អ៊ុយក្រែន បាញ់មីស៊ីលអាមេរិក ចូលដីរុស្ស៊ីជាលើកដំបូង ខណៈរុស្ស៊ី គំរាមសងសឹក

តាមការចុះផ្សាយរបស់ RT កាលពីថ្ងៃអង្គារទី១៩ខែវិច្ឆិកាឆ្នាំ២០២៤, កងទ័ពអ៊ុយក្រែន បានបាញ់មីស៊ីលដែលផ្គត់ផ្គង់ដោយអាមេរិក ចូលទៅក្នុងទឹកដីរុស្ស៊ីហើយ ខណៈទីក្រុងកៀវអះអាងថា ការវាយប្រហារនោះគឺកំណត់គោលដៅជាពិសេសលើឃ្លាំងគ្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ុយក្រែន បញ្ជាក់ថា ខ្លួនបានបើកការវាយប្រហារដោយមីស៊ីលរយៈចម្ងាយឆ្ងាយ ATACMS ចំនួន៦គ្រាប់ ចូលទៅក្នុងតំបន់ Bryansk ជាលើកដំបូង ដើម្បីកម្ទេចឃ្លាំងគ្រាប់ ប៉ុន្តែក្រសួងការពារជាតិរុស្ស៊ី ចេញសេចក្តីថ្លែងការណ៍ថា មានមីស៊ីល៥គ្រាប់ ត្រូវស្ទាក់ចាប់បានដោយប្រព័ន្ធការពារដែនអាកាស S-400 និង Pantsir ចំណែកមួយគ្រាប់ទៀត បានហោះទៅបុកចំអគារមួយ បង្កជាការខូចខាតធ្ងន់ធ្ងរ។

ទោះបីជាយ៉ាងណាក៏ដោយ ភាគីរុស្ស៊ី មិនបានលើកឡើងពីតួលេខជនរងគ្រោះឡើយ។

ជុំវិញរឿងនេះ រដ្ឋមន្ត្រីការបរទេសរុស្ស៊ីលោក Sergei Lavrov និយាយថា ការវាយប្រហារនេះបានបង្ហាញយ៉ាងច្បាស់ក្រឡែត អំពីបំណងរបស់ប្រទេសលោកខាងលិច ចង់ឲ្យជម្លោះកាន់តែរីកធំនិងក្តៅឆាបឆួល។ លោកបន្តថា «យើងនឹងចាត់ទុកទង្វើនេះជាដំណាក់កាលថ្មីនៃសង្រ្គាមលោកខាងលិចប្រឆាំងរុស្ស៊ី ហើយនឹងសងសឹកឲ្យបានសមស្របជាទីបំផុត»។

ការវាយប្រហារនេះ កើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីរដ្ឋាភិបាលទីក្រុងវ៉ាស៊ីនតោន បើកភ្លើងខៀវឲ្យកងទ័ពលោក វ្ល៉ាឌីមៀរ ហ្សេលេនស្គី យកមីស៊ីល ATACMS របស់អាមេរិក បាញ់ចូលជ្រៅក្នុងទឹកដីរុស្ស៊ី ហើយការបើកដៃបែបនេះ ធ្វើឲ្យគេបារម្ភថា សង្គ្រាមរុស្ស៊ី-អ៊ុយក្រែន នឹងរីកកាន់តែធំ ហើយអាចឈានដល់ផ្ទុះសង្គ្រាមលោកលើកទី៣ទៀតផង។

ការវាយប្រហារនេះទៀតសោត កើតឡើងត្រឹមប៉ុន្មានម៉ោងប៉ុណ្ណោះ ក្រោយពេលប្រធានាធិបតីរុស្ស៊ី វ្ល៉ាឌីមៀរ ពូទីន ចេញបញ្ជាឲ្យអនុម័តលក្ខខណ្ឌបាញ់នុយក្លេអ៊ែរថ្មី ដោយនិយាយថា​ ទោះប្រទេសគ្មាននុយក្លេអ៊ែរក៏ដោយ ឲ្យតែមានការគាំទ្រពីប្រទេសមាននុយក្លេអ៊ែរ មកវាយប្រហាររុស្ស៊ី នោះអាចត្រូវបានចាត់ទុកថាជាការវាយប្រហាររួមគ្នាហើយ។

ម្យ៉ាងវិញទៀត ទីក្រុងមូស្គូតែងព្រមានថា ការវាយប្រហារដោយអាវុធលោកខាងលិច ចូលជ្រៅក្នុងទឹកដីរុស្ស៊ី នឹងត្រូវបានចាត់ទុកថា ជាសង្គ្រាមដោយផ្ទាល់រវាងអង្គការណាតូនិងប្រទេសរុស្ស៊ីហើយ៕

អត្ថបទ៖ សុខ សុវណ្ណ

ចុចអាន៖ រុស្ស៊ី គំរាមលោក បៃដិន ក្រោយអនុញ្ញាតឲ្យអ៊ុយក្រែន បាញ់មីស៊ីលអាមេរិក ចូលជ្រៅក្នុងដីខ្លួន