបង្កឲ្យមនុស្សជាច្រើនរងរបួសធ្ងន់និងស្រាល ដោយបង្កជាក្តីបារម្ភអំពីសុវត្ថិភាពសាធារណៈ ក្រោយមានគ្រោះថ្នាក់ជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន BBC បានដកស្រង់ការផ្សាយរបស់ប្រព័ន្ធរដ្ឋ ដែលបាននិយាយថា «សិស្ស និងមនុស្សពេញវ័យជាច្រើននាក់បានរងរបួស និងដួលដេកនៅលើដី» ហើយមនុស្សជាច្រើននាក់កំពុងបញ្ជូនទៅសម្រាកព្យាបាលនៅមន្ទីរពេទ្យ ខណៈអ្នកបើកបររថយន្តមិនស្គាល់ម៉ាក SUV ពណ៌ស ត្រូវបានឪពុកម្តាយ និងសន្តិសុខសាលា ចាប់បានប្រគល់ឲ្យសមត្ថកិច្ច។

នេះជាការវាយប្រហារលើកទី៣លើហ្វូងមនុស្សក្នុងប្រទេសចិន ក្នុងរយៈពេលមួយសប្តាហ៍ ហើយវាបានជំរុញឱ្យមានការព្រួយបារម្ភអំពីសុវត្ថិភាពសាធារណៈ។

វីដេអូពីកន្លែងកើតហេតុដែលបានបង្ហោះនៅលើគណនី WeChat ឯកជនមួយបានបង្ហាញក្មេងៗមួយចំនួនដេកនៅលើដី ខណៈខ្លះទៀតកាន់កាបូបសិស្សកំពុងរត់គេចខ្លួនដោយភាពភិតភ័យ។ វីដេអូមួយផ្សេងទៀតដែលថតបានភ្លាមៗបន្ទាប់ពីឧប្បត្តិហេតុនេះបានបង្ហាញឱ្យឃើញអ្នកថ្មើរជើងដែលមានកំហឹងបានវាយរថយន្ត SUV ជាមួយនឹងប៉ែលខណៈពេលដែលអ្នកបើកបរនៅតែខាងក្នុង។ ពេលនោះ គេឃើញអ្នកបើកបររថយន្ត ដើរចេញពីម្ខាងទៀត នៃរថយន្ត តែត្រូវបានអ្នកឈរក្បែរឡោមព័ទ្ធ និងចាប់វាយគាត់ដោយដំបង។

សូមបញ្ជាក់ថាការវាយប្រហារស្រដៀងគ្នានេះក្នុងប៉ុន្មានថ្ងៃថ្មីៗនេះបានបង្កឱ្យមានការពិភាក្សាលើអ៊ីនធឺណិតអំពីបាតុភូតសង្គមនៃ «ការសងសឹកលើសង្គម» ដែលបុគ្គលម្នាក់ៗធ្វើសកម្មភាពលើដោយសារបញ្ហាផ្ទាល់ខ្លួនដោយវាយប្រហារមនុស្សផ្សេងៗឬសាធារណៈជន។

កាលពីថ្ងៃសៅរ៍ មនុស្ស៨នាក់បានស្លាប់ និង ១៧នាក់ផ្សេងទៀតបានរងរបួសនៅក្នុងការវាយប្រហារដោយកាំបិតនៅសាលាវិជ្ជាជីវៈមួយនៅភាគខាងកើតប្រទេសចិន ដែលជនសង្ស័យជាអតីតសិស្សនៅសាលាអាយុ ២១ ឆ្នាំ ដែលចង់បញ្ចប់ការសិក្សានៅឆ្នាំនេះ ប៉ុន្តែប្រឡងមិនជាប់។

ចំណែកមុននោះកាលពីថ្ងៃទី ១២ ខែវិច្ឆិកា មនុស្សយ៉ាងតិច ៣៥ នាក់បានស្លាប់នៅក្នុងការវាយប្រហារដោយរថយន្តនៅភាគខាងត្បូងប្រទេសចិន នៅពេលដែលបុរសម្នាក់បានរត់ចូលទៅក្នុងក្រុមមនុស្សដែលកំពុងហាត់ប្រាណនៅលើផ្លូវកីឡាមួយ។ ហើយនៅក្នុងខែតុលា នៅទីក្រុងសៀងហៃ បុរសម្នាក់បានសម្លាប់មនុស្ស ៣ នាក់ និងរបួស ១៥ នាក់ទៀត នៅក្នុងការបាញ់ប្រហារនៅផ្សារទំនើបមួយ។

យោងតាមកំណត់ត្រារបស់ប៉ូលិស មានឧប្បត្តិហេតុនៃអំពើហឹង្សាមិនរើសមុខចំនួន ១៩នៅក្នុងប្រទេសចិនក្នុងឆ្នាំនេះ ដែលជនល្មើសមិនត្រូវបានស្គាល់ដោយជនរងគ្រោះ។ មនុស្ស ៦៣ នាក់បានស្លាប់ និង ១៦៦ នាក់បានរងរបួសនៅក្នុងការវាយប្រហារទាំងនេះ។ នេះជាការកើនឡើងយ៉ាងខ្លាំងកាលពីឆ្នាំមុន ដែលមានមនុស្សស្លាប់ ១៦ នាក់ និងរបួស ៤០ នាក់ក្នុងឆ្នាំ ២០២៣។

ខណៈពេលដែលឧបទ្ទវហេតុនៅតែកើតមានជារឿយៗ ហើយវីដេអូដែលតែងតែផ្សព្វផ្សាយភ្លាមៗនៅលើបណ្តាញសង្គមបានជំរុញឲ្យមានការព្រួយបារម្ភ និងភ័យខ្លាចក្នុងចំណោមមនុស្ស។ ប្រធានាធិបតីចិនលោក Xi Jinping បានបញ្ជាឱ្យមន្ត្រីក្នុងតំបន់ធានាសុវត្ថិភាព និងស្ថិរភាពសង្គម នៃសហគមន៍ និងទប់ស្កាត់យ៉ាងតឹងរ៉ឹងនូវករណីធ្ងន់ធ្ងរ៕